មន្ត្រីជំនាញខេត្តស្ទឹងត្រែង ចុះណែនាំបច្ចេកទេសដាំបន្លែរដូវវស្សាឱ្យទទួលបានទិន្នផលខ្ពស់ និងចៀសផុតពីជំងឺរុក្ខជាតិ
- ស្ទឹងត្រែង
ខេត្តស្ទឹងត្រែង ៖ ការធ្វើកសិកម្មក្នុងរដូវវស្សាតែងតែទាមទារនូវការយកចិត្តទុកដាក់ខ្ពស់ លើប្រព័ន្ធរំសាយទឹក និងការការពារជំងឺរុក្ខជាតិ ដើម្បីធានាបាននូវទិន្នផលខ្ពស់ និងឆ្លើយតបនឹងតម្រូវការទីផ្សារ។ ក្នុងខេត្តស្ទឹងត្រែង មន្ត្រីជំនាញបានចុះផ្ទាល់ដើម្បីបង្ហាញពីបច្ចេកទេសថ្មីៗដល់កសិករ ក្នុងគោលបំណងបង្កើនផលិតភាពបន្លែស្លឹក និងបន្លែផ្លែប្រកបដោយនិរន្តរភាព។
ក្នុងពេលចុះត្រួតពិនិត្យ និងណែនាំផ្ទាល់ដល់កសិករនៅភូមិគីឡូ៨ សង្កាត់សាមគ្គី ក្រុងស្ទឹងត្រែង កាលពីថ្ងៃទី៣ ខែកញ្ញា ឆ្នាំ២០២៦ លោក ឆិល វិបុល ប្រធានការិយាល័យផ្សព្វផ្សាយកសិកម្ម បានគូសបញ្ជាក់ថា បញ្ហាប្រឈមធំបំផុតក្នុងរដូវភ្លៀងធ្លាក់គឺការជាំទឹក និងការផ្ទុះឡើងនៃសត្វល្អិត។ លោកបានណែនាំឱ្យកសិករលើករងឱ្យបានខ្ពស់ចាប់ពី ២ ដល់ ៣ តឹក ព្រមទាំងរៀបចំតាមជម្រាលដីត្រឹមត្រូវ ការប្រើប្រាស់កៅស៊ូឃ្លុបរង និងការសម្អាតស្មៅជាប្រចាំ ដើម្បីកាត់បន្ថយជម្រករបស់សត្វល្អិតចង្រៃដូចជារុយ.ស និងដង្កូវបំផ្លាញដំណាំ។
ឆ្លើយតបនឹងការណែនាំនេះ លោក ខ្វៃ យឿន កសិករដែលមានបទពិសោធន៍ជាងមួយទសវត្សក្នុងការដាំដុះបន្លែនៅទីនោះ បានលើកឡើងថា ការថែទាំយ៉ាងយកចិត្តទុកដាក់ ការឧស្សាហ៍ជម្រះស្មៅ និងការធានាថាកន្លែងដាំដុះគ្មានការលិចទឹក គឺជាគន្លឹះសំខាន់ដែលធ្វើឱ្យដំណាំរបស់លោកនៅតែលូតលាស់ល្អ ទោះបីជាមានការប្រែប្រួលអាកាសធាតុក៏ដោយ។
ក្រៅពីបច្ចេកទេសដាំដុះ លោក យ៉ាថា អនុប្រធានការិយាល័យក្សេត្រសាស្ត្រ និងផលិតភាពកសិកម្ម បានក្រើនរំឮកដល់កសិករកុំឱ្យទិញពូជ ឬថ្នាំកសិកម្មតាមការស្មាន គឺត្រូវប្រឹក្សាយោបល់ជាមុនជាមួយមន្ត្រីកសិកម្មឃុំ-សង្កាត់ ឬម្ចាស់ដេប៉ូដែលមានអាជ្ញាបណ្ណច្បាស់លាស់។
បច្ចុប្បន្ន ខេត្តស្ទឹងត្រែងមានក្រុមកសិករដាំបន្លែសរុប ២១ក្រុម ស្មើនឹងជិត ៦០០គ្រួសារ ដែលកំពុងទទួលបានការគាំទ្របច្ចេកទេសពីគម្រោងសាកវប្បកម្មកម្ពុជា និងអង្គការដៃគូពាក់ព័ន្ធចំនួនបួន។ ភាពជាដៃគូនេះមិនត្រឹមតែជួយឱ្យបន្លែរដូវវស្សាមានការលូតលាស់ល្អប៉ុណ្ណោះទេ ប៉ុន្តែថែមទាំងជួយពង្រឹងខ្សែសង្វាក់ផ្គត់ផ្គង់ និងផ្តល់នូវកាលានុវត្តភាពទីផ្សារខ្ពស់សម្រាប់កសិករក្នុងមូលដ្ឋានផងដែរ៕
ចែករំលែកព័តមាននេះ