តើជាត្រីងៀតឆ្លៀតពងមែន ឬអត់ ? តើវាសនាលោក រ៉ែន សុភ័ក្រ ទៅជាយ៉ាងណា ក្រោយទទួលព័ត៌មានអគ្គស្នងការនគរបាលជាតិកោះហៅមកភ្នំពេញ
- បន្ទាយមានជ័យ
ខេត្តបន្ទាយមានជ័យ ៖ តើវាសនាលោក រ៉ែន សុភ័ក្រ អធិការរងនគរបាលក្រុងប៉ោយប៉ែត ទៅជាយ៉ាងណាក្រោយទទួលព័ត៌មានអគ្គស្នងការនគរបាលជាតិកោះហៅសាកសួរថ្ងៃស្អែកនៅរាជធានីភ្នំពេញ ។ ព័ត៌មានបានផ្សព្វផ្សាយព្រងព្រាតលោកវរៈសេនីយ៍ទោ រ៉ែន សុភ័ក្រ អធិការរងនគរបាលក្រុងប៉ោយប៉ែត បានយកឡាន ១គ្រឿងម៉ាក FORD MUS TANG ពណ៌ក្រហម ពាក់ផ្លាក់លេខ ភ្នំពេញ 2BS-6371 ជាកម្មសិទ្ធិរបស់ឈ្មោះ VALENTINO MICELLIM ជនជាតិឥណ្ឌូនេស៊ី យកទៅអោយកូនស្រីជិះ នៅរាជធានីភ្នំពេញ និងម៉ូតូប្រមូលជិត ១០គ្រឿងយកមកនគរបាលក្រុងប៉ោយប៉ែតវិញ ។ តើនេះជាត្រីងៀតឆ្លៀតពងមែន ឬអត់ ?
ទទួលព័ត៌មានថា ៖ លោកវរៈសេនីយ៍ទោ រ៉ែន សុភ័ក្រ អធិការរងនគរបាលក្រុងប៉ោយប៉ែត ត្រូវបានអគ្គស្នងការនគរបាលជាតិបានកោះហៅចូលខ្លួននៅថ្ងៃទី ០១ ខែកញ្ញា ឆ្នាំ ២០២៦ នៅរាជធានីភ្នំពេញពាក់ព័ន្ធរឿងយកឡានស៊េរីទំនើប ១គ្រឿងរបស់ជនជាតិឥណ្ឌូនេស៊ីទៅអោយកូនស្រីជិះ ក្រោយចុះប្រតិបត្តិការបង្ក្រាបបទល្មើសអនឡាញស្គេមកាលពីថ្ងៃទី ០២ ខែមិថុនា ឆ្នាំ២០២៦ នៅភូមិគីឡូម៉ែត្រលេខ ៤ សង្កាត់ផ្សារកណ្តាល ក្រុងប៉ោយប៉ែត ។
លោកឧត្តមសេនីយ៍ត្រី វង់ វិត ស្នងការរងទទួលផែនធនធានមនុស្សខេត្តបន្ទាយមានជ័យ ធ្លាប់បានប្រាប់ថា ក្រោយព័ត៌មានផ្សព្វផ្សាយ លោកវរៈសេនីយ៍ទោ រ៉ែន សុភ័ក្រ អធិការរងទទួលផ្នែកព្រហ្មទ័ណ្ឌក្រុងប៉ោយប៉ែត ដែលពាក់ព័ទ្ធរថយន្ត ១គ្រឿងរបស់ជនជាតិឥណ្ឌូនេស៊ី ត្រូវបានយកទៅប្រគល់អោយគណៈកម្មការបង្ក្រាបបទល្មើសឆបោកតាមប្រព័ន្ធបច្ចេកវិទ្យាអនឡាញស្គេម ក្រោយកោះហៅសាកសួរហើយបានអោយត្រឡប់ទៅអង្គភាពវិញ និងធ្វើរបាយការណ៍ជូនអគ្គស្នងការនគរបាលជាតិ ។
ដោយឡែកលោកឧត្តមសេនីយ៍ត្រី រ៉ែម វីរៈ ស្នងការរង និងជាអ្នកនាំពាក្យស្នងការដ្ឋាននគរបាលខេត្តបន្ទាយមានជ័យ បានខលចូលទំនាក់ទំនងដែរ តែមិនលើក ដើម្បីសាកសួរព័ត៌មានបន្ថែមជុំវិញលោកវរៈសេនីយ៍ទោ រ៉ែន សុភ័ក្រ អធិការរងនគរបាលក្រុងប៉ោយប៉ែត ទទួលព័ត៌មានថា អគ្គស្នងការនគរបាលជាតិបានកោះហៅទៅរាជធានីភ្នំពេញនៅថ្ងៃទី ០១ ខែកញ្ញា ឆ្នាំ ២០២៦ ពាក់ព័ន្ធរឿងឡាន ១គ្រឿងជនជាតិឥណ្ឌូនេស៊ី និងម៉ូតូជិត ១០គ្រឿងទៀត ពេលនេះបានយកមកប្រគល់ជូនអធិការដ្ឋាននគរបាលក្រុងប៉ោយប៉ែតវិញហើយ ។
ព័ត៌មានបន្តនឹងមានផ្សាយបន្ថែមទៀត ដរាបណាមានព័ត៌មានប្លែក ព្រមទាំងមានផ្សាយនៅលើទំព័រកាសែតកោះសន្តិភាព ៕
ចែករំលែកព័តមាននេះ