ខេត្តបន្ទាយមានជ័យ ៖ បុរសម្នាក់លង់ទឹកបាត់មួយយប់ ទើបគេរកសពឃើញនៅវេលាម៉ោង១១និង៥៥នាទី ថ្ងៃទី២៨ សីហា ឆ្នាំ២០១១ នៅចំណុចប្រឡាយទឹកស្ពានតាផាន់ ស្ថិតក្នុងភូមិក្បាលស្ពាន សង្កាត់ព្រះពន្លា ក្រុងសិរីសោភ័ណ។
ប្រភពព័ត៌មានពីមន្ត្រីនគរបាលប៉ុស្តិ៍រដ្ឋបាលសង្កាត់ព្រះពន្លាបានឱ្យដឹងថា បុរសដែលស្លាប់ដោយលង់ទឹកនោះឈ្មោះសូត្រ សើម អាយុ២៣ឆ្នាំ រស់នៅភូមិគោរដ្ឋាន សង្កាត់អូរអំបិល ក្រុងសិរីសោភ័ណ ជាព្រូរថយន្ត។
ប្រភពដដែលបានបន្តថា នៅវេលាម៉ោង៦ល្ងាចថ្ងៃទី២៧ សីហា ឆ្នាំ២០១១ ជនរងគ្រោះបានមកលេងតាមខ្នងប្រឡាយមើលគេមុជទឹកលេងព្រោះកន្លែងចំណុចប្រឡាយស្ពានតាផាន់នោះជារៀងរាល់ថ្ងៃសៅ-អាទិត្យ គឺតែងតែមានក្មេងចាស់ ប្រុសស្រីទៅមុជទឹកលេងកម្សាន្ត។ ខណៈនោះបុរសរងគ្រោះបានឃើញនារីម្នាក់លង់ទឹកប្រញាប់លោតទៅជួយ ដោយមិនបានស្រាតខោខូវប៊យជើងវែងចេញទេ ពេលនោះនារីនោះបានអោបកជនរងគ្រោះបណ្តែតខ្លួនមកដល់ច្រាំងទំនប់ហើយឱ្យនារីនោះធាក់ឡើងគោកដោយមានអ្នកលើជួយទាញដៃផងក៏រួចខ្លួន ។ចំណែកបុរសនោះក៏លិចក្នុងទឹកបាត់ ហើយមានការភ្ញាក់ផ្អើល ដោយបាត់បុរសរងគ្រោះយូរពេកទើបដឹងថា បុរសនោះលង់ទឹកហើយបាននាំគ្នាចុះរាវតែរកពុំឃើញ។ លុះព្រឹកឡើងសាច់ញាតិបានឱ្យគេជួយមុជរាវរកទៀត រហូតដល់ម៉ោង១១និង៥៥នាទីព្រឹក ថ្ងៃទី២៨ សីហា ទើបរកសពឃើញ។
លោករ័ត្ន តក់ នាយប៉ុស្តិ៍ព្រះពន្លាបានបញ្ជាក់ថា ក្រោយពីធ្វើកោសល្យវិច័យ សមត្ថកិច្ចបានប្រគល់សពជនរងគ្រោះឱ្យទៅក្រុមគ្រួសារដឹកយកទៅធ្វើបុណ្យនៅខេត្តពោធិ៍សាត់ ដែលជាស្រុកកំណើតរបស់សព៕
ចែករំលែកព័តមាននេះ