ខេត្តព្រះវិហារ ៖ កាលពីព្រឹកថ្ងៃទី១៧ កញា ក្រុមហ៊ុនដីសម្បទានសេដ្ឋកិច្ចចំនួន៤ និងមន្ដ្រីរាជការ ស្ថាប័នជុំវិញសាលាខេត្ដ ក្នុងនោះ មានក្រុមហ៊ុនសីលាដាម៉ិច, ក្រុមហ៊ុនរតនាខូអប ភើរ៉េសិន, ក្រុមហ៊ុនស៊ីចាន់ថុន និងក្រុមហ៊ុនហ្គ្រីនឌីវេឡុបម៉ែន បាននាំអំណោយយកទៅផ្តល់ជូនកងទ័ពជាសម្ព័ន្ធភាពក្នុងវរសេនាតូច លេខ៤០៥ឈរជើងនៅលើខ្នងភ្នំដងរែកនៃខ្សែបន្ទាត់ព្រំដែន
ខេត្តព្រះវិហារ ៖ កាលពីព្រឹកថ្ងៃទី១៧ កញា ក្រុមហ៊ុនដីសម្បទានសេដ្ឋកិច្ចចំនួន៤ និងមន្ដ្រីរាជការ ស្ថាប័នជុំវិញសាលាខេត្ដ ក្នុងនោះ មានក្រុមហ៊ុនសីលាដាម៉ិច, ក្រុមហ៊ុនរតនាខូអប ភើរ៉េសិន, ក្រុមហ៊ុនស៊ីចាន់ថុន និងក្រុមហ៊ុនហ្គ្រីនឌីវេឡុបម៉ែន បាននាំអំណោយយកទៅផ្តល់ជូនកងទ័ពជាសម្ព័ន្ធភាពក្នុងវរសេនាតូចលេខ៤០៥ឈរជើងនៅលើខ្នងភ្នំដងរែកនៃខ្សែបន្ទាត់ព្រំដែនកម្ពុជា-ថៃ តំបន់ច្រកអានសេះក្នុងស្រុកជាំក្សាន្ដ។ ពិធីនេះធ្វើឡើងនៅទីបញ្ជាការវរសេនាតូចលេខ១ចំណុះតំបន់សឹករងព្រះវិហារក្បែរជើងភ្នំដងរែក ក្នុងស្រុកជាំក្សាន្ដ ក្រោមអធិបតីភាពលោកអ៊ុំ ម៉ារ៉ា អភិបាលខេត្ដ ដោយមានការចូលរួមពីតំណាងក្រុមហ៊ុនដីសម្បទានសេដ្ឋកិច្ចទាំង៤ មន្ដ្រីរាជការជុំវិញខេត្ដ និងកងទ័ពវរសេនាតូចលេខ៤០៥ ចំណុះតំបន់សឹករងព្រះវិហារជាង២០០នាក់ ។
លោកឧត្ដមសេនីយ៍ត្រីសោម បុប្ផារ័ត្ន មេបញ្ជាការតំបន់ប្រតិបត្ដិការសឹករងព្រះវិហារ បានរាយការណ៍អំពីសភាពការណ៍ព្រំដែនកម្ពុជា-ថៃដោយលោកបញ្ជាក់ថា សភាពការណ៍យោធាតាមបណ្ដោយព្រំដែនកម្ពុជា-ថៃ បានវិលមករកភាពប្រសើរឡើងវិញ ហើយដោយពេលនេះ កងកម្លាំងទាំងពីរភាគីដែលឈរជើងនៅតាមខ្សែបន្ទាត់ព្រំដែនមានទំនាក់ទំនងល្អរកគ្នា មិនប្រឈមមុខក្នុងការផ្ទុះអាវុធដូចកាល៣ឆ្នាំកន្លងមកនេះទ្បើយ ។ ជំនួសមុខឱ្យនាយទាហាន នាយទាហានរង និងពលទាហានទាំងអស់ លោកឧត្តមសេនីយ៍បានថ្លែងអំណរគុណអាជ្ញាធរដែនដី ព្រមទាំងក្រុមហ៊ុនទាំង៤ខាងលើដែលបានចំណាយពេលវេលា និងធនធាន ដើម្បីយកមកឧបត្ថម្ភកងទ័ពនារដូវបុណ្យកាន់បិណ្ឌដែលជាទំនៀមទម្លាប់ប្រពៃណីជាតិខ្មែរយើង ធ្វើឡើងដើម្បីរំលឹក និងឧទ្ទិសដល់វិញ្ញាណក្ខន្ធបុព្វការីជននិងយុទ្ធជន-យុទ្ធនារី ប្រជាពលរដ្ឋខ្មែរដែលបានពលីក្នុងសមរភូមិការពារជាតិ និងក្នុងរបបដ៏ខ្មៅងងឹតនៃពួកប៉ុលពត ។
លោកអ៊ុំ ម៉ារ៉ា អភិបាលខេត្ដបានមានមតិសំណេះសំណាលដោយពាំនាំមកនូវប្រសាសន៍ផ្តាំផ្ញើសាកសួរសុខទុក្ខពីសំណាក់សម្ដេចអគ្គមហាសេនាបតីតេជោហ៊ុន សែន និងលោកជំទាវកិត្ដិព្រឹទ្ធបណ្ឌិត ប៊ុន រ៉ានី ហ៊ុន សែន ក្នុងឱកាសបុណ្យកាន់បិណ្ឌនេះ ។ ជានិច្ចកាលសម្ដេចនិងលោកជំទាវតែងតែមានការនឹករលឹក និងយកចិត្ដទុកដាក់ដល់កងកម្លាំងដែលកំពុងឈរជើងតាមបណ្ដោយព្រំដែនកម្ពុជា-ថៃ។ ក្នុងនាមលោកផ្ទាល់និងជំនួសមុខឱ្យមន្ដ្រីរាជការក្នុងខេត្ដ លោកអ៊ុំ ម៉ារ៉ា បានកោតសរសើរចំពោះការខិតខំតស៊ូយ៉ាងក្រាញននៀលក្នុងការការពារបូរណភាពទឹកដីទប់ទល់នឹងបរទេសឈ្លានពាន មិនឱ្យបាត់បង់ទឹកដីសូម្បីមួយមីលី្លម៉ែត្រឡើយ។ លោកអ៊ុំ ម៉ារ៉ា បានរំលឹកនិងដាស់តឿនដល់កងកម្លាំងទាំងអស់ថា ទោះជាពេលនេះមហិច្ឆតាឈ្លានពានពីសំណាក់បរទេសវាបានស្ងប់ស្ងាត់វិញនិងវិលមករកភាពធម្មតាក៏ពិតមែន តែកងកម្លាំងមិនត្រូវមានសុទិដ្ឋិនិយមទៅលើសភាពការណ៍នោះហួសហេតុពេកទេ គឺត្រូវតែមានការប្រុងប្រយ័ត្នជានិច្ច ព្រោះអីមេរៀន វាបានបង្រៀនដល់កូនខ្មែរយើងគ្រប់រូបនាពេលកន្លងទៅនៅមិនទាន់ត្រជាក់បាតដៃនៅឡើយទេ ។
អំណោយរបស់ក្រុមហ៊ុន និងសប្បុរសជនដែលបាននាំយកទៅប្រគល់ជូនកងទ័ពវរសេនាតូចលេខ៤០៥ ឈរជើងតំបន់ច្រកអានសេះ នាព្រឹកនោះរួមមាន ក្រុមហ៊ុនសីលាដាម៉ិច និងក្រុមហ៊ុនរតនាខូអបភើរ៉េសិន ឧបត្ថម្ភអាយកូមដៃចំនួន១០គ្រឿង, មី១៥០កេស, ទឹកស៊ីអុីវ៤០យួរ, ទឹកត្រី ៤០យួរ, សៀវភៅ៣២០ក្បាល, ខ្មៅដៃ១៦០ដើម, ប៊ិច១៦០ដើម។ កងទ័ពដែលបានចូលរួម២៣៦នាក់ ក្នុងម្នាក់ៗ២០.០០០រៀល ថវិកាជូនអង្គភាព២លានរៀល។ សាលាខេត្ដព្រះវិហារ ឧបត្ថម្ភថវិកាចំនួន៣លានរៀល អង្ករ២តោន ត្រីខ២០កេស គោ១ក្បាល នំអន្សមចំនួន២៥០នំ បន្លែគ្រប់មុខ១តោន។ ក្រុមហ៊ុនហ្គ្រីនឌីវេឡុបម៉ែន និងក្រុមហ៊ុនស៊ីចាន់ថុន ឧបត្ថម្ភមី១០០កេស ៕
ចែករំលែកព័តមាននេះ