សម្តេចសង្ឃទីបេដាឡៃឡាម៉ា បានប្រកាសកាលពីថ្ងៃទី១០ មីនា ពីផែនការរបស់ព្រះអង្គក្នុងការបោះបង់ចោលអំណាចនយោបាយជាប្រមុខចលនាទីបេ ។ នេះបើតាមការឱ្យដឹងដោយគេហទំព័ររបស់ព្រះអង្គ ។ សម្តេចសង្ឃដាឡៃឡាម៉ា ជាមេដឹកនាំសាសនារស់នៅនីរទេសក្នុងសេចក្តីថ្លែងការណ៍មួយគូសបញ្ជាក់ថា ពលរដ្ឋទីបេចង់បានមេដឹកនាំដែលត្រូវជ្រើសរើសដោយសេរី ដោយពលរដ្ឋទីបេ ជាពិសេសអ្នកដែលខ្ញុំអាចប្រគល់អំណាចទៅឱ្យ ។
សម្តេចសង្ឃរូបនេះថ្លែងទៀតថា នៅថ្ងៃទី១៤ មីនា ខាងមុខ សភានឹងជួបប្រជុំនៅក្នុងទីក្រុង Dharamsala ប្រទេសឥណ្ឌាដើម្បីសម្រេចថា តើត្រូវអនុម័តលើសំណើរបស់ព្រះអង្គឬក៏អត់។ កាលពីខែតុលា ឆ្នាំ២០១០ កន្លងមក សម្តេចសង្ឃដាឡៃឡាម៉ា ថ្លែងប្រាប់ទូរទស្សន៍ CNN ថា ព្រះអង្គចង់ចូលនិវត្តន៍នៅពេលណាមួយនាពេលខាងមុខ ។ សម្តេចសង្ឃទីបេថ្លែងថា «ខ្ញុំជាមនុស្សដែរ ដូច្នេះការចូលនិវត្តន៍ជាសិទ្ធិរបស់ខ្ញុំ» ។ ប៉ុន្តែសម្តេចមិនបានឱ្យដឹងពីកាលបរិច្ឆេទនៃការចូលនិវត្តន៍នៅឡើយទេ ៕
ចែករំលែកព័តមាននេះ