ជនស៊ីវិល១៣នាក់ត្រូវស្លាប់កាលពីថ្ងៃទី៥ កញ្ញា ដោយសារការបាញ់ប្រហាររបស់កងទ័ព និងកងកម្លាំងសន្តិសុខស៊ីរីដែលធ្វើការវាយលុក ថ្មីៗក្នុងទីក្រុងជាច្រើនរបស់ប្រទេស។ តំបន់ HOMS នាភាគកណ្តាលប្រទេសមានជនរងគ្រោះច្រើនជាងគេដោយមនុស្ស១២នាក់ត្រូវកងកម្លាំងលោកប្រធានាធិបតីបាចាអាល់ អាសាដ សម្លាប់។ អង្គការឃ្លាំមើលសិទ្ធិមនុស្សស៊ីរីក៏រៀបរាប់ផងដែរ ពីការចាប់ខ្លួនមនុស្សជាង៨០នាក់ នៅសង្កាត់ខាងលីឌីយ៉ា នៃទីក្រុង HOMS ។
ក្រុងហាម៉ាជាប្រភពដើមនៃការបះបោរប្រឆាំងរបបលោកអាល់អាសាដ កាលពីថ្ងៃទី៥ កញ្ញា នោះ ក៏រងការវាយលុកខាងយោធាដោយទ្រង់ទ្រាយធំមួយដែរ ។ សកម្មជនសិទ្ធិមនុស្សម្នាក់និយាយថា រថយន្តយោធាជាង៣០គ្រឿង បានលុកចូលនាព្រឹកថ្ងៃទី៥ កញ្ញា ក្នុងទីក្រុងហាម៉ា ហើយស្នូរកាំភ្លើងត្រូវបានស្តាប់ឮក្នុងទីក្រុងនេះ ។ នៅជិតព្រំដែនជាមួយតួកគី ក៏មានការវាយប្រហាររបស់កងយោធាដែរ បណ្តាលឱ្យមនុស្សស្លាប់ម្នាក់នៅតំបន់ IDLEB ៕
ចែករំលែកព័តមាននេះ