មនុស្សជាច្រើនរយនាក់បានធ្វើបាតុកម្មកាលពីថ្ងៃទី៦ មីនា នៅទីក្រុងកាប៊ុល ដោយស្រែកពាក្យស្លោកថា «ស្លាប់ទៅអាមេរិក» ដើម្បីតវ៉ាប្រឆាំងនឹងការស្លាប់ជនស៊ីវិលជាច្រើននាក់ក្នុងការវាយប្រហារតាមអាកាសរបស់កងកម្លាំងចម្រុះអន្តរជាតិនៅអាហ្វហ្គានីស្ថាន ។ កាលពីថ្ងៃទី១ មីនា កន្លងមកនេះ កុមារអាហ្វហ្គានីស្ថាន៩នាក់ដែលដើររកអុសនៅតំបន់គូណារភាគខាងកើតប្រទេសត្រូវស្លាប់ដោយសារការបាញ់ប្រហាររបស់កងឧទ្ធម្ភាគចក្រអូតង់ ក្រោយការវាយប្រហាររបស់ពួកបះបោរលើមូលដ្ឋានមួយស្ថិតនៅក្បែរនោះ ។
ក្នុងឱកាសនៃការជួបគ្នាមួយជាមួយឧត្តមសេនីយ៍ DAVID PETRAEUS មេបញ្ជាការកងទ័ពអាមេរិក និងអូតង់នៅអាហ្វហ្គានីស្ថាន ប្រធានាធិបតីអាហ្វហ្គានីស្ថានលោកហាមីដ កាហ្សៃ ថ្លែងថា ការសុំទោសរបស់កងកម្លាំងអន្តរជាតិពុំគ្រប់គ្រាន់ឡើយ និងថា ការស្លាប់ជនស៊ីវិលច្រើននាក់ ក្នុងការវាយឆ្មក់ទាំងឡាយគឺពុំអាចទទួលយកបានឡើយ ។
បណ្តាអ្នកទទួលខុសត្រូវអាហ្វហ្គានីស្ថានកត់សម្គាល់ឃើញការវាយប្រហារច្រឡំយ៉ាងតិច៤លើករបស់កងកម្លាំងអន្តរជាតិនៅភាគខាងកើតប្រទេសរយៈពេល២សប្តាហ៍ចុងក្រោយនេះ ដែលបណ្តាលឱ្យមនុស្សស្លាប់ជាង៨០នាក់ ៕
ចែករំលែកព័តមាននេះ