រាជធានីភ្នំពេញ ៖ ដោយបានទទួលសេចក្ដីរាយការណ៍ពីអ្នកស្ម័គ្រចិត្ដកាកបាទក្រហមកម្ពុជា អំពីគ្រោះទឹកជំនន់ដែលលិចលង់លំនៅដ្ឋានរបស់បងប្អូនប្រជាពលរដ្ឋរស់នៅក្នុងខណ្ឌមានជ័យ រាជធានីភ្នំពេញ ចំនួន២៥០គ្រួសារ ដែលក្នុងនោះនៅសង្កាត់និរោធចំនួន៤គ្រួសារ ច្បារអំពៅ១ចំនួន១៩គ្រួសារ ច្បារអំពៅ២ចំនួន១០១គ្រួសារ ព្រែកប្រាចំនួន៣២គ្រួសារ វាលស្បូវចំនួន២៨គ្រួសារ ព្រែកឯងចំនួន១៥គ្រួសារ ក្បាលកោះចំនួន៥០គ្រួសារ និងសង្កាត់ព្រែកថ្មីចំនួន១គ្រួសារ ភ្លាម នាថ្ងៃទី២៧ កញ្ញា ឆ្នាំ ២០១១ នៅបរិវេណវត្ដកំសាន្ដ ប្រតិភូកាកបាទក្រហមកម្ពុជាសាខារាជធានីភ្នំពេញ ដឹកនាំដោយ លោកប៉ា សុជាតិវង្ស ទីប្រឹក្សាផ្ទាល់សម្ដេចអគ្គមហាសេនាបតីតេជោហ៊ុន សែន នាយករដ្ឋមន្ដ្រីនៃព្រះរាជាណាចក្រកម្ពុជា និងជាប្រធានគណៈកម្មាធិការសាខាកាកបាទក្រហមកម្ពុជារាជធានីភ្នំពេញ និងលោកជំទាវ រួមដំណើរដោយលោកជំទាវ លោកឧកញ៉ា លោក លោកស្រី ក្នុងជួរគណៈកម្មាធិការសាខា មន្ដ្រីប្រតិបត្ដិសាខា អនុសាខាខណ្ឌជាច្រើនរូប បានចុះសាកសួរសុខទុក្ខ និងនាំយកអំណោយសង្គ្រោះទៅចែកជូនដល់បងប្អូនប្រជាពលដ្ឋដែលរងគ្រោះទាំង២៥០គ្រួសារខាងលើ ដើម្បីជួយសំរាលការលំបាកចំពោះមុខ ។
បន្ទាប់ពីលោកគួច ចំរើន ប្រធានកិត្ដិយសអនុសាខាកាកបាទក្រហមកម្ពុជា ខណ្ឌមានជ័យបានឡើងរាយការណ៍អំពីចំនួនស្ថិតិនៃជនរងគ្រោះជូនគណៈអធិបតីរួចមក លោកប៉ា សុជាតិវង្ស បានមានមតិញំនាំនូវសេចក្ដីផ្ដាំផ្ញើសាកសួរសុខទុក្ខ និងការព្រួយបារម្ភពីសំណាក់លោកជំទាវកិត្ដិព្រឹទ្ធបណ្ឌិតប៊ុន រ៉ានី ហ៊ុន សែន ប្រធាន កាកបាទក្រហមកម្ពុជា ដែលលោកជំទាវតែងតែគិតគូរជាប់ជានិច្ចដល់សុខទុក្ខបងប្អូនដែលរងគ្រោះដោយសារទឹកជំនន់នេះ ព្រមទាំងបានចាត់វិធានឱ្យតាមសាខារាជធានី-ខេត្ដ ដែលមានការរងគ្រោះត្រូវឆ្លើយតបឱ្យបានទាន់ពេលវេលាដោយមិនបណ្ដែតបណ្ដោយឱ្យប្រជាពលរដ្ឋយើងណាម្នាក់អត់បាយហូបនោះឡើយ។ លោកបានមានប្រសាសន៍បន្ដថា ថ្វីដ្បិតតែអំណោយសង្គ្រោះដែលនាំយកមកចែកជូននាពេលនេះ មានចំនួនតិចមិនអាចបំពេញតាមតំរូវការរបស់បងប្អូនឱ្យបានគ្រប់គ្រាន់ក៏ដោយ តែវាអាចរួមចំណែកជួយដោះស្រាយនូវបញ្ហាចំពោះមុខនាពេលនេះ ទំរាំនឹងទឹកស្រកទៅវិញ ដែលនេះជាសិល្បៈនៃការចែករំលែក និងជាកាតព្វកិច្ចរបស់ កាកបាទក្រហមកម្ពុជា តាំងពីថា្នក់ជាតិដល់មូលដ្ឋាន ហើយនេះក៏បានសបញ្ជាក់ឱ្យឃើញពីស្មារតីរួមសុខរួមទុក្ខជាមួយប្រជាពលរដ្ឋយើងនៅគ្រប់កាលៈទេសៈទាំងអស់របស់លោកជំទាវកិត្ដិព្រឹទ្ធបណ្ឌិតប្រធានប៊ុន រ៉ានី ហ៊ុន សែន ដែលដូចនឹងទិសស្លោកថា ទីណាមានការលំបាក ទីនោះមាន កាកបាទក្រហមកម្ពុជាជានិច្ច។
ចុងបញ្ចប់ លោកប្រធានគណៈកម្មាធិការសាខាក៏សូមឱ្យប្រជាពលរដ្ឋដែលរងគ្រោះដោយសារទឹកជំនន់ទាំងអស់ត្រូវមានប្រុងប្រយ័ត្នចំពោះកូនចៅកុំឱ្យលេងទឹក និងប្រយ័ត្នចំពោះសត្វអសិរពិសនានា ហើយសូមឱ្យបងប្អូន ត្រូវរក្សាឱ្យបាននូវអនាម័យជាពិសេសត្រូវបរិភោគទឹកឆ្អិនដើម្បីចៀសវាងនូវជំងឺតម្កាត់ផ្សេងៗ ។
អំណោយសង្គ្រោះដែលនាំយកមកចែកជូនគ្រួសាររងគ្រោះទាំងអស់រួមមាន ៖ អង្ករ៥.០០០គីឡូក្រាម, មី២៥០កេស, ទឹកត្រី ទឹកស៊ីអ៊ីវ៣.០០០ដប, ត្រីខ២.៥០០កញ្ចប់, ទឹកបរិសុទ្ធឱរ៉ាល់ដបធំ១២៥កេស ជារបស់អំណោយ សាខាកាកបាទក្រហមកម្ពុជារាជធានីភ្នំពេញ និង ព្រះចៅអធិការវត្ដកំសាន្ដ ឧបត្ថម្ភថវិកា១.២៥០.០០០រៀល, លោកឧកញ៉ាថៃ សេង
ឡុង ឧបត្ថម្ភថវិកា១.២៥០.០០០រៀល៕
ចែករំលែកព័តមាននេះ