ទីក្រុងវ៉ាស៊ីនតោន៖ លោកដូណាល់ត្រាំអះអាងថាសង្គ្រាមអ៊ីរ៉ង់ជួយអង់គ្លេសឱ្យរួចចាកផុតពីការវាយប្រហារដោយអាវុធនុយក្លេអ៊ែរ។ ជាថ្មីម្ដងទៀត លោកចាប់ផ្ដើមនិយាយវាយប្រហារអង់គ្លេសដែលមិនព្រមជួយជ្រោមជ្រែងអាមេរិកនៅក្នុងសង្គ្រាមនេះ។ នៅក្នុងបទសម្ភាសជាមួយប្រព័ន្ធផ្សព្វផ្សាយជីប៊ី ញូស៍ (GB News) របស់អង់គ្លេស លោកត្រាំឱ្យជាតម្រុយថាបើទៅថ្ងៃមុខ អាហ្សង់ទីនវាយលុកចូលកោះហ្វកលេន (Falkland) លោកនឹងមិនជួយអង់គ្លេសទេ។ ធ្វើបែបនេះដើម្បីឆ្លើយតបដូចអ្វីដែលអង់គ្លេសធ្វើដាក់អាមេរិកនៅក្នុងសង្គ្រាមអ៊ីរ៉ង់។ លោកអះអាងថាលោកកំពុងជួយសង្គ្រោះអង់គ្លេសពីការគំរាមកំហែង។ បើបណ្ដោយឱ្យអ៊ីរ៉ង់ផលិតអាវុធនុយក្លេអ៊ែរបានសម្រេច ពេលនោះពួកគេទំនងជាបាញ់ដាក់ទ្វីបអឺរ៉ុបមុនគេជាជាងបាញ់ដាក់អាមេរិកព្រោះមីស៊ីលរបស់ពួកគេអាចហោះទៅដល់ទីនោះ។
ខ្ញុំកំពុងជួយស្រោចស្រង់ប្រទេសជាតិរបស់អ្នកឱ្យចាកផុតពីបញ្ហាធំព្រោះពួកគេ (អ៊ីរ៉ង់) នឹងប្រើប្រាស់អាវុធនេះ។ នៅពេលជម្លោះបូរណភាពទឹកដីកាន់តែរីកធំឡើងសាជាថ្មីរវាងអង់គ្លេស និងអាហ្សង់ទីនដើម្បីដណ្ដើមកាន់កាប់ប្រជុំកោះហ្វកលេន លោកត្រាំឆ្លៀតឱកាសនេះវាយបកចំពោះអង់គ្លេសពីបទដែលពួកគេមិនបានជួយជ្រោមជ្រែងទាល់តែសោះនៅក្នុងសង្គ្រាមអ៊ីរ៉ង់។ លោកថាប្រទេសរបស់អ្នកមិនបានជួយយើងទាល់តែសោះ។ កាលពីប៉ុន្មានថ្ងៃមុននេះ លោកអះអាងថារដ្ឋាភិបាលរបស់លោកចាប់ផ្ដើមពិចារណាជាថ្មីថាតើត្រូវប្រកាន់គោលជំហរបែបណាចំពោះសិទ្ធិគ្រប់គ្រងប្រជុំកោះហ្វកលេនពីសំណាក់ចក្រភពអង់គ្លេស។
តាំងពីដំបូងដៃមកម៉្លេះ អង់គ្លេសបដិសេធមិនចូលខ្លួនពាក់ព័ន្ធនៅក្នុងយុទ្ធនាការរបស់អាមេរិក និងអ៊ីស្រាអែលដើម្បីវាយប្រហារប្រទេសអ៊ីរ៉ង់ទេ។ ពោលគឺជំហរនេះប្រកាន់យកតាំងពីជំនាន់លោកខៀស្តាមើកាន់តំណែងជានាយករដ្ឋមន្ត្រីអង់គ្លេស។ ក្រោយមក លោកស្តាមើយល់ព្រមគាំទ្រអាមេរិកក្នុងការការពារខ្លួនទល់នឹងវាយប្រហារដោយមីស៊ីលរបស់អ៊ីរ៉ង់ទៅលើគោលដៅមួយចំនួនដូចជាទីតាំងដាក់ជើងទម្របាញ់មីស៊ីលជាដើម។ ប៉ុន្តែទន្ទឹមនឹងនោះ លោកមិនគាំទ្រសំណើរបស់លោកត្រាំដែលចង់ឱ្យបញ្ជូននាវាចម្បាំងទៅច្រកសមុទ្រហ័រម៉ូសដើម្បីការពារទីនោះទេ។ ឆ្លើយតបនឹងចំណាត់ការនេះ លោកត្រាំបន្តនិយាយវាយប្រហារលោកស្តាមើជានិច្ច និងចាត់ទុកថាលោកស្តាមើមិនបានមួយចំណិតរបស់លោកឆឺឈីលទេ (អតីតនាយករដ្ឋមន្ត្រីអង់គ្លេសសម័យសង្គ្រាមលោកលើកទី២)។
នៅក្នុងបទសម្ភាសនោះ លោកត្រាំក៏ឆ្លៀតព្រមានផងដែរថាអង់គ្លេសនឹងធ្វើដំណើរឆ្ពោះទៅរកមហន្តរាយជាមិនខានប្រសិនបើប្រទេសនេះមិនចាត់វិធានការឱ្យបានក្ដៅគគុកចំពោះបញ្ហាអន្តោប្រវេសន៍ និងកែសម្រួលគោលនយោបាយស្ដីពីថាមពល (អគ្គិសនី ប្រេង ហ្គាស។ល។)។ ប្រសិនបើអ្នកមិនព្រមបញ្ឈប់សកម្មភាពរបស់មនុស្សដែលហូរចូលពីគ្រប់ជ្រុងនៃពិភពលោកដូចទឹកបាក់ទំនប់ទេ អ្នកមិនអាចនៅសេសសល់ដីសម្រាប់ប្រជាជនខ្លួនឯងរស់នៅឡើយ។ លោកសូមឱ្យក្រឡេកទៅមើលទីក្រុងឡុនដុន, ឡុនដុនឥឡូវនេះប្លែកច្រើនណាស់, ឡុនដុនមានចៅហ្វាយក្រុងដ៏គម្រក់ម្នាក់, គាត់ជាមនុស្សអន់, ជាចៅហ្វាយក្រុងដ៏មហាអន់។
ទោះបីមានការនិយាយបង្អាប់បង្អោនបែបនេះក្ដី ប្រភពដែលស្និទ្ធនឹងចៅហ្វាយក្រុងឡុនដុនប្រាប់ថាលោកសាឌីក ខាន់ (Sadiq Khan) នៅតែជាបញ្ហាសតិអារម្មណ៍សម្រាប់លោកត្រាំជានិច្ចព្រោះគាត់ (ត្រាំ) មិនអាចរសាយចិត្តពីចៅហ្វាយក្រុងរូបនេះបានឡើយ។ មែនទែនទៅ កម្រិតបទល្មើសដែលកើតឡើងនៅទូទាំងទីក្រុងឡុនដុនមានតិចជាងទីក្រុងតូចធំនានាទូទាំងប្រទេសអាមេរិក។ ឡុនដុនជាទីក្រុងដែលចម្រុះវប្បធម៌ ចម្រុះនិន្នាការ និងកំពុងរីកចម្រើននៅក្នុងក្របខណ្ឌពិភពលោក។ អាចនិយាយបានថាជាទីក្រុងដ៏ឆ្នើមបំផុត។ លោកត្រាំនៅតែមិនព្រមទទួលស្គាល់នូវភាពជោគជ័យរបស់យើងទេ៕ ប្រភព៖ The Independent
ចែករំលែកព័តមាននេះ