ប្រទេសអាហ្វ្រិកខាងត្បូង ៖ ប៉ូលិសរាយការណ៍ កាលពីថ្ងៃទី២៧ កញ្ញា ថា ពួកជនប្រដាប់អាវុធបានសម្លាប់មនុស្សយ៉ាងតិច២៧នាក់ ក្នុងទីក្រុងសំខាន់២របស់អាហ្វ្រិកខាងត្បូង ។ ការវាយប្រហារដំបូង កើតមាននាវេលាម៉ោង២១ និង៣០នាទីម៉ោងក្នុងស្រុក ពេលជនប្រដាប់ដោយកាំភ្លើងវាយលុក៨នាក់ សម្រុកចូលក្នុងបាមួយ នាភាគខាងលិចក្រុងចូហាននេស្បូក ហើយបាញ់សម្លាប់មនុស្ស១៧នាក់ រួចមនុស្ស១៥នាក់រងរបួស ។ ពួកជនប្រដាប់អាវុធទាំងនេះ បានបាញ់លើបណ្ដាភ្ញៀវ ដែលកំពុងផឹកស៊ីនៅខាងក្រៅ ហើយបន្ទាប់មក សម្រុកចូលក្នុងបា និងបន្តបាញ់ទៀត ។ ក្នុងសំណោមជនរងគ្រោះដែលស្លាប់មានបុរស១៣នាក់ និងនារី៤នាក់ ។ មូលហេតុនៃការបាញ់ប្រហារនោះ នៅមិនទាន់ដឹងនៅឡើយ និងថា បណ្ដាជនសង្ស័យនៅបានដុតរថយន្ត២គ្រឿងមុនពេលគេចខ្លួន ។
កងកម្លាំងប៉ូលិសគូសបញ្ជាក់ថា ការបាញ់ប្រហារនៅក្រុងចូហាននេស្បួកនោះ ហាក់ដូចជាពួកឧក្រិដ្ឋជនឆែកឆេរលើភ្ញៀវមួយចំនួន ដោយប្លន់យកទូរស័ព្ទដៃរបស់ពួកគេ មុនពេលគេចខ្លួនតាមរថយន្ត២គ្រឿង ។ សម្រាប់ពេលនេះ មូលហេតុនៃការបាញ់ប្រហារនោះ នៅតែមិនទាន់ដឹងនៅឡើយ ។ យោងតាមប៉ូលិសថា ជនរងគ្រោះម្នាក់ក្នុងចំណោមជនរងគ្រោះទាំងនេះ ជាមនុស្សដែលគេកំពុងតាមរក សង្ស័យចូលរួមក្នុងឧប្បត្តិហេតុមួយ ដែលកើតមានក្នុងបានេះដែរ កាលពីខែមុន។ ក្នុងឧប្បត្តិហេតុកាលនោះ មានមនុស្សម្នាក់ស្លាប់ និងម្នាក់ទៀតរងរបួសក្នុងបាដដែលនេះ។ តាមប៉ូលិសថា ការបាញ់ប្រហារប្រហែលមកពីការគុំគួន។
មានការបាញ់ប្រហារមួយទៀត នៅក្នុងក្លឹបរាត្រីមួយនាទីក្រុងកាប នាវេលាម៉ោង១ និង៤៦នាទីរំលងអធ្រាត្រ ដោយពួកជនប្រដាប់អាវុធបានបាញ់លើភ្ញៀវទាំងឡាយ ។ មនុស្សប្រមាណជា១០នាក់ ត្រូវស្លាប់និង១១នាក់ទៀតរងរបួស ។ ក្នុងចំណោមអ្នកស្លាប់៥នាក់ ស្លាប់នៅនឹងកន្លែង ចំណែកអ្នកដទៃទៀត ស្លាប់ពេលបញ្ជូនទៅមន្ទីរពេទ្យ។ ក្នុងចំណោមការបាញ់ប្រហារទាំង២នោះ ពុំមានចាប់ខ្លួនមនុស្សណាម្នាក់បាននៅឡើយ ។
ការបាញ់ប្រហារទាំង២កើតមាននៅអាហ្វ្រិកខាងត្បូង ដែលការធ្វើចរាចរណ៍អាវុធ មិនអាចគ្រប់គ្រងបាន ដោយគេអាចប្រើ
កាំភ្លើងទាំងស្របច្បាប់ និងទាំងមិនស្របច្បាប់។ ការប៉ះទង្គិចគ្នា ដោយអាវុធតែងកើតមានជារឿយៗ ដោយក្រុមជនដែលប្រកួតប្រជែងគ្នាស្ថិតក្នុងក្រុមជនខិលខូច តែងមានជម្លោះក្នុងការរកស៊ីមិនស្របច្បាប់ ។ អាហ្វ្រិកខាងត្បូង ជាប្រទេសមានប្រជាជនប្រមាណជា៦២លាននាក់ គេកត់ត្រាឃើញថា គិតជាមធ្យមមានការសម្លាប់មនុស្ស៦០នាក់ក្នុង១ថ្ងៃ ៕
ចែករំលែកព័តមាននេះ