ខេត្តព្រះវិហារ ៖ នៅក្នុងខេត្តព្រះវិហារ គឺជាមជ្ឈមណ្ឌលតំបន់ទេសចរណ៍វប្បធម៌ ធម្មជាតិ និងប្រវត្តិសាស្ត្រ មានទីតាំងបុរាណដ្ឋាន ដែលមានតំបន់ទេសចរណ៍មានចំនួន ២៨៥កន្លែង ដោយមានប្រាសាទចំនួន ២ បានចុះក្នុងបញ្ជីបេតិកណ្ឌភិភពលោក មានប្រាសាទព្រះវិហារ និងរមណីដ្ឋានប្រាសាទកោះកេរ តែនៅឆ្នាំ ២០២៥ ចំនួនភ្ញៀវទេសចរមានការថយចុះ ២៣% នេះបើតាមលោក គីម រិទ្ធី អភិ បាលខេត្តព្រះវិហារ ។
ថ្លែងប្រាប់ក្រុមអ្នកសារព័ត៌មាន នារសៀលថ្ងៃទី ៩ ខែកញ្ញា ឆ្នាំ ២០២៦ នៅសាលាខេត្តព្រះវិហារ លោកអភិបាលខេត្ត បានឲ្យដឹងថា វិស័យទេសចរណ៍នៅក្នុងខេត្តព្រះវិហារ ជាមជ្ឈមណ្ឌលទេសចរណ៍វប្បធម៌ ធម្មជាតិ និងប្រវត្តិសាស្ត្រ ដែលជាទីតាំងបុរាណដ្ឋានចំនួន ២៨៥កន្លែង ហើយបានចុះបញ្ជីបេតិកភណ្ឌពិភពលោក ចំនួន ២ គឺប្រាសាទព្រះវិហារ (ថ្ងៃទី ៧ ខែកក្កដា ឆ្នាំ ២០០៨) រមណីយដ្ឋានប្រាសាទកោះកេរ (ថ្ងៃទី ១៧ ខែកញ្ញា ឆ្នាំ ២០២៣) ព្រមទាំងមានតំបន់ប្រវត្តិសាស្ត្រ ប្រាសាទព្រះខ័ន និងរមណីយដ្ឋានវប្បធម៌ ធម្មជាតិកែច្នៃ និងសហគមន៍អេកូរទេសចរណ៍ សរុបចំនួន ១៧ទីតាំងផ្សេងទៀត ។
លោកអភិបាលខេត្ត ក៏បានឲ្យដឹងដែរថា នៅក្នុងខេត្តព្រះវិហារ មានអាជីវកម្មសេវាកម្មទេសចរណ៍ ចំនួន ១៣៨កន្លែង ក្នុងនោះមាន សសណ្ឋាគារ-អូតែល ៨ទីតាំង ផ្ទះភ្ញៀវ ៤៤ទីតាំង ផ្ទះជួលបន្ទប់ស្នាក់់នៅ ៥ទីតាំង ភោជនីយដ្ឋាន អាហារដ្ឋាន ៤៨ទីតាំង និងមគ្គុទ្ទេសទេសចរណ៍ ១២នាក់ ។ ទាក់ទិននឹងភ្ញៀវទេសចរនៅឆ្នាំ ២០២៥ មានចំនួន ៤១៧.៤៥១នាក់ មានការថយចុះ ២៣% ធៀបនឹងឆ្នាំ២០២៤ ។
សូមជម្រាបថា ខេត្តព្រះវិហារ ស្ថិតនៅភាគឧត្តរ នៃព្រះរាជាណាចក្រកម្ពុជា មានចម្ងាយប្រមាណ ៣០០គីឡូម៉ែត្រ ពីរាជធានីភ្នំពេញ តាមផ្លូវជាតិលេខ ៦A និងលេខ ៦២ មានផ្ទៃដីសរុប ១៣.៨១៩,៦៦៣គីឡូម៉ែត្រការ៉េ ។ ខេត្តព្រះវិហារ បែងចែកជា ១ក្រុង ៧ស្រុក ៤៩ឃុំ ២សង្កាត់ និង ២៣២ភូមិ និងភូមិរណបចំនួន ៣៦ភូមិ ជាប់ព្រំប្រទល់ខេត្តចំនួន ៤ មានខេត្តស្ទឹងត្រែង សៀមរាប ឧត្តរមានជ័យ កំពង់ធំ ជាប់ប្រទេសថៃ ១២៩គីឡូម៉ែត្រ និងជាប់ប្រទេសឡាវ ១៤៤គីឡូម៉ែត្រ ៕
ចែករំលែកព័តមាននេះ