ខេត្តតាកែវ ៖ កំណាត់ផ្លូវលំក្នុងភូមិ១ខ្សែប្រវែង១.៥០០ម៉ែត្រ ដែលមានការខូចខាតស្ទើរតែប្រជាពលរដ្ឋធ្វើដំណើរលែងកើត ពេលនេះក្រោមគំនិតផ្តួចផ្តើមរបស់លោកមេឃុំ អាចារ្យ គណៈកម្មការវត្ត និងប្រជាពលរដ្ឋបានរៃអង្គាសថវិកាដើម្បីជួសជុលផ្លូវលំមួយខ្សែនេះឱ្យល្អឡើងវិញ ។
លោកទឹម អ៊ុយ មេឃុំខ្វាវ ស្រុកទ្រាំង បានឱ្យដឹងថា កំណាត់ផ្លូវដែលមានការខូចខាតនេះតភ្ជាប់ពីភូមិកី្តរុន ទៅភូមិពង្រ មានការខូចខាតពិបាកដល់ការធ្វើដំណើររបស់ប្រជាពលរដ្ឋជាយូរមកហើយ ។ ដោយសារមើលឃើញបែបនេះហើយ ទើបលោកផ្តើមគំនិតឱ្យមានការចូលរួមពីគណៈកម្មការវត្តក្តីរុន ព្រះសង្ឃនិងប្រជាពលរដ្ឋទាំង២ភូមិ រួមសាមគ្គីគ្នាចូលរួមវិភាគទានទៅតាមសទ្ធារៀងៗខ្លួនបានថវិកាចំនួនជាង៨លានរៀលសម្រាប់ទិញដីជួសជុលផ្លូវលំ១ខ្សែនេះ ដែលបច្ចុប្បន្នបានជួសជុលរួចរាល់ហើយ។
លោកមេឃុំ បានបន្តថា ផ្លូវនេះបានជួសជុលកាលពីក្នុងខែសីហាកន្លងទៅ ហើយនេះជាសមិទ្ធផលសាមគ្គីគ្នាមួយមិនអាចកាត់ថ្លៃបានរបស់ប្រជាពលរដ្ឋក្នុងមូលដ្ឋាន ។ ពេលនេះការធ្វើដំណើរទៅមករបស់ប្រជាពលរដ្ឋលែងជួបការលំបាកទៀតហើយ ហើយលោកក៏សូមថ្លែងអំណរគុណគណៈកម្មការវត្ត ព្រះសង្ឃ និងប្រជាពលរដ្ឋទាំងអស់ដែលបានសហការគ្នាល្អក្នុងការរួមចំណែកថវិកាផ្ទាល់ខ្លួនដើម្បីជួសជុលផ្លូវ១ខ្សែនេះសម្រាប់ធ្វើដំណើរទាំងអស់គ្នា ។
ទោះបីជាបែបណា ពួកគាត់ទាំងអស់់គ្នាបានសំណូមពរដល់រាជរដ្ឋាភិបាលដែលមានសម្តេចតេជោហ៊ុន សែន ជាប្រមុខ សូមមេត្តាជួយជួសជុលផ្លូវប្រវែង២.៥០០ម៉ែត្រទៀតដែលកំពុងតែខូចខាតពិបាកធ្វើដំណើរ ព្រោះពួកគាត់អត់មានលទ្ធភាពធ្វើបន្តឡើយ៕
ចែករំលែកព័តមាននេះ