ប៉ូលិសចាប់ខ្លួន ព្រោះរកស៊ីផ្តល់កម្ចីដោយមានលក្ខខណ្ឌរូបថតអាក្រា.តកាយ
- ភ្នំពេញ
នាយកដ្ឋានប្រឆាំងបទល្មើសបច្ចេកវិទ្យា បានស្រាវជ្រាវ និងឃាត់ខ្លួនជនសង្ស័យម្នាក់ ពាក់ព័ន្ធករណីផ្តល់ប្រាក់កម្ចីដោយយកការប្រាក់ខ្ពស់ ការគំរាមកំហែង និងការចែកចាយរូបភាពអាក្រាតរបស់ជនរងគ្រោះតាមបណ្តាញសង្គម ។
ប្រតិបត្តិការនេះធ្វើឡើង តាមបញ្ជាដឹកនាំរបស់លោក ស ថេត អគ្គស្នងការនគរបាលជាតិ និងតាមការចង្អុលណែនាំពី លោកឧត្តមសេនីយ៍ឯក អគ្គស្នងការរងនគរបាលជាតិ ព្រមទាំងមានការសម្របសម្រួលពីស្ថាប័នអយ្យការអមសាលាដំបូង ។
តាមការបញ្ជាក់របស់សមត្ថកិច្ច ជនសង្ស័យ អាយុ៣៨ឆ្នាំ បានប្រើប្រាស់គណនីបណ្តាញសង្គមហ្វេសប៊ុកឈ្មោះ Bunna FC និងគណនីតេឡេក្រាមឈ្មោះ Bun Na ដើម្បីផ្តល់ប្រាក់កម្ចីដោយយកការប្រាក់ខ្ពស់ ។
អ្វីដែលគួរឱ្យព្រួយបារម្ភនោះ គឺជនសង្ស័យត្រូវបានសង្ស័យថា បានដាក់លក្ខខណ្ឌឱ្យអ្នកខ្ចីប្រាក់ថតរូបភាព និងវីដេអូអាក្រាតកា.យ រួចផ្ញើមកឱ្យខ្លួនជាថ្នូរនឹងការផ្តល់ប្រាក់កម្ចី ។
នៅពេលជនរងគ្រោះមិនមានលទ្ធភាពសងប្រាក់តាមពេលកំណត់ ជនសង្ស័យបានប្រើប្រាស់សារឆាតតាមបណ្តាញសង្គម ដើម្បីគំរា.មកំហែ.ង និងទាមទារប្រាក់ ។ លើសពីនេះ ក៏ត្រូវបានសង្ស័យថា បានយករូបភាពអាក្រា.តកាយរបស់ជនរងគ្រោះទៅបង្ហោះជាសាធារណៈលើបណ្តាញសង្គមហ្វេសប៊ុក ដែលបង្កឱ្យមានផលប៉ះពាល់យ៉ាងធ្ងន់ធ្ងរដល់កិត្តិយស សេចក្តីថ្លៃថ្នូរ និងសិទ្ធិឯកជនរបស់ជនរងគ្រោះ។
បន្ទាប់ពីការស្រាវជ្រាវ និងប្រមូលភស្តុតាង នាយកដ្ឋានប្រឆាំងបទល្មើសបច្ចេកវិទ្យា បានកសាងសំណុំរឿង និងបញ្ជូនជនសង្ស័យឈ្មោះ ប.ប.ណ ទៅកាន់សាលាដំបូង ដើម្បីចាត់ការបន្តតាមនីតិវិធីច្បាប់។
សមត្ថកិច្ចបានអំពាវនាវឱ្យប្រជាពលរដ្ឋមានការប្រុងប្រយ័ត្នចំពោះការផ្តល់ប្រាក់កម្ចីតាមបណ្តាញសង្គម និងកុំផ្តល់រូបភាព ឬវីដេអូឯកជនទៅឱ្យជនមិនស្គាល់ ព្រោះអាចប្រឈមនឹងការយកទៅប្រើប្រាស់ខុសគោលបំណង និងបង្កផលប៉ះពាល់ធ្ងន់ធ្ងរ ៕
ចែករំលែកព័តមាននេះ