ពីរនាក់ប្ដី-ប្រពន្ធសំងំបើក«អនឡាញស្គេម»ត្រូវសមត្ថកិច្ចឆ្មក់ចូលបង្ក្រាបនិងឃាត់ខ្លួន
- បាត់ដំបង
ខេត្តបាត់ដំបង ៖ កម្លាំងសមត្ថកិច្ចបានឆ្មក់ចូលទៅបង្ក្រាបផ្ទះបើកល្បែង «ស្គេមអនឡាញ»មួយកន្លែង និងបានឃាត់ខ្លួនម្ចាស់ផ្ទះពីរនាក់ប្ដីប្រពន្ធដែលសំងំបើកល្បែងខុសច្បាប់នេះ ថែមទាំងបានដកហូតវត្ថុតាងមួយចំនួនផង កាលពីវេលាម៉ោង១១ និង៣០នាទីថ្ងៃត្រង់ថ្ងៃទី១៩ កញ្ញា នៅចំណុចភូមិគាស់ក្រឡ ឃុំគាស់ក្រឡ ស្រុកគាស់ក្រឡ ។
មន្ត្រីស្រុកគាស់ក្រឡបានឲ្យដឹងថា កម្លាំងសមត្ថកិច្ចចម្រុះនៃគណៈបញ្ជាការកងឯកភាពស្រុក បានចុះប្រតិបត្តិការបង្ក្រាបទីតាំង «អនឡាញស្គេម» នេះ ដែលម្ចាស់ផ្ទះពីរនាក់ប្ដីប្រពន្ធសំងំបើកយ៉ាងត្រជាក់ល្ហឹមតែម្ដង ។ ជាមួយនឹងកិច្ចប្រតិបត្តិការនេះ សមត្ថកិច្ចបានឃាត់ខ្លួនម្ចាស់ទីតាំងពីរនាក់ប្ដីប្រពន្ធនោះ ជាមួយនឹងវត្ថុតាងមួមចំនួនផង ត្រូវបានរឹបអូស ។
ប្រភពដដែលបានប្រាប់ថា ជនសង្ស័យពីរនាក់ប្ដីប្រពន្ធដែលត្រូវឃាត់ខ្លួនមានឈ្មោះ ឡា កុកគង់ ហៅទីទី អាយុ២៩ឆ្នាំ (ប្ដី) និងឈ្មោះ ព្រុំ សុភា អាយុ៣៧ឆ្នាំ (ប្រពន្ធ) រស់នៅក្នុងភូមិ-ឃុំកើតហេតុខាងលើ ។ ជាមួយនឹងការឃាត់ខ្លួននេះ មន្ត្រីជំនាញដកហូតវត្ថុតាងរួមមាន៖ ទូរស័ព្ទដៃចំនួន០២គ្រឿង, កុំព្យូទ័រចំនួន០២គ្រឿង, ម៉ូនីទ័រចំនួន០២គ្រឿង, ដុំហ្វាយៗចំនួន០១ និងសម្ភារពាក់ព័ន្ធមួយចំនួនទៀត ។
ពុំមានព័ត៌មានលម្អិតទេ ជុំវិញការបង្ក្រាបទីតាំងប្រព្រឹត្តល្បែង «អនឡាញស្គេម» របស់ជនសង្ស័យពីរនាក់ប្ដី-ប្រពន្ធខាងលើនេះ ។ ប៉ុន្តែមានប្រភពខ្លះបានបង្ហើបប្រាប់ថា ប្ដីប្រពន្ធនេះបានសំងំបើក «ស្គេមអនឡាញ»នេះ នៅពេល«ស្គេមអនឡាញ»ទូទាំងប្រទេសត្រូវបានបំបែក ។
ប្ដីប្រពន្ធនេះធ្លាប់មានប្រវត្តិធ្វើការងារនេះ ទើបក្រោយពេលបែកសំបុកពីរនាក់ប្ដីប្រពន្ធនេះសំងំបើកនៅផ្ទះរបស់ខ្លួន ។ ប៉ុន្តែក្រោយមក ក៏បែកធ្លាយ ត្រូវកម្លាំងសមត្ថកិច្ចស៊ើបដឹង រហូតឈានដល់ការចុះបង្ក្រាបតែម្ដង ។ ពេលនេះ កម្លាំងជំនាញនៃស្នងការខេត្តបាននិងកំពុងកសាងសំណុំរឿងចាត់ការតាមនីតិវិធីហើយ៕
ចែករំលែកព័តមាននេះ