រាជធានីភ្នំពេញ ៖ សហរដ្ឋអាមេរិកប្តេជ្ញាចិត្តក្នុងការប្រយុទ្ធប្រឆាំងនឹងបទល្មើសឆ្លងដែន និងធ្វើការជាមួយកម្ពុជា ក្នុងការទទួលបានលទ្ធផលសម្រេចជាក់ស្ដែង ។ នេះបើយោងតាមផេកស្ថានទូតសហរដ្ឋអាមេរិក ប្រចាំកម្ពុជា បានប្រកាសនាព្រឹកថ្ងៃទី៤ ខែកញ្ញានេះ។
លោកស្រី Aleks Zittle ភារធារីស្ថានទូតអាមេរិក បានជួបពិភាក្សាការងារជាមួយលោក ស សុខា រដ្ឋមន្ត្រីក្រសួងមហាផ្ទៃ ដើម្បីគូសបញ្ជាក់ពីសារៈសំខាន់នៃកិច្ចសហប្រតិបត្តិការអនុវត្តច្បាប់រវាងអាមេរិក និងកម្ពុជា ព្រមទាំងលើកទឹកចិត្តឱ្យកម្ពុជាធ្វើការស៊ើបអង្កេត និងចាត់វិធានការច្បាប់យ៉ាងម៉ឺងម៉ាត់ប្រឆាំងនឹងបណ្តាញឧក្រិដ្ឋជន ដែលភាគច្រើនជាប់ពាក់ព័ន្ធនឹងក្រុមឧក្រិដ្ឋជនឆ្លងដែនចិន ដែលប្រព្រឹត្តបទល្មើសឆបោកតាមប្រព័ន្ធអនឡាញ ។
ក្នុងនោះដែរ ភាគីទាំងពីរបានពិភាក្សាអំពីឱកាសសម្រាប់ពង្រឹងកិច្ចសហប្រតិបត្តិការអនុវត្តច្បាប់ និងការចែករំលែកព័ត៌មានអំពីការគំរាមកំហែងឆ្លងដែន ព្រមទាំងរបៀបដែលសហរដ្ឋអាមេរិកអាចផ្តល់ជំនួយបច្ចេកទេសដើម្បីកសាងសមត្ថភាពប្រព័ន្ធយុត្តិធម៌ព្រហ្មទណ្ឌកម្ពុជា ។
ការគំរាមកំហែងឆ្លងដែនទាមទារឱ្យមានឆ្លើយតបជាអន្តរជាតិ ហើយសហរដ្ឋអាមេរិកកំពុងធ្វើការយ៉ាងជិតស្និទ្ធជាមួយកម្ពុជា ដើម្បីការពារទាំងពលរដ្ឋអាមេរិក និងកម្ពុជា តាមរយៈការបង្ក្រាបឧក្រិដ្ឋជនតាមប្រព័ន្ធអ៊ីនធឺណិត នៅគ្រប់ទីតាំងធ្វើសកម្មភាពរបស់ពួកគេ ៕
ចែករំលែកព័តមាននេះ