រាជធានីភ្នំពេញ ៖ នៅរសៀលថ្ងៃទី២ ខែកុម្ភៈ ឆ្នាំ២០១១ គណៈកម្មការចំរុះខណ្ឌដូនពេញដឹកនាំដោយលោកហែម ឫទ្ធី នាយករងរដ្ឋបាលខណ្ឌបានទៅបិទផ្ទះសំណាក់សូរិយាផ្កាយ៩ ស្ថិតនៅសង្កាត់ផ្សារថ្មីទី២ ឱ្យផ្អាកធ្វើអាជីវកម្ម បណ្តោះអាសន្ន ក្រោយពីនគរបាលប៉ុស្តិ៍រដ្ឋបាលផ្សារថ្មីទី២ ឃាត់ខ្លួនយុវជនចំនួនបីនាក់ ប្រើប្រាស់ថ្នាំញៀននៅទីនោះ ។
លោកហែម ឫទ្ធី នាយករងរដ្ឋបាលសាលាខណ្ឌដូនពេញអោយដឹងថា សាលាខណ្ឌដូនពេញបានចេញសេចក្តីសំរេចចុះថ្ងៃទី២ ខែកុម្ភៈ ឆ្នាំ២០១១ បិទអាជីវកម្មផ្ទះសំណាក់យីហោសូរិយាផ្កាយ៩ជាការព្រមានដោយមូលហេតុជាប់ពាក់ព័ន្ធករណីប្រើប្រាស់គ្រឿងញៀន និងមិនបានកត់ត្រាឈ្មោះភ្ញៀវចូលមកស្នាក់នៅក្នុងសៀវភៅកត់ត្រាអត្តសញ្ញាណភ្ញៀវ ដែល សាលារាជធានីភ្នំពេញបានកំណត់ ។
កាលពីថ្ងៃទី២៦ កុម្ភៈ ឆ្នាំ២០១១ វេលាម៉ោង៧ និង៣០នាទីយប់នគរបាលប៉ុស្តិ៍រដ្ឋបាលផ្សារថ្មីទី២ ខណ្ឌដូនពេញ បានឆ្មក់ចូលក្នុងផ្ទះសំណាក់សូរិយាផ្កាយ៩ឃាត់ខ្លួនយុវជនចំនួនបីនាក់ និងដកហូតសំភារប្រើប្រាស់ថ្នាំញៀនក្រាមពណ៌សមួយកញ្ចប់តូច ក៏ប៉ុន្តែយុវជនទាំងនោះត្រូវសាលាដំបូងរាជធានីភ្នំពេញដោះលែងកាលពីព្រឹកថ្ងៃទី២ កុម្ភៈ ឆ្នាំ២០១១ ៕
ចែករំលែកព័តមាននេះ