រាជធានីភ្នំពេញ ៖ គណៈប្រតិភូកម្ពុជាមួយក្រុមដឹកនាំដោយលោកប្រាក់ សុខុន រដ្ឋមន្ត្រីប្រតិភូអមនាយករដ្ឋមន្ត្រី និងជាអនុប្រធានអាជ្ញាធរមីនកម្ពុជា បានវិលត្រឡប់មកមាតុភូមិវិញ ហើយកាលពីល្ងាចថ្ងៃទី២០ សីហា ឆ្នាំ២០១១ បន្ទាប់ពីបំពេញទស្សនកិច្ចនៅសាធារណរដ្ឋសង្គមនិយមវៀតណាមរយៈពេល៣ថ្ងៃ ពីថ្ងៃទី១៧ ដល់ថ្ងៃទី២០ សីហា ឆ្នាំ២០១១ ។
លោកប្រាក់ សុខុន មានប្រសាសន៍ប្រាប់អ្នកសារព័ត៌មាននៅព្រលានយន្តហោះអន្តរជាតិភ្នំពេញ ថា គោលបំណងនៃដំណើរទស្សនកិច្ចនាពេលនេះ គឺដើម្បីជម្រាប និងពន្យល់បន្ថែមទៀតដល់ភាគីវៀតណាមអំពីទស្សនវិជ្ជា អំពីគោលដៅមនុស្សធម៌នៃអនុសញ្ញាអូតាវ៉ា និងសមិទ្ធផលដែលសម្រេចបាន និងការទាញយកផលពីអនុសញ្ញាអូតាវ៉ា ។ ទន្ទឹមនោះ គណៈប្រតិភូកម្ពុជា បានស្តាប់ផងដែរអំពីកិច្ចការទាំងឡាយដែលប្រទេសវៀតណាមបានធ្វើពាក់ព័ន្ធនឹងវិស័យបោសសំអាតគ្រាប់មីន បញ្ហាប្រឈមនឹងកង្វល់ទាំងឡាយរបស់ភាគីវៀតណាមចំពោះអនុសញ្ញា អូតាវា៉ ។ ក្រៅពីនេះ គណៈប្រតិភូកម្ពុជាក៏បានអញ្ជើញភាគីវៀតណាមមកចូលរួមកិច្ចប្រជុំស្តីពីអនុសញ្ញា អូតាវ៉ា លើកទី១១ នៅប្រទេសកម្ពុជាផងដែរ ។
លោកប្រាក់ សុខុន បានបញ្ជាក់ថា ក្នុងដំណើរទស្សនកិច្ចនេះ គណៈប្រតិភូកម្ពុជាបានជួបសម្តែងការគួសម និងពិភាក្សាការងារជាមួយរដ្ឋមន្ត្រីការបរទេស អនុរដ្ឋមន្ត្រីក្រសួងការពារជាតិ អនុរដ្ឋមន្ត្រីក្រសួងការងារជនពិការ និងសង្គមកិច្ច រួមទាំងនាយកមជ្ឈមណ្ឌលសកម្មភាពមីន និងគ្រាប់បែកនៃសាធារណរដ្ឋសង្គមនិយមវៀតណាម។ ទន្ទឹមនោះ ក៏បានជួបពិភាក្សាជាមួយអង្គការក្រៅរដ្ឋាភិបាលមួយចំនួនផងដែរ ។
ជាការឆ្លើយតប ភាគីវៀតណាមបានគាំទ្រចំពោះសកម្មភាពមនុស្សធម៌ នៃអនុសញ្ញាអូតាវា៉ ហើយក៏បានបង្ហាញឆន្ទះ និងជំហររបស់ខ្លួនចំពោះអនុសញ្ញាអូតាវ៉ា ទោះបីជាវៀតណាមមិនទាន់បានចូលជាសមាជិកអនុសញ្ញានេះ ក៏ដោយចុះ ។ ទន្ទឹមនោះ រដ្ឋមន្ត្រីវៀតណាមសុទ្ធតែបានថ្លែងអំណរគុណចំពោះកម្ពុជាដែលបានជួយផ្តល់លក្ខណៈសព្វបែបយ៉ាងក្នុងការស្រាវជ្រាវរកអដ្ឋិធាតុទាហានវៀតណាមដែលបានបាត់បង់ជីវិតនៅកម្ពុជា ពេលមកជួយរំដោះប្រជាជនកម្ពុជាឱ្យរួចផុតពីរបបប្រល័យពូជសាសន៍ប៉ុលពត ។ ប្រតិភូកម្ពុជាក៏បានថ្លែងអំណរគុណ និងដឹងគុណចំពោះប្រទេសវៀតណាមវិញផងដែរ ដែលបានបញ្ជូនទាហានស្ម័គ្រចិត្តរបស់ខ្លួនមកជួយរំដោះប្រទេសកម្ពុជា ដោយហ៊ានលះបង់សាច់ស្រស់ឈាមស្រស់របស់ពួកគេ ដើម្បីប្រជាជនកម្ពុជា ។
លោកប្រាក់ សុខុន បញ្ជាក់ថា ក្រៅពីការងារខាងលើ គណៈប្រតិភូកម្ពុជា និងភាគីវៀតណាមបានធ្វើការផ្លាស់ប្តូរបទពិសោធន៍ការងារគ្នាទៅវិញទៅមក លើសកម្មភាពការងារដោះមីន និងបោសសំអាតមីនរំដោះដី ដើម្បីបម្រើផលប្រយោជន៍ប្រជាពលរដ្ឋនៃប្រទេសនីមួយៗ ។ ទោះបីយ៉ាងណាក៏ដោយភាគីវៀតណាមបានកោតសរសើរចំពោះបទពិសោធន៍បោសសំអាតមីននៅកម្ពុជា ដែលទទួលបានជោគជ័យកន្លងមក ហើយសន្យាថា នឹងយកបទពិសោធន៍នោះទៅអនុវត្តនៅប្រទេសវៀតណាម ។ និយាយរួមលទ្ធផលនៃដំណើរទស្សនកិច្ចនោះ គឺទទួលបានជោគជ័យ និងពង្រឹងបានកាន់តែរឹងមាំនូវចំណងមិត្តភាពសាមគ្គីភាពរវាងប្រទេសទាំងពីរកម្ពុជា-វៀតណាម ៕
ចែករំលែកព័តមាននេះ