​រាជធានីភ្នំពេញ៖​ កេរដំណែលរបស់ អង្គជំនុំជម្រះវិសាមញ្ញក្នុងតុលាការកម្ពុជា (អ.វ.ត.ក.) កំពុងត្រូវបានបន្តរក្សាទុក និងផ្សព្វផ្សាយជាប្រភពចំណេះដឹងសម្រាប់សាធារណជន និងមនុស្សជំនាន់ក្រោយ ខណៈលោក ពុយ គា ប្រធានក្លិបអ្នកកាសែតកម្ពុជា (ក.អ.ក.) បានដឹកនាំគណៈប្រតិភូសារព័ត៌មានចំនួន២៧រូប មកពី២៣អង្គភាព ចុះទស្សនកិច្ចសិក្សានៅ អ.វ.ត.ក. នារសៀលថ្ងៃទី២ ខែកញ្ញា ឆ្នាំ២០២៦ ដើម្បីសិក្សាឈ្វេងយល់ពីសមិទ្ធផល ដំណើរការកាត់ក្តី និងកេរដំណែលរបស់ស្ថាប័ននេះ ព្រមទាំងលើកកម្ពស់ការយល់ដឹង និងការផ្សព្វផ្សាយព័ត៌មានជូនសាធារណជន។

ក្រោយបញ្ចប់ការជំនុំជម្រះក្តីនៅចុងឆ្នាំ២០២២ អ.វ.ត.ក. បានបន្តអនុវត្តមុខងារសេសសល់ ដោយផ្តោតលើការរក្សាទុក និងផ្សព្វផ្សាយកេរដំណែលរបស់ខ្លួន។ ក្នុងនោះ បានបង្កើត ​មជ្ឈមណ្ឌលធនធាន អ.វ.ត.ក.​ ដែលមានសមាសភាគចំនួន៦ រួមមាន បណ្ណាល័យ និងកន្លែងសិក្សាស្រាវជ្រាវ និហិតដ្ឋានបណ្ណសារ សាលពហុបំណង បន្ទប់ពិគ្រោះយោបល់ជនរងគ្រោះ សាលតាំងពិព័រណ៍អចិន្ត្រៃយ៍អំពីដំណើរការកាត់ក្តី និងឧទ្យានសម្រាប់ការចងចាំ។ មជ្ឈមណ្ឌលធនធានចល័តតាមរយៈរថយន្តក្រុង ក៏ត្រូវបានប្រើប្រាស់ដើម្បីនាំយកចំណេះដឹងអំពីសមិទ្ធផល និងកេរដំណែលរបស់ អ.វ.ត.ក. ទៅដល់វិទ្យាល័យ សាកលវិទ្យាល័យរដ្ឋ និងសាធារណជននៅរាជធានីភ្នំពេញ និងខេត្តទាំង២៥។

បើតាមលោក យ៉ា រសាត់ មន្ត្រីផ្នែកកិច្ចការសាធារណៈ បានឱ្យដឹងថា ក្នុងអំឡុងដំណើរការកាត់ក្តី អ.វ.ត.ក. បានដំណើរការសវនាការចំនួន៦៣៩លើក ដោយមានសាក្សី និងអ្នកជំនាញ២១៩នាក់ផ្តល់សក្ខីកម្ម និងជនរងគ្រោះ៣.៩៤៥នាក់ចូលរួមជាដើមបណ្តឹងរដ្ឋប្បវេណី។ ជាមួយគ្នានេះ មានពាក្យសុំតាំងខ្លួនជាដើមបណ្តឹងរដ្ឋប្បវេណីចំនួន១០.៣៦៧ និងគម្រោងផ្តួចផ្តើមស្តីពីសំណងរដ្ឋប្បវេណីចំនួន២៦ ត្រូវបានអនុម័ត។ អ.វ.ត.ក. ក៏បានចេញសាលក្រម សេចក្តីសម្រេច និងដីកាតុលាការចំនួន១.៣៦០ ព្រមទាំងតម្កល់ឯកសារជាង២៣២.០០០ ដែលស្មើនឹងប្រមាណ២,៥លានទំព័រ។

លទ្ធផលទាំងនេះត្រូវបានសម្រេចតាមរយៈការគាំទ្រថវិកាចំនួន៣៦៩លានដុល្លារអាម៉េរិកពីសហគមន៍អន្តរជាតិ ក្នុងអំឡុងឆ្នាំ២០០៥-២០២៥ និង៥២លានដុល្លារអាម៉េរិកពីរាជរដ្ឋាភិបាលកម្ពុជា។ ទន្ទឹមនឹងនេះ អ.វ.ត.ក. បានផ្សព្វផ្សាយការងាររបស់ខ្លួនទៅដល់មនុស្សប្រមាណ៦៤០.០០០នាក់ ក្នុងដំណាក់កាលតុលាការ ដែលបង្ហាញពីវិសាលភាពនៃការផ្សព្វផ្សាយ និងការចូលរួមរបស់សាធារណជនក្នុងការឈ្វេងយល់អំពីដំណើរការយុត្តិធម៌។

សកម្មភាពផ្សព្វផ្សាយទាំងក្នុង និងក្រៅប្រទេសរបស់ អ.វ.ត.ក. សម្រេចបានលទ្ធផលសរុបចំនួន១.០៥៧.៤៨៧ ក្នុងនោះមានសវនាការ២៤៤.៦៦៨លើក ទស្សនកិច្ចផ្សព្វផ្សាយ២៨០.៨៥០លើក អ្នកទស្សនា១៤.៤០៨នាក់ គណៈប្រតិភូ២.៣៣២នាក់ ការបញ្ចាំងភាពយន្ត៧២.៤៨១លើក បាឋកថា១០៤.៤១៨លើក ការផ្សព្វផ្សាយតាមរថយន្តក្រុង២០៧.៣៥៧លើក និងការប្រើប្រាស់បណ្ណាល័យ១៣០.៩៧៣លើក។ លទ្ធផលនេះឆ្លុះបញ្ចាំងថា បន្ទាប់ពីបញ្ចប់ការជំនុំជម្រះ កេរដំណែលរបស់ អ.វ.ត.ក. នៅតែមានតម្លៃសម្រាប់ការសិក្សា ស្រាវជ្រាវ ការយល់ដឹងអំពីប្រវត្តិសាស្ត្រ និងការរក្សាការចងចាំរបស់សង្គមកម្ពុជាសម្រាប់មនុស្សជំនាន់ក្រោយ។ នេះបើយោងតាមតាមរបាយការណ៍៕

​