ខេត្តកំពង់ចាម ៖ បុរសមិនស្គាល់អត្តសញ្ញាណម្នាក់អាយុប្រហែលជាង២០ឆ្នាំស្លៀកខោកីឡាឆ្នូតសត្រឹមជង្គង់ មិនពាក់អាវទេ ទំនងជាកើតរោគសរសៃប្រសាទបានលោតពីលើស្ពានគីហ្ស៊ុណាធ្វើអត្តឃាតកាលពីវេលាម៉ោង៨ និង៥៥នាទីព្រឹក ថ្ងៃទី១៦ មីនា ២០១១ នៅត្រង់ចន្លោះសសរស្ពានប៉េ៦ និងប៉េ៧ ។ លោកវរសេនីយ៍ត្រីណា ចេ ប្រធានគោលដៅការពារស្ពានគីហ្ស៊ុណាបានឱ្យកោះសន្តិភាពដឹងថា បុរសនោះដើរផុតពីប៉ុស្តិ៍យាមប្រហែលជាង៣០០ម៉ែត្រក៏លោតធ្វើអត្តឃាតតែម្តង។
ក្រោយពីប្រឹងហែលលើកដៃខ្វៃៗ បានប្រហែលជាង២ទៅ៣ម៉ែត្រក៏លិចបាត់តែម្តងមិនឃើញអណ្តែតទេ។ កំលាំងការពារស្ពានបាននិយាយតាមវិទ្យុទាក់ទងប្រាប់រូបលោកឱ្យចេញអូប័រទៅជួយជននោះ។ សមត្ថកិច្ចចេញអូប័រទៅឆ្វែលរកមើលអស់មួយសន្ទុះធំមិនឃើញបុរសនោះទេ ដូច្នេះសន្និដ្ឋានថា ពិតជាស្លាប់ហើយ។
នៅកន្លែងលោតនោះ មានបន្សល់ថ្នាំ១កញ្ចប់ជាប្រភេទថ្នាំប៉ារ៉ាសេតាម៉ុលដែលសង្ស័យថា បុរសនោះកើតរោគសរសៃប្រសាទ។ លោកវរសេនីយ៍ត្រីណា ចេ ប្រធានគោលដៅការពារស្ពានគីហ្ស៊ុណាបញ្ជាក់ថា រូបលោកបានឱ្យកំលាំងក្រោមឱវាទស្រាវជ្រាវសួរនាំពីអ្នកលក់ដូរនៅខាងក្រោមស្ពានគីហ្ស៊ុណាត្រើយខាងលិចក្រុងកំពង់ចាមបានដឹងព័ត៌មានថា បុរសនោះដើរឡើងតាមជណ្តើរខាងជើង ដោយស្លៀកខោកីឡាមានឆ្នូតសមិនពាក់អាវទេ ។ បើសិនជាអ្នកណាបាត់សមាជិកគ្រួសារដែលមានភិនភាគដូចបានរៀបរាប់នេះសូមទាក់ទងជាមួយនគរបាលការពារស្ពានគីហ្ស៊ុណា ៕
ចែករំលែកព័តមាននេះ