ទីក្រុងម៉ានីឡា៖ នៅទីបំផុត តុលាការសាលាដំបូងទីក្រុងម៉ានីឡាសម្រេចចេញដីកាចាប់ខ្លួនអនុប្រធានាធិបតីហ្វ៊ីលីពីន លោកស្រីសារ៉ា ឌូតឺតេ នៅថ្ងៃនេះពាក់ព័ន្ធនឹងការដែលលោកស្រីប្រើភាសាគំរាមកំហែងផ្ដាច់ផ្ដិលអាយុជីវិតរបស់ប្រធានាធិបតីប្រទេសនេះ។ ក្រុមសហមេធាវីការពារក្ដីរបស់លោកស្រីបញ្ជាក់ថាលោកស្រីនឹងប្រើប្រាស់សិទ្ធិស្របច្បាប់ដែលមានទាំងប៉ុន្មានដើម្បីតតាំងក្ដីនៅក្នុងតុលាការ។ កាលពីខែសីហា លោកស្រីត្រូវបានចោទប្រកាន់ពីបទ «គំរាមកំហែងធ្ងន់ធ្ងរ»។ មានពេលមួយនោះ លោកស្រីថ្លែងប្រាប់អ្នកសារព័ត៌មានថាលោកស្រីធ្លាប់ជួល និងប្រាប់ឃាតករស៊ីឈ្នួលថាប្រសិនបើទៅថ្ងៃមុខ មានរឿងអ្វីកើតឡើងចំពោះរូបលោកស្រី ពួកគេត្រូវតែធ្វើឃាតប្រធានាធិបតីម៉ាកូស, ប្រពន្ធរបស់គាត់ និងបងប្អូនជីដូនមួយរបស់គាត់ម្នាក់។
ការគំរាមធ្វើឃាតនេះក៏បង្កើតជាធាតុផ្សំសំខាន់ដែលនាំទៅដល់ការស្នើសុំដកតំណែងអនុប្រធានាធិបតីពីលោកស្រីផងដែរដែលធ្វើឡើងតាមរយៈព្រឹទ្ធសភា។ ប្រសិនបើព្រឹទ្ធសភាសម្រេចដកតំណែងមែន លោកស្រីនឹងត្រូវអស់សិទ្ធិអំណាច ហើយនឹងត្រូវហាមឃាត់ធ្វើនយោបាយអស់មួយជីវិត។ យោងតាមក្រមព្រហ្មទណ្ឌរបស់ហ្វ៊ីលីពីន បើតុលាការរកឃើញកំហុសដូចការចោទប្រកាន់មែន ចុងចោទអាចជាប់ពន្ធនាគារ៦ខែ។ អ្នកនាំពាក្យក្រសួងយុត្តិធម៌ លោកប៉ូឡូ ម៉ាទីណេស (Polo Martinez) បញ្ជាក់ថាតុលាការពិតបានជាបានចេញដីកាចាប់ខ្លួនលោកស្រីសារ៉ាមែន។ ប៉ុន្តែដីកានេះមិនប្រាកដជាឈានដល់ការចាប់លោកស្រីដាក់ឃុំនៅក្នុងពន្ធនាគារនោះទេ។ លោកប៉ាវឡូ ថាម៉ាស់ (Paolo Tamase) ជាព្រឹទ្ធបុរសរងសាកលវិទ្យាល័យច្បាប់នៅហ្វ៊ីលីពីនមានប្រសាសន៍ថាក្រុមមេធាវីរបស់លោកស្រីសារ៉ាឥឡូវនេះត្រៀមរៀបចំសេចក្ដីស្នើសុំទៅតុលាការដើម្បីបង់ប្រាក់ធានាសូមនៅក្រៅឃុំ។
លោកយល់ថាវិធីល្អបំផុតដែលលោកស្រីសារ៉ាត្រូវតែធ្វើនៅពេលនេះគឺតម្កល់លុយសូមនៅក្រៅឃុំ។ លោកស្រីមិនចាំបាច់ទៅស្នើសុំដោយផ្ទាល់ក៏បានដែរ។ ដីកាចាប់ខ្លួននេះអាចនឹងមានរឿងត្រូវនិយាយគ្នាជាបន្តទៀតនៅពេលសំណុំរឿងឡើងដល់តុលាការកំពូល។ លោកស្រីអាចនឹងចោទជាសំណួរថាតើការចេញដីការនេះមានតម្លៃផ្នែកគតិយុត្តិដែរឬទេ។ មានន័យថាលោកស្រីអាចនឹងប្ដឹងទាស់ទៅសាលាឧទ្ធរណ៍ ឬតុលាការកំពូលតែម្ដង។ ក្រុមមេធាវីរបស់លោកស្រីបានចេញសេចក្ដីថ្លែងការណ៍រួមដើម្បីបញ្ជាក់ថាលោកស្រីសារ៉ាគ្មានបំណងគេចវេសពីច្បាប់ទេ ហើយលោកស្រីនឹងបន្តប្រើប្រាស់សិទ្ធិស្របច្បាប់ទាំងអស់ដើម្បីការពារខ្លួន។
ក្រុមមេធាវីការពារក្ដីជូនលោកស្រីសារ៉ាអះអាងថា «តុលាការមិនអាចជំនុំជម្រះទោសលោកស្រីនៅក្នុងបទចោទដែលពាក់ព័ន្ធនឹងការបោះឆ្នោតដកតំណែងលោកស្រីនៅក្នុងសភានោះទេ»។ ប៉ុន្តែមន្ត្រីបម្រើការនៅក្រសួងយុត្តិធម៌បានច្រានចោលការលើកឡើងនូវទឡ្ហីករណ៍នេះ។ លោកស្រីសារ៉ាត្រូវបានរដ្ឋសភាបោះឆ្នោតដកតំណែងកាលពីខែឧសភាពីបទចោទប្រកាន់ជាច្រើនករណីដែលមានជាអាទិ៍៖ ការកេងបន្លំប្រាក់ និងការប្រព្រឹត្តអំពើពុករលួយ។ ប្រសិនបើព្រឹទ្ធសភារកឃើញកំហុស និងបោះឆ្នោតដកតំណែងលោកស្រីមួយតង់ទៀត មានន័យថាលោកស្រីនឹងមិនមានសិទ្ធិឈរឈ្មោះជាបេក្ខជនប្រធានាធិបតីនៅក្នុងការបោះឆ្នោតឆ្នាំ២០២៨ឡើយ។ លោកស្រីធ្លាប់បានប្រកាសអំពីបំណងឈរឈ្មោះអាណត្តិថ្មីកាលពីខែកុម្ភៈ៕ ប្រភព៖ Channel News Asia
ចែករំលែកព័តមាននេះ