ខេត្តប៉ៃលិន ៖ ប្រជាពលរដ្ឋចំនួន២២គ្រួសារនៅស្រុកសាលាក្រៅ ដែលរងគ្រោះដោយសារទឹកជំនន់លិចផ្ទះសំបែងខូចខាតទ្រព្យសម្បត្តិ ផលដំណាំ ស្លាប់សត្វពាហនៈមួយចំនួន និងកំពុងជួបប្រទះការលំបាកក្នុងជីវភាពគ្រួសារនោះ ត្រូវបានសាខាកាកបាទក្រហមកម្ពុជាខេត្ត នាំយកអំណោយទៅចែកជូន កាលពីរសៀលថ្ងៃទី១៣ កញ្ញា កន្លងមក នៅភូមិដីស ឃុំស្ទឹងកាច់ ស្រុកសាលាក្រៅ ។
លោកឡោ ស៊ុនជាង ប្រធានអនុសាខាកាកបាទក្រហមស្រុកសាលាក្រៅបានថ្លែងឲ្យដឹងថា គ្រោះធម្មជាតិទឹកជំនន់នេះ បានកើតឡើងកាលពីរំលងអធ្រាត្រថ្ងៃទី១៣ កញ្ញា បណ្តាលឲ្យខូចខាតទ្រព្យសម្បត្តិ និងផលដំណាំប្រជាពលរដ្ឋជាច្រើន។ ក្រោយពីទទួលបានសេចក្តីរាយការណ៍ពីហេតុការណ៍នេះ ខាងអនុសាខាយើងបានរាយការណ៍បន្តទៅសាខាកាកបាទក្រហមខេត្ត ដើម្បីនាំយកអំណោយមកចែកជូនបងប្អូនប្រជាពលរដ្ឋដែលទទួលរងគ្រោះធម្មជាតិនេះ។ លោកបានបញ្ជាក់ថា ប្រជាពលរដ្ឋដែលរងគ្រោះដោយសារទឹកជំនន់មានចំនួន២២គ្រួសារ នៅភូមិដី.សចំនួន៧គ្រួសារ និងភូមិអូរដីស្អិតចំនួន១៥គ្រួសារ។ ចំណែកព័ត៌មានស្តីពីការខូចខាតនៅមិនទាន់ដឹងច្បាស់លាស់នៅឡើយទេ ព្រោះទឹកភ្លៀងនៅតែបន្តធ្លាក់មកលើភូមិទាំងអស់នោះ។
លោកសៅ សារ៉ាត់ អនុប្រធានសាខាកាកបាទក្រហមកម្ពុជាខេត្តប៉ៃលិនបានមានប្រសាសន៍ឲ្យដឹងថា ក្រោយពីទទួលបានសេចក្តីរាយការណ៍ពីអនុសាខាកាកបាទក្រហមកម្ពុជា ស្រុកសាលាក្រៅស្តីពីគ្រោះធម្មជាតិទឹកជំនន់នេះ លោកជំទាវ បាន ស្រីមុំ អីុឈាន ជាប្រធានសាខាកាកបាទក្រហមកម្ពុជាខេត្ត ដែលតែងតែគិតគូរពីសុខទុក្ខរបស់បងប្អូនប្រជាពលរដ្ឋទាំងអស់គ្នានោះ បានចាត់ឲ្យលោក និងក្រុមការងារនាំយកអំណោយមកចែកជូនបងប្អូនឲ្យបានទាន់ពេលវេលា។ លោកសៅ សារ៉ាត់ បានផ្តាំផ្ញើបងប្អូនទាំងអស់ដែលបានទទួលរងគ្រោះនេះឲ្យខិតខំប្រឹងប្រែងដាំដំណាំឡើងវិញនៅពេលទឹកស្រក ដើម្បីដោះស្រាយជីវភាពរស់នៅរបស់ខ្លួន ពីព្រោះអំណោយនេះ គឺគ្រាន់តែជួយដោះស្រាយមួយគ្រាក្នុងការលំបាករបស់បងប្អូនប៉ុណ្ណោះ។
លោកកែវ សម្បត្តិ អាយុ៤៥ឆ្នាំ ជាតំណាងប្រជាពលរដ្ឋរងគ្រោះបានថ្លែងអំណរគុណចំពោះលោកជំទាវ បាន ស្រីមុំ ជាប្រធានសាខាកាកបាទក្រហមកម្ពុជាខេត្តប៉ៃលិន និងក្រុមការងារដែលបានខិតខំប្រឹងប្រែងនាំយកអំណោយដ៏ថ្លៃថ្លាបំផុត មកចែកជូនដល់បងប្អូនប្រជាពលរដ្ឋកំពុងជួបបញ្ហាគ្រោះទឹកជំនន់នេះ។
អំណោយដែលចែកជូននោះ ក្នុងមួយគ្រួសារទទួលបានអង្ករ៥០គីឡូក្រាម ទឹកត្រី៥ដប ទឹកស៊ីអ៊ីវ៥ដប ស្ករ១គីឡូក្រាម អំបិល១គីឡូក្រាម ប៊ីចេង១កញ្ចប់ មី២០កញ្ចប់ ត្រីខ១៥កំប៉ុង កៅស៊ូតង់ធំ១ សារុង១ ក្រមា១ ភួយ១ មុង១ និងថវិកាចំនួន១០ម៉ឺនរៀល៕
ចែករំលែកព័តមាននេះ