រាជធានីភ្នំពេញ ៖ វិទ្យាស្ថានបច្ចេកវិទ្យាកម្ពុជា (សាលាតិចណូ) នឹងមានរៀបចំការតាំងពិព័រណ៍ការងារមួយលើផ្នែកព័ត៌មានវិទ្យា (ICT Career Expo) នៅថ្ងៃសុក្រ ទី១៨ និងថ្ងៃសៅរ៍ ទី១៩ មីនា ២០១១ នៅសាលាតិចណូ ដែលនឹងមានការចូលរួមពីក្រុមហ៊ុនបំរើសេវាកម្មខាងផ្នែកព័ត៌មានវិទ្យាចំនួន១៧ក្រុមហ៊ុន។
គោលបំណងនៃការតាំងពិព័រណ៍នេះ គឺដើម្បី បង្កើតអោយមានការជួបជុំគ្នារវាងអ្នកស្វែងរកការងារធ្វើ ជាមួយនឹងក្រុមហ៊ុនខាងផ្នែកព័ត៌មានវិទ្យាដែលត្រូវការជ្រើសរើសបុគ្គលិកមានសមត្ថភាពខ្ពស់ ដើម្បីបំពេញការងារ ។ និស្សិតដែលកំពុងតែសិក្សាផ្នែកព័ត៌មានវិទ្យា ក៏អាចមានឱកាសស្វែងយល់អំពីទីផ្សារការងារដែល ក្រុមហ៊ុននានាកំពុងតែផ្តល់អោយ។
នៅក្នុងឱកាសពិព័រណ៍នេះដែរ ស្តង់សម្ភាសន៍ការងារមួយនឹងរៀបចំឡើងដើម្បីអោយក្រុមហ៊ុនដែលចូលរួមពិព័រណ៍អាចធ្វើការសម្ភាស ជ្រើសរើសបុគ្គលិកភ្លាមៗនៅនឹងកន្លែង ។ ហើយក្នុងពេលជាមួយគ្នានោះដែរ សាលាតិចណូ ក៏នឹងរៀបចំបទបង្ហាញអំពីបច្ចេកវិទ្យាថ្មីៗក្នុងវិស័យព័ត៌មានវិទ្យា ពីសំណាក់វាគ្មិនដែលជាអ្នកជំនាញមកពីក្រុមហ៊ុនព័ត៌មានវិទ្យាធំៗនៅកម្ពុជា ។
នៅក្នុងបទបង្ហាញនេះ ក៏មានវាគ្មិនដែលជាអ្នកអាជីពក្នុងជំនាញផ្សេងៗក្នុងផ្នែកព័ត៌មានវិទ្យា ដូចជាអ្នកសរសេរកម្មវិធីកុំព្យូទ័រ អ្នករចនាគេហទំព័រ អ្នកគ្រប់គ្រងបណ្តាញកុំព្យូទ័រ នឹងមកបង្ហាញពីភារកិច្ចដែលគាត់ត្រូវទទួលខុសត្រូវ និងជំនាញដែលគាត់ត្រូវមានដើម្បីក្លាយទៅជាអ្នកជំនាញក្នុងអាជីពរបស់គាត់។ ហើយកម្មវិធីចុងក្រោយ គឺជាការចាប់រង្វាន់រកអ្នកឈ្នះរង្វាន់កុំព្យូទ័រ NetBook មួយគ្រឿង និងរង្វាន់ផ្សេងៗទៀតដោយការចូលរួមលេងហ្គេមឆ្លើយសំណួរផ្សេងៗដែលទាក់ទងទៅនឹងបច្ចេកវិទ្យាព័ត៌មាននៅលើគេហទំព័ររបស់ពិព័រណ៍www.itc.edu.kh/ict ៕
ចែករំលែកព័តមាននេះ