ខេត្តកំពង់ស្ពឺ ៖ កាលពីថ្ងៃទី១៧ កញ្ញា កន្លងទៅនេះ សមាគមរួបរួមបងប្អូន (United Brother Association) ហៅកាត់ UBA ផ្ដើមចេញពីទឹកចិត្ដមនុស្សធម៌ បានផ្ដួចផ្ដើមគំនិតនាំគ្នារៃអង្គាសថវិកាទិញជាសម្ភារប្រើប្រាស់ និងគ្រឿងឧបភោគ បរិភោគផ្សេងៗយកទៅផ្ដល់ជូនមជ្ឈមណ្ឌលបណ្ដុះបណ្ដាល និងថែទាំកុមារកំព្រាស្ថិតនៅក្នុងភូមិទី១ ឃុំត្រែងត្រយឹង ស្រុកភ្នំស្រួច។
ខេត្តកំពង់ស្ពឺ ៖ កាលពីថ្ងៃទី១៧ កញ្ញា កន្លងទៅនេះ សមាគមរួបរួមបងប្អូន (United Brother Association) ហៅកាត់ UBA ផ្ដើមចេញពីទឹកចិត្ដមនុស្សធម៌ បានផ្ដួចផ្ដើមគំនិតនាំគ្នារៃអង្គាសថវិកាទិញជាសម្ភារប្រើប្រាស់ និងគ្រឿងឧបភោគ បរិភោគផ្សេងៗយកទៅផ្ដល់ជូនមជ្ឈមណ្ឌលបណ្ដុះបណ្ដាល និងថែទាំកុមារកំព្រាស្ថិតនៅក្នុងភូមិទី១ ឃុំត្រែងត្រយឹង ស្រុកភ្នំស្រួច។
លោក OKEZIE PRINCEWILL EZEKIEL តំណាងសមាគម «រួបរួមបងប្អូន»បានឱ្យដឹងថា សមាគម«រួបរួមបងប្អូន»ធ្វើសកម្មភាពដើម្បីជួយសង្គ្រោះកុមារកំព្រា និងលុបបំបាត់ភាពអត់ឃ្លាននៅក្នុងប្រទេសកម្ពុជា។ ការផ្ដល់អំណោយលើកនេះមិនមែនជាលើកទីមួយទេ កន្លងមកសមាគមធ្លាប់បាននាំយកអំណោយផ្ដល់ជូនមណ្ឌលកុមារកំព្រាមួយចំនួននៅប្រទេសកម្ពុជាជាច្រើនលើករួចមកហើយ ដូចជានៅមណ្ឌលថែទាំកុមារកំព្រាស្ថិតនៅក្នុងខណ្ឌមានជ័យ និងមណ្ឌលកុមារកំព្រាបៃតង ស្ថិតនៅក្នុងបរិវេណនៃមន្ទីរពេទ្យព្រះកេតុមាលា ក្នុងរាជធានីភ្នំពេញជាដើម។ ដោយឡែកពេលនេះ ដោយមើលឃើញពីការលំបាក និងការខ្វះខាតរបស់កុមារកំព្រានៅមជ្ឈមណ្ឌលបណ្ដុះបណ្ដាល និងថែទាំកុមារកំព្រាខេត្ដកំពង់ស្ពឺ ទើបសមាគមបានកៀងគរបណ្ដាសប្បុរសជននានា ទាំងក្នុងនិងក្រៅស្រុក ដើម្បីចូលរួមរំលែកទុក្ខលំបាកតាមរយៈការផ្ដល់ជាសម្ភារប្រើប្រាស់និងគ្រឿងឧបភោគបរិភោគ មានអង្ករ១៥បាវ, មីកញ្ចប់, ទឹកបរិសុទ្ធ, ប្រេងឆា, ទឹកត្រី, ទឹកស៊ីអីុវ, អំបិល, ប៊ីចេង, ស្ករស និងម្សៅសាប៊ូ។ លោកយល់ថា អំណោយទាំងនេះមានចំនួនតិចតួចស្ដួចស្ដើងមែន ប៉ុន្ដែវាអាចជួយសម្រាលការលំបាករបស់កុមារកំព្រា ក៏ដូចជាអាណាព្យាបាលក្នុងមជ្ឈមណ្ឌលបានមួយរយៈដែរ។
លោកមឿន ចំរើន ប្រធានមជ្ឈមណ្ឌលបណ្ដុះបណ្ដាល និងថែទាំកុមារកំព្រាខេត្ដកំពង់ស្ពឺ បានឱ្យដឹងថា នៅក្នុងមជ្ឈមណ្ឌលមានកុមារកំព្រាក្នុងបន្ទុកសរុបចំនួន១៣០នាក់ ក្នុងនោះស្រី៥៥នាក់ ពួកគេភាគច្រើនសុទ្ធតែកំព្រាឪពុកម្ដាយ និងមួយចំនួនទៀតជាក្មេងកំព្រាដោយមានផ្ទុកមេរោគផងដែរ ដែលមកពីតាមបណ្ដាខេត្ដនានា ដូចជាខេត្ដកំពង់ធំ កំពង់ឆ្នាំង កំពត ស្វាយរៀង តាកែវ កំពង់ស្ពឺ និងខេត្ដផ្សេងៗមួយចំនួនទៀត។ លោកបន្ដទៀតថា មជ្ឈមណ្ឌលបណ្ដុះបណ្ដាល និងថែទាំកុមារកំព្រានេះបានបង្កើតឡើងតាំងពីឆ្នាំ១៩៩៩មកម៉្លេះ ហើយបានចុះបញ្ជីទទួលស្គាល់ដោយក្រសួងមហាផ្ទៃនៅថ្ងៃទី១៦ មិថុនា ឆ្នាំ២០០៦។ មជ្ឈមណ្ឌលនេះចាប់ផ្ដើមដំបូងមានកុមារត្រឹមតែ១៧នាក់ប៉ុណ្ណោះ ប៉ុន្ដែក្រោយមកដោយសារការមានជំនឿទុកចិត្ដពីបណ្ដាម្ចាស់ជំនួយ និងថ្នាក់ដឹកនាំកម្ពុជា ដែលតែងតែយកចិត្ដទុកដាក់ក្នុងការទំនុកបម្រុង ពិសេសលោកជំទាវ ផេង គន្ធាបូរី និងលោកសាយ ឈុំ ពេលនេះចំនួនកុមារបានកើនឡើងរហូតដល់១៣០នាក់ ។
លោកមឿន ចំរើន បានថ្លែងអំណរគុណយ៉ាងជ្រាលជ្រៅចំពោះការនាំយកអំណោយរបស់សមាគម «រួបរួមបងប្អូន» មកជូនមជ្ឈមណ្ឌលកុមារកំព្រានេះ ហើយលោកសង្ឃឹមថា សកម្មភាពចូលរួមចំណែករំលែកនូវក្ដីលំបាករបស់កុមារកំព្រា នឹងនៅតែបន្ដនាពេលខាងមុខទៀត។ លោកក៏សូមអំពាវនាវដល់បណ្ដាសប្បុរសជននានា មេត្ដាជួយឧបត្ថម្ភដល់មជ្ឈមណ្ឌលមួយនេះឱ្យបានកាន់តែច្រើន ព្រោះបច្ចុប្បន្នមជ្ឈមណ្ឌលកំពុងជួបការលំបាកនៅឡើយ។
គួរបញ្ជាក់ថា មជ្ឈមណ្ឌលបណ្ដុះបណ្ដាលនិងថែទាំកុមារកំព្រានេះ ក្រៅពីបីបាច់ថែរក្សាកុមារ ផ្ដល់ចំណេះដឹង អប់រំក្នុងសាលារដ្ឋ មជ្ឈមណ្ឌលក៏មានការបង្រៀនក្រៅប្រព័ន្ធដែរ ដូចជាភាសាបរទេសនិងជំនាញផ្សេងៗទៀត៕
ចែករំលែកព័តមាននេះ