ក្រុងប៉ោយប៉ែត ៖ ស្របពេលដែលស្ថានការណ៍នៅប្រទេសសៀម កំពុងជួបភាពវឹកវរ ផ្នែកនយោបាយ និងអស្ថិរភាព ហើយសមត្ថកិច្ចសៀមរឹតបន្ដឹងសន្ថិសុខស្រុកទេសរបស់គេនោះ ពលករចំណាកស្រុកដែលលួចឆ្លង ដែនចូលទៅទឹកដីសៀមតាមច្រករបៀង ដោយខុសច្បាប់ ត្រូវបានអាជ្ញាធរ និងសមត្ថកិច្ចសៀមចាប់បញ្ជូនត្រឡប់មកវិញច្រើនខុសពីធម្មតា បើគិតចាប់តាំងពីក្រោយពិធីបុណ្យចូលឆ្នាំថ្មីប្រពៃណីជាតិ រហូតមកទល់ នឹងពេលនេះ ។
ពលករទាំងនេះក្រោយពេលចេញពីស្នាក់ការនគរបាលអន្ដោប្រវេសន៍ច្រកទ្វារអន្ដរជាតិប៉ោយប៉ែត បានប្រាប់ថា ពួកគេបានចាកចេញពីទឹកដីខ្មែរចូលទៅទឹកដីសៀមតាម ច្រករបៀង ក្នុងស្រុកម៉ាឡៃ ។
ឯមួយចំនួន ទៀតប្រាប់ថា ពួកខ្លួនចូលទៅទឹកដីសៀម តាមច្រកបឹងត្រកួន ក្នុងស្រុកថ្មពួក និងមួយចំនួនតូចប្រាប់ថា បានឆ្លងដែនតាមច្រកឃុំ អូរបីជាន់ ស្រុកអូរជ្រៅ និងក្រុងប៉ោយប៉ែត។មន្ដ្រីនគរបាលអន្ដោប្រវេសន៍មួយរូបសុំ មិនបញ្ចេញឈ្មោះបានទទួលស្គាល់ថា ការដឹកជញ្ជូនពលករខ្មែរមកពីទឹកដីសៀម ក្រោយពីពិធីបុណ្យចូលឆ្នាំថ្មីប្រពៃណីជាតិ រហូតមកទល់ពេលនេះ ពិតជាមានចំនួនច្រើនខុសពីធម្មតាមែន ប៉ុន្ដែមន្ដ្រីរូបនេះមិនបានប្រាប់ពីចំនួនពលករដែលសមត្ថកិច្ចសៀមដឹកជញ្ជូនមកឱ្យសមត្ថកិច្ចកម្ពុជា ក្នុងមួយថ្ងៃៗថា មានចំនួនប៉ុន្មាននាក់ទេ ។ ដោយឡែកភ្ញៀវទេសចរបរទេសវិញ នៅច្រកទ្វារប៉ោយប៉ែតក្រោយពីប្រទេស ថៃជួបវិបត្ដិនយោបាយគេសង្កេតឃើញថា ការចូលមកកម្ពុជាតាមច្រកទ្វារប៉ោយប៉ែត មានការធ្លាក់ចុះយ៉ាងខ្លាំង ។
ចែករំលែកព័តមាននេះ