លោកវរៈសេនីយ៍ទោ រ៉ែន សុភ័ក្រ ត្រូវបានក្រសួងមហាផ្ទៃផ្អាកការងារបណ្តោះអាសន្ន ក្រោយយករថយន្ត ១គ្រឿងពាក់ព័ន្ធបទល្មើសអនឡាញស្គេមទៅជិះផ្ទាល់ខ្លួន
- បន្ទាយមានជ័យ
ខេត្តបន្ទាយមានជ័យ ៖ លោកវរៈសេនីយ៍ទោ រ៉ែន សុភ័ក្រ ត្រូវបានក្រសួងមហាផ្ទៃផ្អាកការងារបណ្តោះអាសន្ន ក្រោយយករថយន្ត ១គ្រឿងពាក់ព័ន្ធអនឡាញស្គេមទៅជិះ ។ នេះបើយោងតាមអ្នកនាំពាក្យរងក្រសួងមហាផ្ទៃនៅថ្ងៃទី ០២ ខែកញ្ញា ឆ្នាំ ២០២៦ ។
លោក ទូច សុខៈ អ្នកនាំពាក្យរងក្រសួងមហាផ្ទៃលើកឡើងថា លោកវរៈសេនីយ៍ទោ រ៉ែន សុភ័ក្រ អធិការរងផ្នែកព្រហ្មទ័ណ្ឌក្រុងប៉ោយប៉ែត ត្រូវបានក្រសួងមហាផ្ទៃផ្អាកការងារជាបណ្តោះអាសន្ន តែត្រូវបង្ហាញមុខនៅការិយាល័យបុគ្គលិកនៃស្នងការដ្ឋាននគរបាលខេត្តបន្ទាយមានជ័យរាល់ម៉ោងធ្វើការ ។ លោកបានបញ្ជាក់ថា ក្រសួងមហាផ្ទៃផ្អាកការងារបណ្តោះអាសន្នលោកវរៈសេនីយ៍ទោ រ៉ែន សុភ័ក្រ គឺពាក់ព័ន្ធយករថយន្ត ១គ្រឿងបទល្មើសឆបោកតាមប្រព័ន្ធបច្ចេកវិទ្យាអនឡាញស្គេមដែលបង្ក្រាបនៅក្រុងប៉ោយប៉ែត យកទៅប្រើប្រាស់ផ្ទាល់ខ្លួនដោយខុសច្បាប់ ។
លោក ទូច សុខៈ បានបញ្ជាក់ថា ការផ្អាកការងារលោកវរៈសេនីយ៍ទោ រ៉ែន សុភ័ក្រ ត្រូវបានធ្វើឡើងជាបណ្តោះអាសន្ន ខណៈស្ថាប័នជំនាញ និងពាក់ព័ន្ធកំពុងស្រាវជ្រាវ និងពិនិត្យនិងអនុវត្តតាមនីតិវិធីរបស់កងកម្លាំងដែលបានប្រព្រឹត្ត ។
គួររំលឹកថា លោកវរៈសេនីយ៍ទោ រ៉ែន សុភ័ក្រ អធិការរងទទួលផ្នែកព្រហ្មទ័ណ្ឌក្រុងប៉ោយប៉ែតបានយករថយន្ត ១គ្រឿង ដែលបង្ក្រាបអនឡាញស្គេមនៅក្រុងប៉ោយប៉ែតរបស់ជនជាតិឥណ្ឌូនេស៊ីទៅអោយកូនស្រីជិះនៅរាជធានីភ្នំពេញ ក្រោយព័ត៌មាន និងបណ្តាញសង្គមបានផ្សព្វផ្សាយ លោកបានយករថយន្ត ១គ្រឿងទៅប្រគល់ជូនគណៈកម្មការបង្ក្រាបបទល្មើសឆបោកតាមប្រព័ន្ធបច្ចេកវិទ្យាអនឡាញស្គេមក្រុងប៉ោយប៉ែត និងយកម៉ូតូ ៧គ្រឿងដែលយកទុកនៅនិងផ្ទះត្រូវបានយកមកប្រគល់អធិការដ្ឋាននគរបាលក្រុងប៉ោយប៉ែត ។
ព័ត៌មានបន្តមានផ្សាយនៅលើទំព័រកាសែតកោះសន្តិភាព ៕
ចែករំលែកព័តមាននេះ