ទីក្រុងកាត់ត្មាន់ឌូ៖ ទោះបីអត់អាហារ និងទឹករយៈពេល៩ថ្ងៃយ៉ាងណាក្ដី ប៉ុន្តែជីវិតថ្លៃ ពួកគេត្រូវបន្តជីវិតរស់នៅ។ ថ្ងៃនេះ ក្រុមអ្នកជួយសង្គ្រោះនៅប្រទេសនេប៉ាល់ប្រទះឃើញមនុស្ស២នាក់នៅក្នុងរូងក្រោមដីនៃគម្រោងសាងសង់ទំនប់វារីអគ្គិសនីនៅតាមដងទន្លេទ្រីស៊ូលី (Trishuli)។ ពោលគឺមានរយៈពេល៩ថ្ងៃគត់ចាប់តាំងពីមានព្រឹត្តិការណ៍បាក់ផ្ទាំងទឹកកក ថ្ម និងដីភក់គ្រប់សង្កត់តំបន់ជ្រលងភ្នំ។ អាជ្ញានៅតែរកឃើញសាកសពជនរងគ្រោះជាបន្តបន្ទាប់ ដូច្នេះ ធ្វើឱ្យចំនួនអ្នកស្លាប់សរុបកើនឡើងដល់ជាង១៣០០នាក់។ ចំណែកមនុស្សជាង៥៦០០នាក់ទៀតនៅតែបន្តបាត់ខ្លួន។
មន្ត្រីរដ្ឋាភិបាលនេប៉ាល់ និងក្រុមអ្នកជយយសង្គ្រោះជឿជាក់ថាហេតុការណ៍បាក់ផ្ទាំងទឹកកកកាលពីថ្ងៃទី២៦ ខែសីហានោះបានបិទខ្ទប់មនុស្សយ៉ាងតិច៩០០នាក់មិនឱ្យចេញមកខាងក្រៅរូងក្រោមដីបានឡើយ។ ពួកគេបម្រើការនៅក្នុងគម្រោងសាងសង់ទំនប់វារីអគ្គិសនីធំៗចំនួន៦កន្លែងតាមដងទន្លេ។ អ្នកទាំង២នោះជាមនុស្សដំបូងបង្អស់ដែលត្រូវគេជួយសង្គ្រោះចេញពីរូងក្រោមដី។ ពួកគេត្រូវបានដឹកជញ្ជូនទៅកាន់មន្ទីរពេទ្យយោធាមួយកន្លែងនៃរដ្ឋធានីកាត់ត្មាន់ឌូ។ ការរកឃើញនេះផ្ដល់ជាក្ដីសង្ឃឹមសម្រាប់ក្រុមអ្នកជួយសង្គ្រោះថាទៅថ្ងៃមុខ ពួកគេអាចនឹងរកឃើញអ្នកបាត់ខ្លួនដទៃទៀត។ ប៉ុន្តែឱកាសកាន់តែមានតិចតួចទៅៗដោយសារពេលវេលាចេះតែកន្លងផុតទៅជាយូរថ្ងៃ។ យោធានេប៉ាល់អះអាងថាពួកគេក៏បានរកឃើញសាកសពជនរងគ្រោះម្នាក់ផងដែរនៅក្នុងរូងក្រោមដី។
តាមរយៈវីឌីអូឃ្លីបដែលថតបានពីកន្លែងកើតហេតុ គេឃើញបុរសម្នាក់ឈ្មោះខាបៀ មហាចាន់ (Kabir Maharjan) ត្រូវគេទាញចេញពីរូងក្រោមដី និងឃើញហ្វូងមនុស្សដែលឈរក្បែរនោះទះដៃអបអរសាទរ។ បន្ទាប់មក គាត់ត្រូវគេលើកដាក់ទៅលើប្រង់កាដើម្បីដឹកទៅមន្ទីរពេទ្យ។ សហការីរួមការងាររបស់គាត់ម្នាក់ឈ្មោះសញ្ជ័យ សា (Sanjay Sah) ត្រូវគេលីដាក់នៅលើស្មាចេញមកខាងក្រៅ។ ផ្ទៃមុខរបស់គាត់ប្រឡាក់សុទ្ធតែភក់។ បន្ទាប់មក គ្រូពេទ្យក៏បំពាក់ម៉ាស់អុកស៊ីហ្សែន និងពិនិត្យមើលប្រព័ន្ធរាងកាយរបស់គាត់។ លោកសាជាបុគ្គលិកបម្រើការខាងមេកានិច។ គាត់ប្រាប់ថាគាត់ស្នាក់នៅក្នុងបន្ទប់គ្រប់គ្រង-បញ្ជាដើម្បីជួយរំដោះអ្នកដទៃទៀតឱ្យចាកចេញពីរូងក្រោមដីបន្ទាប់ពីស្ដាប់ឮថាមានឧបទ្ទវហេតុបាក់ផ្ទាំងទឹកកក។
លោកសាប្រាប់ក្រុមអ្នកជួយសង្គ្រោះថានៅពេលគាត់ជាប់ផុងនៅក្នុងរូងក្រោមដីនោះ គាត់បានចំណាយពេលសូត្រធម៌បន់ស្រន់ នឹកដល់គុណម្ចាស់ទឹកម្ចាស់ដីសូមជួយថែរក្សា។ គាត់ប្រាប់បន្តទៀតថាគាត់អាចទាក់ទងជាមួយមនុស្សបី ឬបួននាក់ទៀតនៅក្នុងរូងក្រោមដី។ ក្រុមអ្នកជួយសង្គ្រោះអាចនឹងរកឃើញអ្នកនៅរស់ជាច្រើនទៀតនៅពេលពួកគេធ្វើដំណើរកាន់តែជ្រៅចូលទៅក្នុងរូងនោះ។ នៅប៉ែកខាងនេប៉ាល់ ក្រុមយោធាអះអាងថាគេរកឃើញអ្នកស្លាប់សរុប១២៨៧នាក់។ ចំណែកនៅតំបន់ទីបេ ប្រទេសចិន គេរកឃើញអ្នកស្លាប់សរុប២១នាក់ ខណៈដែលមនុស្ស៥៤១នាក់ទៀតបន្តបាត់ខ្លួន។ ការរកឃើញអ្នកទាំង២នៅរស់រានមានជីវិតក្រោយពេលជាប់ផុងរយៈពេល៩ថ្ងៃមកហើយនោះត្រូវគេចាត់ទុកថាអព្ភូតហេតុដែលមិននឹកស្មានដល់។ លោកខាបៀ មហាចាន់មិនអាចកម្រើកដៃ និងជើងរបស់គាត់បានទេ។ ចំណែករបួសរបស់លោកសញ្ជ័យ សាត្រូវគេគិតថាមិនធ្ងន់ធ្ងរពេកទេ៕ ប្រភព៖ Reuters
ចែករំលែកព័តមាននេះ