រដ្ឋមន្ត្រីក្រសួងការពារប្រទេសសហរដ្ឋអាមេរិក លោករ៉ូបែត ហ្គេត បានអញ្ជើញទៅដល់ទីក្រុងកាប៊ុល ប្រទេសអាហ្វហ្គានីស្ថាន កាលពីព្រឹកថ្ងៃទី៧ មីនា សម្រាប់ទស្សនកិច្ចមិនប្រកាសទុកជាមុនមួយនៅប្រទេសនេះ ។ នេះជាទស្សនកិច្ចលើកទី១៣ របស់លោករ៉ូបែត ហ្គេត ទៅកាន់ប្រទេសអាហ្វហ្គានីស្ថានក្នុងនាមជាប្រមុខមន្ទីរប៉ង់តាហ្គោន ។
តាមប្រភពព័ត៌មានថា ក្នុងអំឡុងពេលនៃទស្សនកិច្ចនោះលោករ៉ូបែត ហ្គេត គ្រោងអញ្ជើញទៅសួរសុខទុក្ខកងទ័ព និងជួបពិភាក្សាជាមួយមន្ត្រីជាន់ខ្ពស់នានា និងជួបជាមួយមេដឹកនាំអាហ្វហ្គានីស្ថានលោកហាមីដ កាហ្សៃ ផងដែរ ។
នៅពេលអញ្ជើញដល់ក្រុងកាប៊ុល លោករ៉ូប៊ែត ហ្គេត ទទួលស្វាគមន៍ដោយលោក David Petraeus មេបញ្ជាការកងកម្លាំងអង្គការអូតង់ និងអាមេរិកប្រចាំប្រទេសអាហ្វហ្គានីស្ថាន ។
ទស្សនកិច្ចរបស់លោករ៉ូបែត ហ្គេត ទៅកាន់អាហ្វហ្គានីស្ថានធ្វើឡើងចំពេលកំពុងមានភាពតានតឹងថ្មីរវាងលោកហាមីដ កាហ្សៃ និងឧត្តមសេនីយ៍ David Petraeus ចំពោះការស្លាប់ក្មេងប្រុសអាហ្វហ្គានីស្ថាន៩នាក់នៅក្នុងប្រតិបត្តិការរបស់ឧទ្ធម្ភាគចក្រអាមេរិកប្រឆាំងពួកបះបោរ ។
លោក Petraeus និងប្រធានាធិបតីអាមេរិកលោកបារ៉ាក់ អូបាម៉ា បានសុំទោសជាសាធារណៈចំពោះឧប្បត្តិហេតុនោះ ប៉ុន្តែលោកប្រធានាធិបតីកាហ្សៃ លើកឡើងថា ការសុំទោសនេះវាមិនទាន់គ្រប់គ្រាន់ទេ ។
តាមប្រភពព័ត៌មានពីមន្ទីរប៉ង់តាហ្គោនថា ក្រោយពីបញ្ចប់ទស្សនកិច្ចនៅអាហ្វហ្គានីស្ថានលោករ៉ូបែត ហ្គេត នឹងអញ្ជើញទៅកាន់ទីក្រុងសូតហ្គាត ប្រទេសអាល្លឺម៉ង់ ដើម្បីសួរសុខទុក្ខកងទ័ពអាមេរិកនៅទីនោះ បន្ទាប់មកបន្តទៅកាន់ទីក្រុងព្រុចសែល ប្រទេសបែលហ្ស៊ិក ដើម្បីចូលរួមកិច្ចប្រជុំរដ្ឋមន្ត្រីការពារប្រទេសអង្គការអូតង់ ៕
ចែករំលែកព័តមាននេះ