សុខភាព៖ យោងតាមការចុះផ្សាយពីប្រភពបរទេស របបអាហារស៊ុតអាចជួយឱ្យស្រកទម្ងន់បានលឿនក្នុងរយៈពេលខ្លី ព្រោះស៊ុតមានប្រូតេអ៊ីនខ្ពស់ និងជួយឱ្យឆ្អែតបានយូរ។ ប៉ុន្តែការញ៉ាំស៊ុតជាចម្បង និងកាត់បន្ថយអាហារប្រភេទផ្សេងៗខ្លាំងពេក អាចធ្វើឱ្យរាងកាយខ្វះសារធាតុចិញ្ចឹមចាំបាច់។

អ្នកជំនាញបញ្ជាក់ថា ការស្រកទម្ងន់លឿន ៣–៤ គីឡូក្រាមក្នុងមួយសប្តាហ៍ មិនមែនសុទ្ធតែជាការបាត់បង់ខ្លាញ់ទេ ព្រោះអាចជាការបាត់បង់ទឹក និងសាច់ដុំ ហើយទម្ងន់អាចឡើងវិញនៅពេលត្រឡប់ទៅញ៉ាំអាហារធម្មតា។

ការកំណត់កាឡូរីខ្លាំងពេកក៏អាចបង្កឱ្យឃ្លានខ្លាំង ញ៉ាំលើសកម្រិត និងប៉ះពាល់ដល់សុខភាព។ របបនេះមិនសមស្របសម្រាប់មនុស្សមួយចំនួន ដូចជា ស្ត្រីមានផ្ទៃពោះ កុមារ មនុស្សវ័យចំណាស់ និងអ្នកមានជំងឺតម្រងនោម។

លើសពីនេះ ការសម្រកទម្ងន់មិនគួរផ្តោតលើអាហារតែមួយប្រភេទឡើយ។ រាងកាយត្រូវការសារធាតុចិញ្ចឹមចម្រុះពីបន្លែ ផ្លែឈើ ប្រូតេអ៊ីន និងគ្រាប់ធញ្ញជាតិ ដើម្បីរក្សាសុខភាព និងថាមពលប្រចាំថ្ងៃ។

ដូច្នេះ ប្រសិនបើចង់ស្រកទម្ងន់ គួរជ្រើសរើសអាហារដែលមានតុល្យភាព ហាត់ប្រាណជាប្រចាំ និងសម្រកទម្ងន់បន្តិចម្តងៗ ជំនួសឱ្យការប្រើរបបអាហារតឹងរ៉ឹងដែលអាចប៉ះពាល់ដល់សុខភាព៕