ទីក្រុងមូស្គូ ៖ ជំនួយការប្រធានាធិបតីរុស្ស៊ី លោក យូរី អ៊ូសាកូវ (Yuri Ushakov) កាលពីថ្ងៃអង្គារបានថ្លែងថា ប្រធានាធិបតីរុស្ស៊ី លោក វ្លាដឺមៀរ ពូទីន (Vladimir Putin) រួមទាំងប្រធានាធិបតីសហរដ្ឋអាមេរិក លោក ដូណាល់ ត្រាំ (Donald Trump) និងប្រធានាធិបតីចិន លោក ស៊ី ជីងពីង (Xi Jinping) អាចនឹងរៀបចំជំនួបត្រីភាគីមួយ នៅក្នុងកិច្ចប្រជុំកំពូលនៃកិច្ចសហប្រតិបត្តិការសេដ្ឋកិច្ចអាស៊ី-ប៉ាស៊ីហ្វិក (APEC) នាខែវិច្ឆិកាខាងមុខនេះ។
នៅពេលត្រូវបានសួរដោយទូរទស្សន៍រដ្ឋអំពីលទ្ធភាពនៃជំនួបកំពូលនេះ លោក អ៊ូសាកូវ បានឆ្លើយថា បញ្ហានេះត្រូវបានពិភាក្សាហើយ ពិតប្រាកដណាស់។ មេដឹកនាំកំពូលទាំង៣រូប ត្រូវបានរំពឹងថានឹងចូលរួមកិច្ចប្រជុំកំពូលនេះ (APEC) ហើយប្រសិនបើលេចចេញជារូបរាងដូចអ្វីដែលបានលើកឡើងនោះ មេដឹកនាំទាំង៣នឹងអាចមានជំនួបរួមគ្នាមួយ។
លោក អ៊ូសាកូវ បានថ្លែងចេញពីរដ្ឋធានីប៊ីស្កេក (Bishkek) នៃប្រទេសក្កៀហ្ស៊ីស៊ីស្ថាន (Kyrgyzstan) ជាកន្លែងដែលលោក ពូទីន និងលោក ស៊ី បានចូលរួមក្នុងកិច្ចប្រជុំនៃអង្គការកិច្ចសហប្រតិបត្តិការស៊ាងហៃ។
គួរបញ្ជាក់ថា ប្រទេសរុស្ស៊ី ចិន និងសហរដ្ឋអាមេរិក គឺជាសមាជិកអង្គការ APEC ដែលមានសមាជិក ២១ ប្រទេស។ ទីក្រុងស៊ិនជិន (Shenzhen) ប្រទេសចិន នឹងធ្វើជាម្ចាស់ផ្ទះរៀបចំកិច្ចប្រជុំកំពូលមួយនេះ នៅថ្ងៃទី ១៨-១៩ ខែវិច្ឆិកា ឆ្នាំ២០២៦។
ទោះយ៉ាងណាក៏ដោយ អ្នកនាំពាក្យសេតវិមាន លោកស្រី Anna Kelly បានឱ្យដឹងថា រហូតមកទល់ពេលនេះ មិនទាន់មានការប្រកាសណាមួយទាក់ទងនឹងការចូលរួមរបស់លោកប្រធានាធិបតី ត្រាំ នៅក្នុងកិច្ចប្រជុំ APEC នៅឡើយទេ»៕ ប្រភព ៖ Reuters
ចែករំលែកព័តមាននេះ