ខេត្តកំពង់ចាម ៖ នៅព្រឹកថ្ងៃទី២៣ កញ្ញា តាមការអះអាងរបស់មន្ទីរធនធានទឹក និងឧតុនិយមខេត្ត ទឹកទន្លេមេគង្គ បានឡើងដល់កម្រិតកម្ពស់១៥,៦៧ម៉ែត្រ ធ្វើឱ្យស្រុកមួយចំនួនដែលនៅជាប់តាមដងទន្លេរងការលិចលង់រួមមានដូចជា ស្រុកស្ទឹងត្រង់ ក្រូចឆ្មារ កំពង់សៀម កោះសូទិន ត្បូងឃ្មុំ កងមាស និងស្រីសន្ធរ ដោយប៉ះពាល់ដំណាំស្រូវវស្សាចំនួន១០.០២២ហិកតា និងខូចខាតទាំងស្រុងចំនួន៣.២១៩
ហិកតា។ នេះជាតួលេខបណ្តោះអាសន្ន។ ជាមួយនោះដែរ ក៏មានប្រជាពលរដ្ឋរាប់រយគ្រួសារ ត្រូវបានជម្លៀសចេញទៅទីទួលសុវត្ថិភាព។
មន្ត្រីសាលាខេត្ត បានប្រាប់ឱ្យដឹងថា តាមតួលេខបណ្តោះអាសន្នដែលរងផលប៉ះពាល់ដោយគ្រោះទឹកជំនន់ដូចជាស្រុកស្ទឹងត្រង់ ក្នុងឃុំខ្ពបតាងួន ទឹកហូរដាច់ផ្លូវចំនួន៣កន្លែង ប្រហែល១៥ម៉ែត្រ ទឹកហូរលិច ហូរកាត់ផ្លូវចម្ងាយ៤គីឡូម៉ែត្រ ផ្លូវលេខ២២២ រងការខូចខាតដោយទឹកភ្លៀងហូរដាច់នៅត្រង់ចំណុចថ្នល់ទន្សាយប្រហែល៣០០ម៉ែត្រ ។ នៅព្រែកបាក់ ដាច់ផ្លូវ៣កន្លែង ជាង២០០ម៉ែត្រ នៅឃុំពាមកោះស្នា ក្នុងភូមិព្រែកសង្កែ រើផ្ទះ១ខ្នង និងភូមិពានក្នុងរុះរើផ្ទះចំនួន៤ខ្នង ។ ស្រុកក្រូចឆ្មារ លិចផ្លូវក្រាលក្រួសក្រហមចម្ងាយ២០គីឡូម៉ែត្រ ចាប់ពីកំពង់ទ្រាស ឃុំក្រូចឆ្មារ ផ្លូវក្រាលកៅស៊ូ ក្នុងឃុំរកាខ្នុរជាង២០០ម៉ែត្រ ត្រូវទឹកទន្លេហូរកាត់ពីលើ និងឃុំប៉ើស១ ផ្លូវប្រវែង១០០ម៉ែត្រ ត្រូវទឹកហូរកាត់ដែរ។ ស្រុកកោះសូទិន ផ្លូវលំនៅខាងកើតវិទ្យាល័យជីហែរ ដាច់ប្រហែល៥០០ម៉ែត្រ កំពុងទប់ និងនៅសងខាងទន្លេមេគង្គត្រូវទឹកទន្លេឡើងលិចជាច្រើនកន្លែង។
ស្រុកកំពង់សៀម ទឹកហូរលិចកាត់ផ្លូវត្រង់ចំណុចមុខវត្តគគរប្រហែលជាង១០០ម៉ែត្រ នៅឃុំកោះមិត្តនិងឃុំកោះសំរោង ត្រូវបានទឹកហូរលិចដល់ពេញភូមិ (កោះនៅកណ្តាលទន្លេមេគង្គ) ឃុំកោះទន្ទឹមទឹកលិចចូលផ្ទះមួយចំនួន ។
ស្រុកត្បូងឃ្មុំ សំណាបចំនួន៦,៤០ហិកតាត្រូវលិច ស្រូវចំនួន៥៤៨,៨១ហិកតា ដំណាំរួមផ្សំចំនួន១៨៧,៧១ហិកតា ដំឡូងមីចំនួន១៦២,២១ហិកតា សណ្តែកសៀង១១ហិកតា។ ផ្ទះចំនួន៤១គ្រួសារនៅភូមិរកាធំ និងភូមិជីរោទ៍ ក្រោមទី១ ចំនួន៦គ្រួសារត្រូវលិចលង់ លិចផ្លូវ៤៨កន្លែងស្មើ៧៤៤,២២ម៉ែត្រ និងខូចខាតប្រវែង៥៤៥ម៉ែត្រ លិចសាលារៀន១៤កន្លែង លិចវត្តចំនួន១១ ក្នុងនោះមានវត្តទន្លេបិទផងដែរ។
ស្រុកកងមាស ផ្លូវនៅឃុំពាមជីកងដាច់ប្រហែល៥០០ម៉ែត្រ កំពុងតែទប់ ផ្លូវកំពុងត្រូវបានទឹកហូរកាត់ផ្តាច់បន្តទៀតនៅឃុំខ្ចៅ១កន្លែង វ៉ារិន្ទ ស្វាយពាន់ សូគងផ្លូវនៅកន្លែងផ្សេងទៀតជាច្រើនកន្លែងត្រូវទឹកឡើង ព្រៀបៗតែម្តង។ ជាមួយនោះ អាជ្ញាធរស្រុកបានដាក់កម្លាំងទប់នៅខាងថ្លុកជ្រៅ ហើយនៅកោះតាង៉ោ អាចនឹងត្រូវដាច់នៅថ្ងៃទី២៣ កញ្ញា ។
ស្រុកស្រីសន្ធរ ផ្លូវលំនៅក្នុងឃុំឫស្សីស្រុក ប្រហែល១.៥០០ម៉ែត្រ ត្រូវបានដាច់ដោយអន្លើ កំពុងតែទប់ និងឃុំស្វាយខ្សាច់ភ្នំដាច់ប្រហែល៥០០ម៉ែត្រ។ ប្រជាពលរដ្ឋចំនួន៣៨គ្រួសារ រស់នៅភូមិតាង៉កថ្មី និងភូមិកំពង់ភ្នៅ ត្រូវបានជម្លៀសចេញទៅរកទីទួលសុវត្ថិភាព ។
បើតាមលិខិតរបស់លោកហេង ប៊ិនយិ ប្រធានមន្ទីរកសិកម្មខេត្ត ចុះនៅថ្ងៃទី២១ កញ្ញា ២០១១ ផលប៉ះពាល់ស្រែមានចំនួន១០.០២២ហិកតា (សំណាប៧៩ហិកតា សន្ទូង៥.២៤១ហិកតា ពង្រោះ៤.៧០២ហិកតា) និងការខូចខាតវិញមាន៣.២១៩ហិកតា (សំណាប១០ហិកតា សន្ទូង១៣៤០ហិកតា ពង្រោះ១.៨៦៩ហិកតា)។
លោកលន់ លឹមថៃ អភិបាលរងខេត្តមានប្រសាសន៍ប្រាប់តាមទូរស័ព្ទឱ្យដឹងថា រហូតមកដល់ម៉ោង១រសៀលថ្ងៃទី២៣ កញ្ញា ទឹកទន្លេមេគង្គបានបន្តឡើងធ្វើឱ្យផ្លូវនៅតាមបណ្តាស្រុក ដែលនៅជាប់តាមដងទន្លេមេគង្គត្រូវបានលិចជាបន្តបន្ទាប់ដែលធ្វើឱ្យប្រជាពលរដ្ឋពិបាកក្នុងការធ្វើដំណើរនារដូវបិណ្ឌភ្ជុំបិណ្ឌនេះ។ ទន្ទឹមនេះ លោកហ៊ុន ណេង អភិបាលខេត្ត បានណែនាំដល់អាជ្ញាធរស្រុក ដែលនៅជាប់ដងទន្លេមេគង្គ ត្រូវតែយកចិត្តទុកដាក់បង្កើនការប្រុងប្រយ័ត្នដើម្បីជួយអន្តរាគមន៍ជន្លៀសប្រជាពលរដ្ឋដែលមានផ្ទះសម្បែងរងការលិចលង់ដោយទឹកជំនន់ទន្លេមេគង្គទៅកាន់ទីទួលសុវត្ថិភាពដូចជា សាលារៀន វត្តអារាមជាដើម។ គ្រោះទឹកជំនន់នេះមិនទាន់មានសេចក្តីរាយការណ៍ថា មានប្រជាពលរដ្ឋណាម្នាក់ស្លាប់ទេ៕
ចែករំលែកព័តមាននេះ