ក្រុងប៉ោយប៉ែត ៖ សត្វមាន់រស់ប្រមាណជាង១០០ក្បាល ត្រូវមន្ត្រីបសុពេទ្យចាប់បានកាលពីវេលាម៉ោង១០និង៣០នាទីព្រឹកថ្ងៃទី១១ កញ្ញា ២០១១ នៅក្នុងចំណុចម៉ុងចិន ភូមិគីឡូម៉ែត្រលេខ៤ សង្កាត់ប៉ោយប៉ែត ក្រុងប៉ោយប៉ែត។
តាមការបំភ្លឺពីលោកស៊ីវ គីមហេង មន្ត្រីបសុពេទ្យក្រុងប៉ោយប៉ែតបានឱ្យដឹងថា សត្វមាន់រស់ដែលមន្ត្រីរបស់លោកចាប់នោះ គឺដោយយោងតាមបទបញ្ជារបស់ថ្នាក់ដឹកនាំ មិនអនុញ្ញាតឱ្យផលិតផលពីបក្សី ឬសត្វមាន់រស់ លួចនាំចូលពីប្រទេសជិតខាងដោយខុសច្បាប់នោះឡើយ។
មន្ត្រីរូបនោះបន្តថា ចំពោះស្ត្រីជាម្ចាស់សត្វមាន់នោះ ត្រូវមន្ត្រីរបស់លោកធ្វើការឃាត់ខ្លួនជាច្រើនលើកមកហើយ និងបានធ្វើកិច្ចសន្យាឱ្យបញ្ឈប់ការលួចនាំចូលសត្វមាន់មកក្នុងប្រទេសកម្ពុជាតទៅទៀត សម្រាប់ថ្ងៃក្រោយ តែស្ត្រីជាមេឈ្មួញរូបនេះនៅតែមិនព្រមរៀងចាលទាល់តែសោះ ។
តាមការបំភ្លឺពីស្ត្រីឈ្មោះស្រីនាង អាយុ២៨ឆ្នាំ រស់នៅភូមិនិមិត្ត សង្កាត់និមិត្ត បានឱ្យដឹងថា ចំពោះ សត្វមាន់របស់គាត់ ដែលត្រូវមន្ត្រីបសុពេទ្យចាប់នោះ បាននាំយកមកពីប្រទេសថៃតាមច្រករបៀងម៉ុងចិន ហើយការដឹកជញ្ជូនសត្វមាន់រស់នេះគឺគាត់បានដឹកស្ទើរតែជារៀងរាល់ថ្ងៃ។ ការនាំចូលសត្វមាន់ទាំងអស់នេះ គឺត្រូវបង់លុយឱ្យមន្ត្រីសមត្ថកិច្ចពាក់ព័ន្ធទើបអាចនាំសត្វមាន់នោះទៅលក់បន្តក្នុងទីផ្សារអគ្គ និងផ្សារត្រី ក្នុងតំបន់ប៉ោយប៉ែតនេះបាន ៕
ចែករំលែកព័តមាននេះ