​ប្រទេសឡាវ៖ ​ភ្លៀងមូសុងធ្លាក់ខ្លាំងនៅចុងខែសីហា បានបង្កឱ្យមានទឹកជំនន់វាយប្រហារភូមិជាង ​១០០កន្លែង​នៅខេត្តភាគខាងជើងចំនួន៣ រួមមាន ឧត្តមសៃ, ហ្លួងណាំថា និងហ្លួងព្រះបាង ដោយបង្កការខូចខាតដល់ផ្ទះសម្បែង ដីស្រែចម្ការ និងហេដ្ឋារចនាសម្ព័ន្ធ។ ​នេះបើយោងតាមការចុះផ្សាយរបស់ Laotian Times នៅថ្ងៃទី១ ខែកញ្ញា ឆ្នាំ២០២៦។​

នៅខេត្ត ​ហ្លួងណាំថា ភ្លៀងធ្លាក់ខ្លាំងចន្លោះពីថ្ងៃទី២៨ ដល់៣០ ខែសីហា បានបង្កទឹកជំនន់ភ្លាមៗនៅ ​៥៤ភូមិ​រួមទាំងតំបន់សេដ្ឋកិច្ចពិសេសមួយកន្លែង ក្បែរច្រកព្រំដែនចិន។ ទឹកជំនន់បានប៉ះពាល់ដល់គ្រួសារជាង ​២,៤០០គ្រួសារ​នៅក្នុងស្រុក ហ្លួងណាំថា ខណៈការវាយតម្លៃការខូចខាតនៅមិនទាន់បញ្ចប់។

នៅខេត្ត ​ឧត្តមសៃភ្លៀងធ្លាក់ជាប់ៗគ្នាកាលពីថ្ងៃទី២៩–៣០ ខែសីហា បានបង្កជំនន់ភ្លាមៗនៅស្រុក ណាំមួ, សៃ និង ឡា ប៉ះពាល់ដល់ ​៨១ភូមិ​។ ជំនន់ដែលបានកើតឡើងជាបន្តបន្ទាប់ក្នុងខែសីហា បានប៉ះពាល់ដល់ប្រជាពលរដ្ឋរាប់ពាន់នាក់ និងបង្កការខូចខាតប៉ាន់ស្មានប្រមាណ ​៤៨,៤៧ពាន់លានគីប​ឬប្រហែល ​២,១លានដុល្លារ​។

ចំណែកខេត្ត ​ហ្លួងព្រះបាង ទឹកជំនន់ភ្លាមៗនៅស្រុក ណាំបាក់ កាលពីថ្ងៃទី៣០ ខែសីហា បានប៉ះពាល់ដល់ ​៨ភូមិ និងប្រជាពលរដ្ឋជាង ១,០០០នាក់​ព្រមទាំងធ្វើឱ្យស្រែស្រូវ ចម្ការបន្លែ និងដំណាំហូបផ្លែរងការខូចខាត។ ការខាតបង់ត្រូវបានប៉ាន់ស្មានប្រមាណ ​១,៨៣ពាន់លានគីប​ឬប្រហែល ​៨១,០០០ដុល្លារ​។

ទន្ទឹមនឹងនេះ ខេត្តខាំមួន​នៅភាគខាងត្បូង ក៏បានរងផលប៉ះពាល់ពីទឹកជំនន់ធ្ងន់ធ្ងរផងដែរ។ ការជន់លិចពីរលើកចន្លោះខែកក្កដា និងសីហា បានប៉ះពាល់ដល់ភូមិរាប់រយ និងប្រជាពលរដ្ឋជាង ​១០០,០០០នាក់​ខណៈអាជ្ញាធរកំពុងបន្តវាយតម្លៃទំហំនៃការខូចខាត៕