ទីក្រុងវ៉ាស៊ីនតោន៖ ប្រធានាធិបតី​អាម៉េរិក លោក ដូណាល់ ត្រាំ បាននិយាយថា កងទ័ព​អាម៉េរិកអាចវាយប្រហារទីតាំង​រោងចក្រចម្រាញ់សារធាតុអ៊ុយរ៉ាញ៉ូម​របស់អ៊ីរ៉ង់ ក្នុងពេលឆាប់ៗនេះ។ លោកអះអាងថា ទីតាំងក្រោមដីនេះជាកន្លែងដែល​អាម៉េរិកជឿថា អ៊ីរ៉ង់បានផ្លាស់ទីស្តុកអ៊ុយរ៉ាញ៉ូមចម្រាញ់កម្រិតខ្ពស់មួយចំនួនទៅរក្សាទុក។ នេះបើយោងតាមការចុះផ្សាយរបស់សារព័ត៌មាន ស៊ីនហួ នៅថ្ងៃទី៥ ខែកញ្ញា ឆ្នាំ២០២៦។

លោក ត្រាំ បាននិយាយថា «យើងអាចវាយប្រហារទីតាំងនុយក្លេអ៊ែរអ៊ីរ៉ង់ឆាប់ៗនេះ» ខណៈពេលជាមួយគ្នា លោកព្យាយាមបន្ថយភាពធ្ងន់ធ្ងរនៃជម្លោះជាមួយអ៊ីរ៉ង់ ដោយហៅវាថាជា «ជម្លោះយោធា» មិនមែនសង្គ្រាម ហើយអះអាងថា ស្ថានការណ៍មានលក្ខណៈជាបន្តបន្ទាប់ និងការវាយប្រហារកើតឡើងជាចន្លោះៗ។ លោកថែមទាំងចាត់ទុកជម្លោះនេះថា «ជារឿងតូចតាច» សម្រាប់សហរដ្ឋ​អាម៉េរិក។

បើតាម CNN កងកម្លាំង​អាម៉េរិកបានវាយប្រហារគោលដៅអ៊ីរ៉ង់ជិត ៦០ទីតាំង នៅតំបន់ជុំវិញច្រកសមុទ្រ Hormuz ក្នុងសប្តាហ៍នេះ ដោយផ្តោតលើទីតាំងការពារដែនអាកាស ប្រព័ន្ធរ៉ាដា សមត្ថភាពដាក់មីន និងមជ្ឈមណ្ឌលទំនាក់ទំនង។ កាលពីយប់ថ្ងៃអង្គារ ការវាយប្រហាររបស់​អាម៉េរិកមួយនៅស្រុក Sirik ខេត្ត Hormozgan ត្រូវបានសារព័ត៌មានរដ្ឋអ៊ីរ៉ង់រាយការណ៍ថា បានសម្លាប់មនុស្សយ៉ាងហោចណាស់ ៥នាក់ និងធ្វើឱ្យមនុស្សជាង ៦០នាក់រងរបួស។

ជាមួយគ្នានេះ លោក ត្រាំ កាលពីថ្ងៃពុធ បានព្រមានថា ​អាម៉េរិកអាចបើកការវាយប្រហារបន្ថែមលើអ៊ីរ៉ង់ «គ្រប់ពេលដែលយើងចង់»។ សហរដ្ឋ​អាម៉េរិក និងអ៊ីស្រាអែល បានចាប់ផ្តើមការវាយប្រហារយោធាទ្រង់ទ្រាយធំលើអ៊ីរ៉ង់ កាលពីថ្ងៃទី២៨ ខែកុម្ភៈ ដែលបណ្តាលឱ្យមនុស្សរាប់ពាន់នាក់ស្លាប់ និងធ្វើឱ្យជម្លោះនៅមជ្ឈិមបូព៌ាកាន់តែតានតឹង៕