ឧទ្ធម្ភាគចក្រធុនស្រាលបំផុតលើកដំបូងរបស់ចិន ត្រូវបានបង្ហាញកាលពីថ្ងៃទី១៥ កញ្ញា ក្នុងឱកាសនៃពិព័រណ៍ឧទ្ធម្ភាគចក្រលើកដំបូងរបស់ចិនដែលប្រព្រឹត្តទៅពីថ្ងៃទី១៥ ដល់ថ្ងៃទី១៨ កញ្ញា នៅទីក្រុងទៀនជីន ជាទីក្រុងកំពង់ផែមួយស្ថិតនៅភាគខាងជើងប្រទេសចិន។
ឧទ្ធម្ភាគចក្រទម្ងន់ត្រឹម១តោន ធុន AC-310 មានម៉ាស៊ីនមួយនេះអាចដឹកអ្នកដំណើរបាន២ ឬ៣នាក់ ហើយអាចហោះបានក្នុងល្បឿន១៥៩គីឡូម៉ែត្រ ក្នុងមួយម៉ោង។ ឧទ្ធម្ភាគចក្រធុននេះផលិតដោយក្រុមហ៊ុន AVIATION INDUSTRY CORPORATION OF CHINA (AVIC) ។
ឧទ្ធម្ភាគចក្រធុននេះអាចប្រើប្រាស់សម្រាប់ប្រតិបត្តិការជួយសង្គ្រោះបន្ទាន់ ត្រួតពិនិត្យបរិស្ថាន បណ្តុះបណ្តាលអ្នកបើក និងសម្រាប់ប្រើប្រាស់បែបឯកជន ។ សំដៅពិសេសចំពោះទីផ្សារយន្តហោះឯកជនចិន ដែលកំពុងមានការពេញនិយម ឧទ្ធម្ភាគចក្រធុនស្រាលបំផុតនេះ ផលិតសម្រាប់សាធារណជន បណ្តាអ្នកមានមធ្យម និងបណ្តាអ្នកអាជីពខាងឧទ្ធម្ភាគចក្រ។
ឧទ្ធម្ភាគចក្រធុននេះនឹងលក់ក្នុងតម្លៃ២,៥លានយន់ (៥៤១.១០០ដុល្លារ) ជាតម្លៃសមស្របមួយចំពោះពួកអ្នកមានចិន និងបណ្តាក្លឹបយន្តហោះ ។ យោងតាមពួកអ្នករៀបចំថា ក្រុមហ៊ុនជាង២០០ មកពីប្រទេស និងតំបន់ជាង២០បានចូលរួមក្នុងការតាំងពិព័រណ៍នេះ ៕
ចែករំលែកព័តមាននេះ