ខេត្តពោធិ៍សាត់់ ៖ ជនសង្ស័យ៤នាក់ជាប្ដីប្រពន្ធនិងជាបងថ្លៃប្អូនថ្លៃនឹងគ្នាត្រូវសមត្ថកិច្ចឃាត់ខ្លួនបញ្ជូនទៅកាន់សាលាដំបូងខេត្តបន្ទាប់ពីឆែកឆេរក្នុងលំនៅដ្ឋានរកឃើញថ្នាំញៀនប្រភេទយ៉ាបាពណ៌ក្រហមចំនួន១២១គ្រាប់កន្លះ កាលពីថ្ងៃទី៥ មីនា ។ ជនសង្ស័យទាំង៤នាក់មាន១-ឈ្មោះយិន ភាន ហៅហ៊ាន ភា ភេទប្រុស អាយុ៣២ឆ្នាំ ២-ឈ្មោះអ៊ុត តុន ភេទស្រី អាយុ៣២ឆ្នាំ ត្រូវជាប្រពន្ធ ៣-ឈ្មោះអ៊ឹម ខុន ភេទប្រុស អាយុ៤៨ឆ្នាំ និង៤-ឈ្មោះអ៊ុត តាក់ ភេទស្រី អាយុ៣៧ឆ្នាំជាប្រពន្ធ។ ទាំង៤នាក់ជាបងថ្លៃប្អូនថ្លៃនឹងគ្នារស់នៅភូមិរវៀងឃុំសំរោងស្រុកភ្នំក្រវាញខេត្តពោធិ៍សាត់ ។
តាមប្រភពពីលោកអនុសេនីយ៍ឯកសូ សាហុង អធិការរងនគរបាលស្រុកភ្នំក្រវាញទទួលបន្ទុកការងារយុត្តិធម៌ឱ្យដឹងថា ជនសង្ស័យទាំង៤នាក់ខាងលើគឺជាមុខសញ្ញាជួញដូរថ្នាំញៀនដែលសមត្ថកិច្ចតាមស៊ើបអង្កេតរកភស្តុតាងដើម្បីដាក់បន្ទុកជាយូរមកហើយ។ កន្លងមកពួកគេមិនសូវនៅផ្ទះជាប់លាប់ទេចេញ-ចូលៗដូចអំពិលអំពែក ប៉ុន្តែលើកនេះឃើញនៅយូរ ភ្នាក់ងារបានរាយការណ៍មកសមត្ថកិច្ចហើយក៏សុំយោបល់ពីលោកស្នងការនគរបាលខេត្តដើម្បីសុំដីកាពីលោកព្រះរាជអាជ្ញាអមសាលាដំបូងខេត្ត ទើបនៅថ្ងៃទី៥ មីនា សមត្ថកិច្ចចុះទៅឆែកឆេរក្នុងលំនៅដ្ឋានជនសង្ស័យ រកឃើញថ្នាំញៀនប្រភេទយ៉ាបាចំនួន១២១គ្រាប់កន្លះពណ៌ក្រហមដាក់ក្នុងដបជរ័ដែលគេលាក់ទុកកប់ក្នុងដីក្រោមផ្ទះ។ បន្ទាប់ពីរកឃើញវត្ថុតាងហើយ សមត្ថកិច្ចក៏ធ្វើការឃាត់ខ្លួនជនសង្ស័យប្ដីប្រពន្ធទាំងពីរគូរនេះតែម្ដង។ នៅ ចំពោះមុខសមត្ថកិច្ចជនសង្ស័យឈ្មោះអ៊ឹម ខុន ប្រពន្ធឈ្មោះអ៊ុត តាក់ ជាបងថ្លៃបានបដិសេធថាខ្លួនគ្រាន់តែជាម្ចាស់ផ្ទះប៉ុណ្ណោះ ប៉ុន្តែមិនបានដឹងថាប្អូនថ្លៃរកស៊ីជួញដូរថ្នាំញៀននោះទេ ។
ចំណែកជនសង្ស័យឈ្មោះយិន ភាន ហៅហ៊ាន ភា បានសារភាពថា ខ្លួននិងប្រពន្ធបានបោះបង់មុខរបរផ្សេងហើយមករកស៊ីជួញដូរថ្នាំញៀននេះដោយសារមុខរបរនេះកាក់កបខ្លាំង។ ចាប់ពីខែតុលាឆ្នាំ២០១០ មកដល់ដើមខែមីនា ឆ្នាំ២០១១នេះខ្លួនបានចែកចាយថ្នាំញៀនចំនួន៥លើក ហើយលក់ទៅឱ្យអ្នកចូលព្រៃកាប់ឈើ អារឈើ អ្នកបើករថយន្តដឹកឈើ និងកម្មករក្រុមហ៊ុនផ្សេងៗ ដែលថ្នាំញៀនប្រភេទយ៉ាបានេះជួយមិនឱ្យងងុយដេក និងធ្វើការមិនចេះអស់កំលាំង។ ថ្នាំញៀននេះខ្លួនទិញមកពីខេត្តប៉ៃលិន និងផ្សារឡែមខេត្តបាត់ដំបង។ជនសង្ស័យទាំង៤នាក់សមត្ថកិច្ចបានកសាងសំណុំបែបបទបញ្ជូនទៅសាលាដំបូងខេត្តនារសៀលថ្ងៃទី៧ មីនានេះដើម្បីផ្ដន្ទាទោសតាមច្បាប់ ៕
ចែករំលែកព័តមាននេះ