រាជធានីភ្នំពេញ ៖ កាលពីរសៀលថ្ងៃទី២៣ សីហា ឆ្នាំ២០១១ លោកគួច ចំរើន អភិបាលខណ្ឌមានជ័យ និងសប្បុរសជននានារួមមានលោកឧកញ៉ាអ៊ូ ឆាយ លោកឧកញ៉ាលឹម ឆខាយ លោកជៀង ញឹប បាននាំយកអំណោយជាសម្ភារ និងគ្រឿងឧបភោគ បរិភោគ ទៅចែកជូនដល់ប្រជាពលរដ្ឋ២គ្រួសារដែលរងគ្រោះដោយសារអគ្គិភ័យឆាបឆេះលំនៅឋានកាលពីព្រឹកថ្ងៃទី២២ សីហា នៅភូមិមានជ័យសង្កាត់ស្ទឹងមានជ័យ ខណ្ឌមានជ័យ ។
សូមរំលឹកថា ប្រជាពលរដ្ឋ២គ្រួសារដែលបានទទួលអំណោយឧបត្ថម្ភខាងលើនេះ មួយគ្រួសារត្រូវអគ្គិភ័យឆាបឆេះផ្ទះសម្បែងទ្រព្យសម្បត្តិអស់ទាំងស្រុងរួមជាមួយកូនស្រីវ័យ១៨ឆ្នាំ ម្នាក់ផងបានស្លាប់បាត់បង់ជីវិតដោយអណ្តាតភ្លើងឆាបឆេះសន្ធោសន្ធៅរកផ្លូវចេញមិនរួច ។
សម្ភារ និងគ្រឿងឧបភោគ បរិភោគដែលនាំយកទៅចែកជូននាឱកាសនោះក្នុងមួយគ្រួសារៗទទួលបានអង្ករ៥០គីឡូក្រាម មីយើង២កេស កៅស៊ូតង់១ ខ្នើយ១ ភួយ១ កន្ទេល១ ទឹកត្រី ៦ដប ទឹកស៊ីអីុវ៦ដប កំសៀវ១ ធុង ទឹកកក១ ចានស្រាក់១យួរ ឆ្នាំងបាយនិងឆ្នាំសម្ល២ ខ្ទះឆា១ ទឹកបរិសុទ្ធ២កេស កែវ២ កញ្ច្រែងជ័រ១ បំពង់ទឹកក្តៅ១ ចានបាយនិងចានសម្ល១ឈុត ស្លាបព្រា៥ វែកឆា១ វែកសម្ល១ ចង្ក្រានហ្គាស១ ចង្អើរអាំងត្រី១ ផ្តិលទឹក១ ជ្រញ់១ កន្ថោរតូចធំ២ តែ៤កញ្ចប់ ស្ករ.ស២គីឡូក្រាម អំបិល២គីឡូក្រាម ទឹកដោះគោ៥កំប៉ុង ប្រេងឆា ២លីត្រ និងថវិកា១លានរៀល ។ ជាមួយគ្នានោះដែរ លោកឧកញ៉ាអ៊ូ ឆាយ ជួយឧបត្ថម្ភថវិកាដល់គ្រួសារដែលត្រូវភ្លើងឆាបឆេះផ្ទះអស់ទាំងស្រុងរួមជាមួយកូនស្រី ម្នាក់ស្លាប់ទៅជាមួយទៀតនូវថវិកា១.៥០០.០០០រៀល (មួយរយហាសិបម៉ឺនរៀល) និងមួយគ្រួសារទៀត ថវិកា១លានរៀល ។ លោកឧកញ៉ាលឹម ឆខាយ ជួយស័ង្កសីសម្រាប់សាងសង់ផ្ទះឡើងវិញទាំងស្រុង ។ ដោយឡែកលោក ជៀង ញឹប ជួយឧបត្ថម្ភក្នុងមួយគ្រួសារ២០ម៉ឺនរៀល ។
មានប្រសាសន៍សំណេះសំណាលចូលរួមរំលែកនូវទុក្ខលំបាកជាមួយបងប្អូនប្រជាពលរដ្ឋដែលរងគ្រោះខាងលើនេះ លោកគួច ចំរើន បានថ្លែងថា អំណោយជាសម្ភារ និងគ្រឿងឧបភោគ បរិភោគខាងលើនេះ មួយផ្នែកធំបានមកពីការជួយឧបត្ថម្ភរបស់លោកជំទាវកិត្តិព្រឹទ្ធបណ្ឌិតប៊ុន រ៉ានី ហ៊ុន សែន ប្រធានកាកបាទក្រហមកម្ពុជា តាមរយៈអនុសាខាកាកបាទក្រហមខណ្ឌមានជ័យ ៕
ចែករំលែកព័តមាននេះ