ខេត្តរតនគីរី ៖ អាជីវករប្រកបរបរដឹកជញ្ជូនដំឡូងមីទៅលក់នៅប្រទេសវៀតណាមតាមច្រកទ្វារខេត្តកំពង់ចាមបានប្តូរទិសមកដឹកជញ្ជូនចេញតាមច្រកទ្វារអន្តរជាតិអូរយ៉ាដាវវិញ ប៉ុន្តែបានត្អូញត្អែរពីការបង់ថ្លៃក្បាលឡានច្រើនស្ថាប័ន និងបានសំណូមពរឱ្យមានការចុះថ្លៃពីសមត្ថកិច្ចដែលតំរូវឱ្យបង់ថ្លៃផងដែរ ។ ការប្រមូលទិញកសិផលពីកសិករ គឺជាការរួមចំណែកមួយរកទីផ្សារឱ្យកសិករដែរ តែបើគិតថាការដឹកកសិផលប្រៀបដូចទំនិញផ្នែកឧស្សាហកម្មនោះ ហើយទារថ្លៃក្រៅផ្លូវការច្រើនពេកពួកគេនឹងបោះបង់មុខរបរនេះ ។ ដូច្នេះអ្នកទទួលផលលំបាកគឺកសិករដែលទទួលបានទិន្នផល ហើយរកទីផ្សារមិនបាន។
ចាប់តាំងពីដើមរដូវមកប្រជាពលរដ្ឋប្រកបរបរធ្វើចំការ ដាំដំឡូងមីកំពុងពេញប្រមូលផល ហើយក្រុមអាជីវករដែលប្រមូលទិញពីចំការខ្លះទិញម៉ៅជាហិកតា ខ្លះទៀតប្រមូលទិញដោយថ្លឹងគីឡូដល់ចំការតែម្តង ។ ការដឹកជញ្ជូនភាគច្រើន គឺយកទៅលក់នៅប្រទេសវៀតណាមតាមច្រកនានាក្នុងខេត្តកំពង់ចាម ព្រោះនៅទីនោះលក់បានថ្លៃក្នុងមួយគីឡូក្រាមប្រមូលទិញពីចំការមានតំលៃ៧៥០រៀល។ បើទិញពីក្នុងឃ្លាំងស្តុកតំលៃពី៧៥០ទៅ៨៥០រៀល។ សំរាប់ដំឡូងមីហាលស្ងួតនៅខេត្តរតនគិរី ហើយលក់ចេញបានក្នុងតម្លៃរហូតដល់៩៨០រៀលទៅ៩៩០រៀល ។
អាជីវករដឹកជញ្ជូនតាមរថយន្តយីឌុបដែលអាចផ្ទុកបាន២០តោនបានត្អូញត្អែរថា គាត់ធ្លាប់ដឹកដំឡូងមីស្ងួតតាមរថយន្តទៅខេត្តកំពង់ចាមទៅលក់នៅច្រកទ្វារដូង៧ដើមក្នុងស្រុកមេមត់ ជួនកាលគាត់បន្តដឹកតាមច្រកអ្នកលឿងចេញតាមច្រកក្អមសំណខេត្តកណ្តាល។ គាត់ត្រូវចំណាយប្រាក់បង់ថ្លៃក្បាលរថយន្តឱ្យកុងត្រូលជជុះអស់យ៉ាងច្រើន វាផ្ទុយស្រឡះពីប្រសាសន៍សម្តេចតេជោដែលថា ផលិតផលកសិផលក្នុងស្រុកបើដឹកជញ្ជូន ឬនាំចេញ សមត្ថកិច្ចមិនត្រូវយកប្រាក់ពីពួកគាត់ទេ គឺជានយោបាយកាត់បន្ថយភាពក្រីក្ររបស់ប្រជាពលរដ្ឋ ។ ប៉ុន្តែធាតុពិតពួកគាត់នៅតែទទួលរងការជំរិតទារប្រាក់ក្រៅផ្លូវការពីសំណាក់សមត្ថកិច្ចដាក់កុងត្រូលជជុះនៅលើដងផ្លូវដដែល។
អាជីវកររូបនោះបន្តទៀតថា ទោះជាសមត្ថកិច្ចយកប្រាក់ពីពួកគាត់ក៏យកចុះ ប៉ុន្តែសុំយកតម្លៃល្មមៗបានហើយ ព្រោះពួកគាត់ដឹកជញ្ជូនឆ្ងាយ ចំណេញតិចតួច ខណៈកសិផលលក់ចេញមិនបានថ្លៃទេ។ គាត់ដឹកជញ្ជូនក្នុងមួយជើងគិតពីខេត្តរតនគិរីទៅខេត្តកំពង់ចាមត្រូវបង់ប្រាក់ជូនសមត្ថកិច្ចជាច្រើនកន្លែង គឺពេលចេញពីគោលដៅក្នុងខេត្តរតនគិរីត្រូវបង់ប្រាក់ឱ្យប៉ូលិសចរាចរចំនួន២ម៉ឺនរៀល ជញ្ជីងថ្លឹងក្នុងខេត្តរតនគិរីពី៥ម៉ឺនទៅ៨ម៉ឺនរៀល ស្ពានស្រែពក១០ម៉ឺនរៀល ដល់អូរពងមាន់ខេត្តស្ទឹងត្រែងចាប់ពី ៧ម៉ឺនទៅ១០ម៉ឺនរៀល បើលើសទម្ងន់ត្រូវបង់ផាកពិន័យ១០ម៉ឺនរៀលក្នុង១តោន ទៅដល់ផ្លូវកែងខ្លាស្ទុះ ខេត្តក្រចេះត្រូវបង់ប៉ូលិសចរាចរ២ម៉ឺនរៀល នៅ ក្នុងស្រុកស្នួលត្រូវបង់ប៉ូលិសចរាចរ២ម៉ឺនរៀល ជញ្ជីងថ្លឹងពី៥ម៉ឺនទៅ១០ម៉ឺនរហូតដល់ច្រកដូង៧ដើមខេត្តកំពង់ចាម ស្រុកមេមត់បង់ថ្លៃរួមតែម្តង គឺ១៥ម៉ឺនរៀល ។ បើបន្តដំណើរដឹកជញ្ជូនដល់អ្នកលឿងត្រូវបង់ជញ្ជីងថ្នល់ទទឹងចាប់ពី១០ម៉ឺនរៀលទៅ២០ម៉ឺនរៀល ។ ដល់ចំណុចជិតទីរួមខេត្តព្រៃវែងជញ្ជីងថ្លឹងចំនួន១០ម៉ឺនទៅ២០ម៉ឺនរៀល ដោយគិតតាមចំនួនភ្លៅរថយន្ត។
ប្រភពដដែលបន្តថា រហូតមកដល់បច្ចុប្បន្នតម្លៃដំឡូងមីនៅច្រកទ្វារអូរយ៉ាដាវមានហាងឆេងបនិ្តច គឺពីមុនតែ៨២០រៀលប៉ុណ្ណោះ ឥឡូវឡើងដល់៨៧០រៀលហើយទើបពួកគាត់នាំគ្នាសំរុកដឹកជញ្ជូនមកតាមច្រកអូរយ៉ាដាវវិញម្តង។ ពួកគាត់បានប្រាប់ថា ទើបតែរយៈពេលជាងកន្លះខែនេះទេ ដែលហាងឆេងនៅទីនោះឡើងខ្ពស់បន្តិច។ រដូវប្រមូលដំណាំដំឡូងមីមានតែរយៈពេលបីខែប៉ុណ្ណោះរហូតមកដល់ពេលនេះ គឺនៅរយៈពេលកន្លះខែទៀតដែលប្រមូលបាតឃ្លាំងខ្លាចដល់រដូវភ្លៀងពិបាកក្នុងការហាលសម្ងួតអាចដុះផ្សិតខូចគុណភាព។
គាត់ឱ្យដឹងថា ការដឹកជញ្ជូនចេញពីខេត្តរតនគីរីទៅច្រកទ្វារអូរយ៉ាដាវគឺត្រូវបង់ថ្លៃក្បាលរថយន្តថ្លៃណាស់ គឺបង់ជញ្ជីងចំណតចំនួនពី៤មឺុនទៅ១០មឺុនរៀល គយច្រកទ្វារ និងប៉ូលិសច្រកទ្វារត្រូវបង់ចាប់ពី៨ទៅ១០មឺុនរៀលក្នុងរថយន្តមួយគ្រឿង។ ឯគណៈកម្មការច្រកទ្វារចំនួន២មឺុនទៅ៣មឺុនរៀល។ ពិតមែនតែពេលនេះចុងរដូវ ប៉ុន្តែពួកគាត់សុំឱ្យឆ្នាំក្រោយ ឬដល់រដូវគ្រាប់ស្វាយចន្ទីសុំឱ្យមានការចុះថ្លៃក្បាលរថយន្តផង។
អាជីវករបញ្ជាក់ថា តំលៃកសិផលនៅច្រកកំពង់ចាមថ្លៃជាងនៅអូរយ៉ាដាវដោយសារកសិផលទាំងនោះត្រូវបញ្ជូនទៅក្រុងហូជីមិញ និងចំងាយផ្លូវនៅកំពង់ចាមជិតជាង។ ឯនៅអូរយ៉ាដាវឆ្ងាយ ពិបាកក្នុងការដឹកជញ្ជូននៅក្នុងប្រទេសវៀតណាមទើបតម្លៃខុសគ្នាបែបនេះ។ អាជីវករខេត្តរតនគីរីសំណូមពរសុំអាជ្ញាធរខេត្តមេត្តាជួយលុបបំបាត់កុងត្រូលជជុះខ្មោចលងទាំងនោះឱ្យអស់ផង។ បើទុកតទៅទៀតពួកគេលែងហ៊ានរកសីុដឹកជញ្ជូនទៀតហើយ ៕
ចែករំលែកព័តមាននេះ