ខេត្តកំពត ៖ ក្រុមចោរប្លន់មានគ្នាចំនួន២នាក់ ប្រដាប់ដោយអាវុធអាកាមួយដើម បានធ្វើសកម្មភាពប្លន់ផ្ទះរបស់ស្ត្រីម្នាក់ឈ្មោះណុប ទៀង អាយុ៣៥ឆ្នាំ មានកូនស្រីម្នាក់ អាយុ៣ឆ្នាំ នៅភូមិដំណាក់ត្រយឹង ឃុំខ្ជាយខាងត្បូង ស្រុកដងទង់ ។
ខេត្តកំពត ៖ ក្រុមចោរប្លន់មានគ្នាចំនួន២នាក់ ប្រដាប់ដោយអាវុធអាកាមួយដើម បានធ្វើសកម្មភាពប្លន់ផ្ទះរបស់ស្ត្រីម្នាក់ឈ្មោះណុប ទៀង អាយុ៣៥ឆ្នាំ មានកូនស្រីម្នាក់ អាយុ៣ឆ្នាំ នៅភូមិដំណាក់ត្រយឹង ឃុំខ្ជាយខាងត្បូង ស្រុកដងទង់ ។ ស្ត្រីរងគ្រោះដែលក្រុមចោរប្លន់យកទ្រព្យសម្បត្តិ ជាប្រពន្ធរបស់អនុប្រធាននគរបាលប៉ុស្តិ៍ឃុំដំណាក់សុក្រំ ហេតុការណ៍នេះបានកើតឡើងនៅវេលាម៉ោង៩យប់ថ្ងៃទី៧ កញ្ញា ២០១១ ។
តាមការរៀបរាប់របស់ស្ត្រីរងគ្រោះនិយាយថា នៅវេលាម៉ោងប្រហែល៩យប់ពេលនាងកំពុងដេកនៅលើផ្ទះជាមួយកូនស្រីតូចម្នាក់ ស្រាប់តែឮសូរសំឡេងបុករនាបក្តារមួយផាំងហើយក៏ស្ងាត់ទៅវិញ។ រំពេចនោះស្រាប់តែចោរម្នាក់កាន់កាំភ្លើងភ្ជង់ និងគំរាមនាងឱ្យប្រមូលប្រាក់ និងមាសឱ្យទៅពួកគេ។ ស្ត្រីរងគ្រោះក៏បានយកប្រាក់ចំនួន១១ម៉ឺននិង៩ពាន់រៀល រួមទាំងចិញ្ចៀនមាសទម្ងន់១ជី ឱ្យទៅក្រុមចោរទាំងនោះ។
ក្រោយពេលកើតហេតុភ្លាម កម្លាំងប៉ូលិសប៉ុស្តិ៍រដ្ឋបាលឃុំខ្ជាយខាងត្បូង បានចុះមកពិនិត្យទាំងយប់ និងបាននិយាយថា ជុំវិញរឿងចោរប្លន់ផ្ទះយកទ្រព្យសម្បត្តិនេះ ប៉ូលិសបានស្វែងរក តែមិនមានប្រភពពន្លឺអ្វីសោះ។
សមត្ថកិច្ចប៉ូលិសបានបន្តទៀតថា កាលពីថ្ងៃទី៣ កញ្ញា ២០១១ ក្រុមចោរបានមកគំរាមកំហែងស្ត្រីរងគ្រោះដើម្បីប្លន់យកទ្រព្យសម្បត្តិម្តងរួចទៅហើយ តែមិនបានសម្រេច ដោយសារតែនាងជាម្ចាស់ផ្ទះបានទូរស័ព្ទប្រាប់ប្តីរបស់នាងដែលជាអនុប្រធាននគរបាលប៉ុស្តិ៍។
សមត្ថកិច្ចប៉ូលិសបាននិយាយកាលពីព្រឹកថ្ងៃទីព្រហស្បតិ៍ថា អាជ្ញាធរមិនធ្វើការបដិសេធចំពោះស្ត្រីរងគ្រោះទេ នៅតែកសាងសំណុំរឿងស៊ើបអង្កេតបន្ត តើរឿងរ៉ាវនេះកើតមានពិតប្រាកដ ឬក៏រឿងប្រឌិត?
ចែករំលែកព័តមាននេះ