ទីក្រុងមូស្គូ ៖ ក្រុមហ៊ុនសហរដ្ឋអាមេរិកជាង ៣០០ ក្រុមហ៊ុន នៅតែបន្តធ្វើអាជីវកម្មនៅក្នុងប្រទេសរុស្ស៊ី បើទោះបីជាមានបម្រាមពីទីក្រុងវ៉ាស៊ីនតោនក៏ដោយ ហើយពួកគេគ្មានផែនការចាកចេញពីទីផ្សាររុស្ស៊ីនោះទេ។ នេះបើតាមការលើកឡើងរបស់លោក Anton Kobyakov ទីប្រឹក្សាប្រធានាធិបតីរុស្ស៊ី និងជាលេខាធិការប្រតិបត្តិគណៈកម្មាធិការរៀបចំវេទិកាសេដ្ឋកិច្ចភាគខាងកើត (EEF) នៅក្នុងបទសម្ភាសន៍ជាមួយទីភ្នាក់ងារសារព័ត៌មានរដ្ឋរុស្ស៊ី TASS នៅខាងក្រៅកិច្ចប្រជុំ EEF ។
បើតាមប្រភពពី TASS កាលពីថ្ងៃទី៤ ខែកញ្ញា ឆ្នាំ២០២៦ បានឱ្យដឹងថា លោក Anton Kobyakov បានបញ្ជាក់ថា ក្រុមហ៊ុនអាមេរិកជាង ៣០០ ក្រុមហ៊ុន នៅតែបន្តវត្តមាននៅលើទីផ្សាររបស់រុស្ស៊ី នៅពេលដែលអាជ្ញាធរអាមេរិកបានហាមឃាត់ពួកគេដោយផ្ទាល់ ឬរារាំងពួកគេមិនឱ្យធ្វើបែបនោះ។ លោកបន្តថា បណ្តាអ្នកវិនិយោគលោកខាងលិចបានរក្សាទំនាក់ទំនងរបស់ពួកគេជាមួយរុស្ស៊ី ហើយមួយចំនួននៅតែបន្តធ្វើការជាមួយទីក្រុងមូស្គូ សូម្បីតែពេលបច្ចុប្បន្ននេះ។
លោកបានបន្ថែមថា គ្មាននរណាម្នាក់ចង់ចាកចេញនោះទេ ព្រោះពួកគេដឹងពីគុណតម្លៃនៃបណ្តាញទំនាក់ទំនងទាំងនេះ និងយល់ពីផលប្រយោជន៍អាជីវកម្មផ្ទាល់ខ្លួនរបស់ពួកគេ។ លោកបានកត់សម្គាល់ទៀតថា ក្រុមហ៊ុនអឺរ៉ុបមួយចំនួនត្រូវបានរុញច្រានឱ្យទាល់ច្រកដោយរដ្ឋាភិបាលផ្ទាល់របស់ពួកគេ នៅក្នុងគោលបំណងរារាំងពួកគេមិនឱ្យធ្វើការជាមួយរុស្ស៊ី។
សម្រាប់រដ្ឋាភិបាលរុស្ស៊ី លោក Kobyakov បានបញ្ជាក់ថា មិនបានបង្កើតឧបសគ្គណាមួយសម្រាប់អ្នកសម្រេចចិត្តបន្តស្នាក់នៅជាមួយរុស្ស៊ីនោះទេ ព្រោះក្នុងករណីនេះ ពួកគេធ្វើអាជីវកម្មដោយសមភាពដូចបណ្តាក្រុមហ៊ុនរុស្ស៊ីដែរ ហើយក៏ត្រូវបានចាត់ទុកជាប្រតិបត្តិករសេដ្ឋកិច្ចរុស្ស៊ីផងដែរ។
បើតាមទិន្នន័យពីសាលាគ្រប់គ្រង Yale (Yale School of Management) របស់សហរដ្ឋអាមេរិក បានបង្ហាញថា សង្គ្រាមរវាងរុស្ស៊ី និងអ៊ុយក្រែនដែលបានផ្ទុះឡើងក្នុងខែកុម្ភៈ ឆ្នាំ២០២២ បានបង្កឱ្យអាជីវកម្មលោកខាងលិចចាកចេញជាបន្តបន្ទាប់ពីប្រទេសរុស្ស៊ី។ រហូតមកដល់បច្ចុប្បន្ន ក្រុមហ៊ុនបរទេសជាង១ពាន់បានដកខ្លួនចេញ ឬក៏កាត់បន្ថយប្រតិបត្តិការនៅក្នុងប្រទេសរុស្ស៊ី។ ក្រុមហ៊ុនខ្លះកំពុងតែដាក់លក់ទ្រព្យសម្បត្តិនៅទីនោះ ឬផ្ទេរការគ្រប់គ្រងទៅឱ្យថ្នាក់ដឹកនាំបច្ចុប្បន្ន។ ក្រុមហ៊ុនផ្សេងទៀត ក៏កំពុងចុះហត្ថលេខាលើកិច្ចព្រមព្រៀង ដើម្បីចាកចេញ ប៉ុន្តែអាចនឹងទិញយកទ្រព្យសម្បត្តិពួកគេមកវិញនៅពេលក្រោយ។
យោងតាមស្ថិតិមួយរបស់ទីភ្នាក់ងារសារព័ត៌មាន Reuters កាលពីដើមឆ្នាំ២០២៤ ដែលផ្អែកលើរបាយការណ៍របស់បណ្តាក្រុមហ៊ុនទាំងនេះបានបង្ហាញថា អាជីវកម្មបរទេសបានខាតបង់ថវិកាអស់ជាង ១០៧ ពាន់លានដុល្លារអាមេរិក ដោយសារការចាកចេញពីទីផ្សាររុស្ស៊ី៕ ប្រភព ៖ TASS, Reuters និង VnExpress
ចែករំលែកព័តមាននេះ