ក្រុងប៉ោយប៉ែត ៖ កាលពីវេលាម៉ោង៤រសៀលថ្ងៃទី៣០ មីនា សមត្ថកិច្ចចម្រុះរួមជាមួយស្ថាប័នជំនាញកាំកុងត្រូលនិងស្ថាប័នតុលាការផង បានចុះបង្ក្រាបទីតាំងផលិតទឹកបរិសុទ្ធ មួយកន្លែងដែលគ្មានច្បាប់អនុញ្ញាតត្រឹមត្រូវនៅក្នុងភូមិក្បាលស្ពាន សង្កាត់ប៉ោយប៉ែត ក្រុងប៉ោយប៉ែត និងមានចម្ងាយប្រមាណ២០០ម៉ែត្រពីទីស្នាក់ការសាខាកាំកុងត្រូលច្រកប៉ោយប៉ែត ។ ប្រតិបត្តិការនេះដឹកនាំកម្លាំងដោយលោកវរសេនីយ៍ទោ យឹម ប្រសិទ្ធ មន្ត្រីនគរបាលប្រឆាំងបទល្មើសសេដ្ឋកិច្ចក្រសួងមហាផ្ទៃ លោកវរសេនីយ៍ត្រីចាប សុផារិទ្ធ ប្រធានការិយាល័យប្រឆាំងបទល្មើសសេដ្ឋកិច្ចខេត្ត លោកអ៊ុត សុភាព ប្រធានសាខាកាំកុងត្រូលខេត្ត លោកឡុង ជាប ព្រះរាជអាជ្ញារងអមសាលាដំបូងខេត្តព្រមទាំងមន្ត្រីសមត្ថកិច្ចពាក់ព័ន្ធក្នុងក្រុងមួយចំនួនទៀត ។
ទីតាំងផលិតទឹកបរិសុទ្ធមួយកន្លែងនេះមានម្ចាស់ឈ្មោះនុត ឱក ជាមន្ត្រីប៉ូលិសអន្តោប្រវេសន៍ ប្រពន្ធឈ្មោះញាន រ៉ែម អាយុ៥២ឆ្នាំ ហើយប្រតិបត្តិការនេះក៏បានទទួលរងនូវការតវ៉ាពីសំណាក់ប្តី-ប្រពន្ធជាម្ចាស់ទីតាំងផងដែរ ។ ម្ចាស់ទីតាំងបានលើកហេតុផលថា កន្លែងផលិតទឹកបរិសុទ្ធរបស់ពួកគាត់ពុំមានធ្វើឡើងជាលក្ខណៈទ្រង់ទ្រាយធំទេគឺធ្វើនៅក្នុងលំនៅឋានតែប៉ុណ្ណោះ ហើយកន្លងមកពួកគាត់បានទៅសុំច្បាប់ដល់សាលាខេត្តដែរតែអត់បានអនុញ្ញាតឱ្យទេដោយគ្រាន់តែប្រាប់ថា ធ្វើក៏ធ្វើទៅចាំដល់ថ្ងៃណាគេបិទនោះគេនឹងប្រាប់ដំណឹងឱ្យបានដឹងជាមុន ។
ពួកគាត់ទាំង២នាក់ប្តីប្រពន្ធបានបញ្ជាក់ថា ចំពោះការផលិតទឹកបរិសុទ្ធនេះគឺមានរយៈពេលជាង១ឆ្នាំមកហើយដោយមានម៉ាស៊ីនចម្រោះយ៉ាងត្រឹមត្រូវដែលពួកគាត់បានចំណាយថវិកាទិញឧបករណ៍ចម្រោះទឹកធុនតូចទាំងនេះអស់ប្រមាណជាង១០ម៉ឺនបាត ដើម្បីយកមកផលិតទឹកបរិសុទ្ធឱ្យមានអនាម័យ ។ គាត់បញ្ជាក់ថា ទឹកបរិសុទ្ធរបស់គាត់លក់មានតម្លៃថោកជាងទឹកបរិសុទ្ធនាំចូលពីប្រទេសសៀម គឺលក់ក្នុង១ប៊ីដុងតូចតម្លៃតែ១.០០០រៀលប៉ុណ្ណោះ ។ ពួកគាត់និយាយថា បើចង់បិទកន្លែងផលិតទឹកបរិសុទ្ធរបស់ពួកគាត់គឺត្រូវបិទឱ្យអស់ ពីព្រោះការផលិតទឹកបរិសុទ្ធបែបនេះមិនមែនមានតែពួកគាត់ទេ នៅក្រុងប៉ោយប៉ែតនេះគឺមានច្រើនកន្លែងទៀត ។
លោកអ៊ុត សុភាព ប្រធានសាខាកាំកុងត្រូលខេត្តបានឱ្យដឹងថា ចំពោះកន្លែងផលិតទឹកបរិសុទ្ធនេះគឺទី១ អត់ច្បាប់ទម្លាប់ ដែលវាខុសនឹងច្បាប់រដ្ឋបាត់ទៅហើយ ។ ចំពោះការផលិតមានគុណភាពឬក៏គ្មាននោះត្រូវរង់ចាំការពិនិត្យរបស់មន្ត្រីជំនាញធ្វើកោសល្យវិច័យ ។ ឯលោកឡុង ជាប ព្រះរាជអាជ្ញារងអមសាលាដំបូងខេត្តបានថ្លែងថា ឧបករណ៍និងសំភារទាំងអស់សម្រាប់ផលិតទឹកបរិសុទ្ធនិងរបស់កែច្នៃសម្រាប់វេចខ្ចប់ទាំងអស់ គឺត្រូវធ្វើកំណត់ហេតុឃាត់ទុកជាបណ្តោះអាសន្នសិន ហើយចំពោះម្ចាស់ផ្ទះត្រូវកោះហៅឱ្យចូលខ្លួនទៅបំភ្លឺនៅឯសាលាដំបូងខេត្តនៅពេលក្រោយ ៕
ចែករំលែកព័តមាននេះ