អតីតយុទ្ធជនជិត២០គ្រួសារ បានទទួលផ្ទះដែលជាអំណោយសម្តេចតេជោ ហ៊ុន សែន
- បន្ទាយមានជ័យ
ខេត្តបន្ទាយមានជ័យ ៖ អតីតយុទ្ធជនចំនួន១៧គ្រួសារ ទទួលបានផ្ទះដែលជាអំណោយសម្តេចតេជោ ហ៊ុន សែន នៅថ្ងៃទី៤ ខែកញ្ញា ឆ្នាំ២០២៦ នៅមណ្ឌលតេជោសន្តិភាពការ៉េពីរ ស្ថិតភូមិប៉ោយចារ ឃុំប៉ោយចារ ស្រុកភ្នំស្រុក ។
ឯកឧត្តម អ៊ុំ រាត្រី អភិបាលខេត្តបន្ទាយមានជ័យ បានឱ្យដឹងថា អតីតយុទ្ធចំនួន១៧គ្រួសារបានចាប់ឆ្នោតទទួលផ្ទះក្នុង១គ្រួសារ១ខ្នង ដែលជាអំណោយសម្តេចតេជោ ហ៊ុន សែន ប្រធានព្រឹទ្ធសភានៃព្រះរាជាណាចក្រកម្ពុជា និងជាប្រធានសមាគមអតីតយុទ្ធជន និងនិវត្តន៍ជនកម្ពុជា និងសម្តេចធិបតី ហ៊ុន ម៉ាណែត នាយករដ្ឋមន្ត្រី នៃព្រៈរាជាណាចក្រកម្ពុជា ដែលជានិច្ចកាលតែងតែគិតគូរយកចិត្តទុកដាក់ចំពោះអតីតយុទ្ធជន។
ឯកឧត្តមបានបញ្ជាក់ថា ជាការសម្តែងដឹងគុណចំពោះវីរៈភាពរបស់អតីតយុទ្ធជនកម្ពុជា ដែលជាវីរៈដ៍ឆ្នើមបានលះបង់សាច់ស្រស់ឈាមស្រស់ការពារមាតុភូមិកម្ពុជាអស់ពីកម្លាំងកាយចិត្ត ដើម្បីទឹកដីសន្តិភាពមាតុភូមិកម្ពុជា ដែលធ្វើឱ្យខ្លះបានធ្លាក់ខ្លួនពិការ និងបាត់បង់សមាជិកគ្រួសារ។
ឯកឧត្តម អ៊ុំ រាត្រី បានបញ្ជាក់ថា ជាការតបស្នងសងគុណចំពោះវីរៈកងទ័ព ប្រមុខរាជរដ្ឋាភិបាលកម្ពុជាបានជួយឧបត្ថម្ភគ្រួសារអតីតយុទ្ធជនក្នុង១គ្រួសារ ទទួលបានដីលំនៅដ្ឋាន និងផ្ទះរស់នៅដោយសុខសន្ត ៕
ចែករំលែកព័តមាននេះ