រាជធានីភ្នំពេញ ៖ លោកអ៊ឹង ភីរុន រដ្ឋលេខាធិការក្រសួងសុខាភិបាលបានថ្លែងថា កាលពី១០ឆ្នាំមុនអត្រាអ្នកប្រើប្រាស់ថ្នាំជក់នៅក្នុងចំណោម ប្រជាពលរដ្ឋកម្ពុជា មានចំនួន៦០ភាគរយ តែបច្ចុប្បន្នអត្រានេះបានធ្លាក់ចុះគួរឱ្យកត់សម្គាល់ គឺនៅសល់តែ៤៣,៣ភាគរយប៉ុណ្ណោះ។ លោកសង្ឃឹមថា អត្រានេះនឹងនៅតែធ្លាក់ចុះជាបន្ត
រាជធានីភ្នំពេញ ៖ លោកអ៊ឹង ភីរុន រដ្ឋលេខាធិការក្រសួងសុខាភិបាលបានថ្លែងថា កាលពី១០ឆ្នាំមុនអត្រាអ្នកប្រើប្រាស់ថ្នាំជក់នៅក្នុងចំណោមប្រជាពលរដ្ឋកម្ពុជា មានចំនួន៦០ភាគរយ តែបច្ចុប្បន្នអត្រានេះបានធ្លាក់ចុះគួរឱ្យកត់សម្គាល់ គឺនៅសល់តែ៤៣,៣ភាគរយប៉ុណ្ណោះ។ លោកសង្ឃឹមថា អត្រានេះនឹងនៅតែធ្លាក់ចុះជាបន្តទៅទៀតនៅពេលអនាគត ក្រោមការគាំទ្រពីរាជរដ្ឋាភិបាលកម្ពុជា និងបណ្តាដៃគូអភិវឌ្ឍន៍នានាដូចជាអង្គការអាដ្រាជាដើម ។
លោកអ៊ឹង ភីរុន បានថ្លែងបែបនេះ នៅខណៈពេលដែលលោកបានអញ្ជើញចូលរួមជាអធិបតីក្នុងពិធីបើកសិក្ខាសាលាចែករំលែកបទ ពិសោធន៍ គម្រោងកម្ពុជារៀបចំគោលនយោបាយស្តីពីថ្នាំជក់ ឬសុខភាពនៃអង្គការអាដ្រាកម្ពុជានៅសណ្ឋាគារភ្នំពេញ កាលពីថ្ងៃទី១៨ សីហា កន្លងមកនេះ។
លោកអ៊ឹង ភីរុន បានបន្តថា កម្មវិធីថ្នាំជក់ ឬសុខភាពគឺអង្គការអាដ្រាកម្ពុជាបានធ្វើសកម្មភាពតាំងពីឆ្នាំ១៩៩៧ ដែលបានចូលរួមចំណែកយ៉ាងសកម្មជាមួយក្រសួងសុខាភិបាលក្នុងសកម្មភាពត្រួតពិនិត្យថ្នាំជក់ ដើម្បីកាត់បន្ថយការប្រើប្រាស់ថ្នាំជក់នៅកម្ពុជា ។ ទាំងនេះគឺជាផ្នែកមួយដ៏សំខាន់ក្នុងការលើកកម្ពស់សុខភាពរបស់ប្រជាពលរដ្ឋ កាត់បន្ថយភាពក្រីក្រ និងចូលរួមអភិវឌ្ឍន៍ប្រទេសកម្ពុជាយើងនេះ ។ តាមរយៈការងារទាំងនោះ យើងក៏បានទទួលនូវបទពិសោធន៍ជាច្រើនសម្រាប់ចែករំលែកឱ្យគ្នាទៅវិញទៅមក ដូចដែលអង្គការអាដ្រាកំពុងរៀបចំឱ្យមានសិក្ខាសាលាចែករំលែកបទពិសោធន៍របស់ខ្លួននេះឡើងយ៉ាងដូច្នោះដែរ តាមរយៈគម្រោងកម្ពុជារៀបចំគោលនយោបាយស្តីពីថ្នាំជក់ ឬសុខភាព ដែលមានចុះអនុស្សរណៈនៃការយោគយល់គ្នាជាមួយនឹងក្រសួងសុខាភិបាលកាលពីឆ្នាំ២០០៦ ។
លោកអ៊ឹង ភីរុន បញ្ជាក់ថា បើនិយាយពីសកម្មភាពត្រួតពិនិត្យថ្នាំជក់នៅកម្ពុជា ក្រសួងសុខាភិបាលក្រោមការគាំទ្រពីរាជរដ្ឋាភិបាលកម្ពុជា ដែលមានសម្តេចអគ្គមហាសេនាបតីតេជោ ហ៊ុន សែន និងបណ្តាដៃគូអភិវឌ្ឍន៍នានាដូចជាអង្គការសុខភាពពិភពលោក អង្គការអាដ្រាកម្ពុជា និងអង្គការដទៃទៀត បានសម្រេចសមិទ្ធផលសំខាន់ៗនានា ដូចជាបានបង្កើតគណៈកម្មការអន្តរក្រសួង ដើម្បីអប់រំ និងកាត់បន្ថយការប្រើប្រាស់ថ្នាំជក់ដោយមានក្រសួងចំនួន១១ និងអាជ្ញាធរជាតិប្រយុទ្ធប្រឆាំងគ្រឿងញៀនជាសមាជិក និងបានបង្កើតលេខាធិការដ្ឋានអនុសញ្ញាស្តីពីការត្រួតពិនិត្យថ្នាំជក់ អនុក្រឹត្យចំនួនពីរ ១-អនុក្រឹត្យស្តីពីការបោះពុម្ពសារព្រមានសុខភាពលើកញ្ចក់បារី និង២-អនុក្រឹត្យស្តីពីវិធានការហាមការផ្សព្វផ្សាយពាណិជ្ជកម្មថ្នាំជក់។ មិនត្រឹមតែប៉ុណ្ណោះ ព្រះរាជាណាចក្រកម្ពុជារបស់យើង បានផ្តល់សច្ចាប័នលើអនុសញ្ញាត្រួតពិនិត្យថ្នាំជក់ កាលពីថ្ងៃទី១១ វិច្ឆិកា ឆ្នាំ២០០៥ កន្លងទៅ ។ ដោយឡែកអត្រាប្រើប្រាស់ថ្នាំជក់ក្នុងចំណោមប្រជាពលរដ្ឋកម្ពុជាធ្លាក់ចុះគួរកត់សម្គាល់ ពោលគឺបច្ចុប្បន្នអត្រាប្រើប្រាស់ថ្នាំជក់នៅសល់តែ៤៣,៣% បើប្រៀបធៀបកាលពី១០ឆ្នាំមុខជាង៦០% ។ ហើយយើងសង្ឃឹមថា អត្រានៃការប្រើប្រាស់ថ្នាំជក់នេះ នឹងថយចុះបន្ថែមទៀតនាពេលខាងមុខ ដោយសារមានការគាំទ្រពីសំណាក់រាជរដ្ឋាភិបាល និងបណ្តាដៃគូអភិវឌ្ឍន៍នានាដូចជាអង្គការអាដ្រាកម្ពុជាជាដើម ។
ជាចុងក្រោយលោកអ៊ឹង ភីរុន បានមានប្រសាសន៍ថា សិក្ខាសាលា «ចែករំលែកបទពិសោធន៍» គម្រោងកម្ពុជារៀបចំគោលនយោបាយស្តីពីថ្នាំជក់ ឬសុខភាពរបស់អង្គការអាដ្រាកម្ពុជា នាថ្ងៃនេះ លោកយល់ឃើញថា វាមានសារសំខាន់ខ្លាំងណាស់។ ដូច្នេះលោកសូមអំពាវនាវដល់ឯកឧត្តម លោកជំទាវ លោក លោកស្រី អ្នកនាង កញ្ញា ទាំងអស់ សូមជួយចូលរួមពិភាក្សា ឬប្រសិនបើមានអាចចែករំលែកនូវបទពិសោធន៍ល្អៗ និងជួយផ្តល់ជាមតិស្ថាបនារបស់ខ្លួនដល់អង្គការអាដ្រា ដើម្បីយកទៅអភិវឌ្ឍន៍យុទ្ធសាស្ត្ររបស់ខ្លួនឱ្យកាន់តែប្រសើរឡើង សំដៅកាត់បន្ថយការប្រើប្រាស់ថ្នាំជក់នៅកម្ពុជា។ ប្រសិនបើឯកឧត្តម លោកជំទាវ លោក លោកស្រី នាងកញ្ញា យល់ថា បទពិសោធន៍ដែលគម្រោងនេះមានជាបទពិសោធន៍ល្អ ហើយអាចអនុវត្តបាននោះ សូមយកទៅអនុវត្តបន្តក្នុងស្ថាប័នរបស់ខ្លួន ដើម្បីរួមចំណែកក្នុងសកម្មភាពត្រួតពិនិត្យថ្នាំជក់ ៕
ចែករំលែកព័តមាននេះ