សភាពការណ៍នៅតែតានតឹងជានិច្ចក្នុងប្រទេសស៊ីរី ។ កងកម្លាំងសន្តិសុខបានបាញ់កាំភ្លើងកាលពីថ្ងៃទី២៨ មីនា លើពួកបាតុករជាច្រើនរយនាក់ ដែលតវ៉ាប្រឆាំងនឹងច្បាប់គ្រាអាសន្ននៅទីក្រុង DERAA នាភាគខាងត្បូងប្រទេស ។
ពួកបាតុករបានលើកគ្នាទៅកាន់ទីលានសំខាន់ៗនៃទីក្រុងនេះ ជាចំណុចកណ្តាលចាប់តាំងពី១០ថ្ងៃមកហើយនៃការតវ៉ាប្រឆាំងនឹងរបបរបស់លោកប្រធានាធិបតីបាចារ អាល់អាសាដ និងគណបក្សបាអាស់ ។ ពួកគេបានប្រមូលផ្តុំគ្នាដោយស្រែកទាមទារថា «យើងចង់បានភាពថ្លៃថ្នូរ និងសេរីភាព» និង «បដិសេធច្បាប់គ្រាអាសន្ន» ។
លោកប្រធានាធិបតីបាចារអាល់ អាសាដ ត្រូវថ្លែងសុន្ទរកថាមួយអំពីសេចក្តីសម្រេចចិត្ត
សំខាន់ៗទាំងឡាយ ។ នេះជាការប្រកាសកាលពីថ្ងៃទី២៨ មីនា របស់អនុប្រធានាធិបតី លោកហ្វារុក ចារ៉ា ។ អនុប្រធានាធិបតីរូបនេះដែលពុំបញ្ជាក់លម្អិតពីសេចក្តីសម្រេចចិត្តទាំងនោះ គ្រាន់តែគូសបញ្ជាក់ថា សេចក្តីសម្រេចចិត្តទាំងនេះគឺជាការបំពេញចិត្តរបស់ប្រជាជន ។
ដើម្បីប៉ុនប៉ងរំងាប់ការតវ៉ារដ្ឋអំណាចបានដោះលែងរួចហើយ នូវអ្នកទោស២៦០នាក់ កាលពីថ្ងៃទី២៦ មីនា កន្លងមកនេះ និងបានប្រកាសពីចេតនាលុបចោលច្បាប់ប្រកាសអាសន្នដែលមានជាធរមានក្នុងទូទាំងប្រទេស ចាប់តាំងពីឆ្នាំ១៩៦៣មក ៕
ចែករំលែកព័តមាននេះ