ខេត្តកោះកុង ៖ កាលពីវេលាម៉ោង១១ និង៣០នាទីព្រឹក ថ្ងៃទី២៧ កុម្ភៈ ២០១១ លោកអាំ ផល្លីន ទីប្រឹក្សាផ្ទាល់សម្តេចអគ្គមហាពញាចក្រីហេង សំរិន និងលោកជំទាវ ព្រមទាំងក្រុមគ្រួសារ និងលោករស់ សុឌី និងភរិយាបាននាំអំណោយ និងថវិកាមួយចំនួនទៅប្រគល់ជូនដល់កងទ័ពដែលកំពុងឈរជើងការពារបូរណភាពទឹកដីតាមខ្សែបន្ទាត់ព្រំដែនទិសភូមិភាគ៣ ខេត្តកោះកុង ។ អំណោយរួមមានត្រីខកំប៉ុងចំនួន៥កេសធំ មីចំនួន៦០កេស ប្រេងឆាចំនួន១កេស និងថវិកាចំនួន៣.៤០០.០០០រៀល។
ការប្រគល់អំណោយទាំងនោះធ្វើឡើងនៅទីបញ្ជាការសមរភូមិមុខយោធភូមិភាគ៣ដែលមានលោកឧត្តមសេនីយ៍ទោ កែវ សាមួន មេបញ្ជាការយោធភូមិភាគ៣ជាអ្នកទទួល និងចាត់ចែងជូនដល់ដៃកងកំលាំងដែលកំពុងឈរជើងការពារខ្សែបន្ទាត់ព្រំដែនយ៉ាងអង់អាចក្លាហាន។ លោកអាំ ផល្លីន បញ្ជាក់ថា ទោះបីជារូបលោក ឬក្រុមគ្រួសារ និងពលរដ្ឋខ្មែរទាំងអស់មិនបានមកឈរជើងនៅលើសមរភូមិក៏ដោយ តែទឹកចិត្ត និងឧត្តមគតិស្ថិតនៅជាប់ជាដរាបជាមួយកងទ័ពសមរភូមិមុខ មិនតែប៉ុណ្ណោះតែងតែផ្តល់គ្រប់លទ្ធភាពអ្វីដែលសមរភូមិក្រោយមាន គឺត្រូវតែផ្តល់ជូនកំលាំងសមរភូមិមុខឱ្យមានដូចគ្នា រួមទាំងការស្នាក់អាស្រ័យ និងការហូបចុកផងដែរ ដូចពាក្យស្លោកថា «សមរភូមិមុខដើម្បីសមរភូមិក្រោយ សមរភូមិក្រោយដើម្បីសមរភូមិមុខ»។
លោកឧត្តមសេនីយ៍ទោ កែវ សាមួន ជួសមុខឱ្យកងកំលាំងដែលកំពុងឈរជើងនៅសមរភូមិជួរមុខក៏ដូចជាក្នុងភូមិភាគ៣ទាំងមូលបានថ្លែងអំណរគុណយ៉ាងជ្រាលជ្រៅចំពោះលោកអាំ ផល្លីន ព្រមទាំងសប្បុរសជនទាំងអស់ដែលបាននាំអំណោយមកផ្តល់ជូនកងទ័ព។ កាយវិការនេះបានផ្សារភ្ជាប់យ៉ាងស្និទ្ធស្នាលរវាងសមរភូមិក្រោយ និងសមរភូមិមុខ។ ដើម្បីឆ្លើយតបនឹងការផ្តល់កំលាំងចិត្តនេះក្នុងនាមកំលាំងឈរជើងនៅយោធភូមិភាគ៣ទាំងមូលបានប្តេជ្ញាចិត្តថា នឹងការពារបូរណភាពទឹកដីកម្ពុជាមិនឱ្យបាត់បង់មួយមីល្លីម៉ែត្រឡើយ ៕
ចែករំលែកព័តមាននេះ