ខេត្តបាត់ដំបង ៖ មន្ត្រីនគរបាលស្រុកកំរៀងបានឱ្យដឹងថា មានមន្ត្រីយោធាម្នាក់បានបាញ់សម្លាប់ខ្លួនក្បែរបន្ទាយរបស់ខ្លួន ដែលស្ថិតជាប់តំបន់ព្រំដែនខ្មែរ-សៀម នៅក្នុងភូមិព្រះពុទ្ធ ឃុំបឹងរាំង ស្រុកកំរៀង កាលពីវេលារំលងអធ្រាត្រឈានចូលថ្ងៃទី២៩ សីហា ២០១១ ហើយត្រូវបានគេសង្ស័យថា មន្ត្រីយោធានេះទំនងជាមានបញ្ហាផ្លូវចិត្ត ពាក់ព័ន្ធនឹងវិបត្តិក្រុមគ្រួសារ បូករួមជាមួយការងារក្នុងបន្ទាយស្មុគ្រស្មាញផងដែរ។
តាមការផ្តល់ព័ត៌មានពីសមត្ថកិច្ចថា មន្ត្រីយោធានោះឈ្មោះជុង ប្រិយ អាយុ៥៤ឆ្នាំ បម្រើការនៅអង្គភាពកងល្បាតលេខ៥៣៥ មានទីតាំងនៅក្បែរព្រំដេន តែគាត់មានប្រពន្ធ កូនរស់នៅភូមិអំពិលប្រាំដើម ឃុំអំពិលប្រាំដើម ស្រុកបវេល។ លោកឈឹម គឹមហុង អធិការនគរបាលស្រុកកំរៀង បានប្រាប់ថា ជុង ប្រិយ បានប្រើកាំ ភ្លើង AK47 ស្វាយបត់ បាញ់ខ្លួនឯងចំនួន៤គ្រាប់ ដែល១គ្រាប់ចំក្រោមចង្កា ឯ៣គ្រាប់ទៀតចំដើមទ្រូង បណ្តាលឱ្យដួលស្លាប់ក្បែរបន្ទាយរបស់គាត់ ខណៈដែលមេឃកំពុងភ្លៀងធ្លាក់ខ្លាំងនាវេលារំលងអធ្រាត្របន្តិច។
មន្ត្រីយោធាក្នុងអង្គភាព៥៣៥ និងអ្នកភូមិផង បាននិយាយអំពីរឿងនេះថា គេឮតែស្នូរគ្រាប់កាំភ្លើងផ្ទុះ តែរាល់គ្នាយល់ថា យោធាបាញ់មេឃ ព្រោះពេលនោះភ្លៀងធ្លាក់ខ្លាំង និងមានខ្យល់បោកបក់ផង លុះព្រឹកឡើងទើបគេដឹងថា ជុង ប្រិយ មិននៅក្នុងបន្ទាយ ហើយរកឃើញសាកសពនៅខាងក្រៅបន្ទាយទៅវិញ គេថាគាត់តូចចិត្ត ជិតដល់អាយុចូលនិវត្តន៍ មិនទាន់បានរកអ្វីឱ្យសល់ជាដុំកំភួនសោះ មិនតែប៉ុណ្ណោះមានបញ្ហាក្នុងគ្រួសារទៀត៕
ចែករំលែកព័តមាននេះ