ចំណេះដឹង៖ យោងតាមការចុះផ្សាយពីប្រភពបរទេស កណ្ដុរមានប្រព័ន្ធក្លិនខ្លាំង ដូច្នេះក្លិនខ្លាំងពីរុក្ខជាតិមួយចំនួន អាចធ្វើឱ្យវាមិនសូវចង់ចូលមកក្បែរផ្ទះ ឬសួន។ រុក្ខជាតិ ៣ ប្រភេទដែលអាចយកមកប្រើជាវិធីជំនួយមាន ខ្ទឹមស ខ្ទឹមបារាំង និងផ្កាឡាវិនឌ័រ។

ខ្ទឹមស មានក្លិនខ្លាំងដែលកណ្ដុរមិនសូវចូលចិត្ត។ អាចដាំខ្ទឹមសនៅក្នុងសួន ឬដាក់មើមខ្ទឹមសនៅក្បែរកន្លែងដែលកណ្ដុរតែងបង្ហាញខ្លួន ដើម្បីជួយធ្វើឱ្យតំបន់នោះមិនសូវទាក់ទាញសម្រាប់វា។

ខ្ទឹមបារាំង ក៏មានក្លិនខ្លាំង និងអាចប្រើជាវិធីជំនួយដើម្បីរំខានកណ្ដុរ។ អាចដាំនៅជុំវិញសួន ឬកាត់ខ្ទឹមបារាំងស្រស់ជាបន្ទះ ហើយដាក់នៅតំបន់ខាងក្រៅផ្ទះដែលកណ្ដុរតែងឆ្លងកាត់។ ប៉ុន្តែគួរផ្លាស់ប្តូរជាប្រចាំ ព្រោះវាអាចខូចបានលឿន។

ផ្កាឡាវិនឌ័រ មានក្លិនក្រអូបសម្រាប់មនុស្ស ប៉ុន្តែក្លិនខ្លាំងរបស់វាអាចធ្វើឱ្យកណ្ដុរមិនសូវចង់ចូលក្បែរ។ អាចដាំជុំវិញផ្ទះ ឬតាមព្រំសួន ដើម្បីជួយរំខានកណ្ដុរ។

ទោះជាយ៉ាងណា រុក្ខជាតិទាំងនេះគួរត្រូវបានចាត់ទុកថា ជាវិធីជំនួយប៉ុណ្ណោះ មិនមែនជាវិធីកម្ចាត់កណ្ដុរដែលមានប្រសិទ្ធភាព ១០០% ទេ។ ប្រសិនបើកណ្ដុរមានច្រើន គួររក្សាអាហារឱ្យបានល្អ បិទធុងសំរាម និងបិទរន្ធ ឬច្រកដែលកណ្ដុរអាចចូលផ្ទះបាន៕