សហរដ្ឋអាមេរិក ៖ ប្រធានាធិបតីអាមេរិក លោក ដូណាល់ ត្រាំ (Donald Trump) បានបញ្ជាឱ្យបង្ហូតទង់ជាតិពាក់កណ្តាលដងទូទាំងប្រទេស ដើម្បីគោរព ក៏ដូចជាផ្តល់កិត្តិយសដល់លោកស្រី ដូលី ផាតថុន (Dolly Parton) តារាចម្រៀងបែប Country ដ៏ល្បី ដែលបានទទួលមរណភាពនៅក្នុងជន្មាយុ ៨០ ឆ្នាំ កាលពីថ្ងៃទី២៥ ខែសីហា ឆ្នាំ២០២៦ (ម៉ោងនៅសហរដ្ឋអាមេរិក) ដោយស្ងប់ស្ងាត់ ខណៈមូលហេតុមរណភាពមិនត្រូវបានបង្ហាញជាផ្លូវការនោះទេ។
លោកប្រធានាធិបតី ត្រាំ បានសរសេរលើបណ្តាញសង្គម Truth Social ដូច្នេះថា «ពិតជាមានសេចក្តីសោកស្តាយខ្លាំងណាស់ក្នុងការជម្រាបជូនថា លោកស្រី Dolly Parton តារាចម្រៀង Country ដ៏អស្ចារ្យបំផុតម្នាក់ និងលើសពីនេះទៅទៀតនោះ ទើបតែបានទទួលមរណភាព ដែលនេះជាការបាត់បង់ដ៏ពិតប្រាកដមួយសម្រាប់មនុស្សរាប់លាននាក់ មិនដែលធ្លាប់មាននរណាម្នាក់ដូចលោកស្រីឡើយ ហើយក៏នឹងមិនមានទៀតដែរ»។ ជាមួយគ្នានោះ លោកបានបន្ថែមថា ទង់ជាតិនឹងត្រូវបង្ហូតចុះពាក់កណ្តាលដង ចាប់ពីម៉ោង ៦ ល្ងាចថ្ងៃអង្គារតទៅ រយៈពេល១សប្តាហ៍ពេញ និងបានរំលេចជាមួយពាក្យចុងក្រោយថា «សូមឱ្យទៅកាន់ទីស្ងប់សុខ Dolly!។ ពិភពលោកស្រឡាញ់អ្នកណាស់»។
គួរបញ្ជាក់ថា លោកស្រី ដូលី ផាតថុន គឺជាតន្ត្រីការិនីចង្វាក់ Country និងជាអ្នកនិពន្ធបទចម្រៀង តារាសម្តែង សប្បុរសជន និងជាសហគ្រិនស្ត្រីជនជាតិអាមេរិកដ៏ល្បីល្បាញម្នាក់ ដែលទទួលបានកិត្តិយសបំផុតក្នុងប្រវត្តិសាស្ត្រតន្ត្រីសហរដ្ឋអាមេរិក និងត្រូវបានគេដាក់រហស្សនាមថា «ម្ចាស់ក្សត្រីនៃតន្ត្រី Country» ជាមួយបទចម្រៀងល្បីៗជាច្រើន រួមមានទាំង Coat of Many Colors, Jolene និង I Will Always Love You ជាដើម។
លើសពីនេះទៀត អត្តចរិតដ៏ល្អផូរផង់របស់លោកស្រី រួមផ្សំជាមួយម៉ូដសក់ពណ៌ទង់ដែងលើកខ្ពស់ សម្លៀកបំពាក់ឆើតឆាយ និងទឹកមុខរីករាយជានិច្ចនោះ បានធ្វើឱ្យលោកស្រីទទួលបានការស្រឡាញ់ចូលចិត្តពីប្រជាជនអាមេរិកគ្រប់មជ្ឈដ្ឋាន និងបាននាំតន្ត្រី Country ទៅកាន់ទស្សនិកជនជុំវិញពិភពលោកផងដែរ។ ដោយសារកើតចេញពីគ្រួសារក្រីក្រ ទើបលោកស្រីតែងតែបរិច្ចាគប្រាក់កាស ដើម្បីគាំទ្របុព្វហេតុជាច្រើន រាប់ចាប់តាំងពីបញ្ហាក្រុមអ្នកស្រឡាញ់ភេទដូចគ្នា (LGBTQ+) និងកម្មវិធីអក្ខរកម្មសម្រាប់កុមារ រហូតដល់ការស្រាវជ្រាវវ៉ាក់សាំងជាដើម។
ពេញមួយអាជីព លោកស្រីបានឈ្នះពានរង្វាន់ជាច្រើន ក្នុងនោះរួមមានទាំង Grammy ចំនួន ១១ ដង, Emmy ៣ ដង និងពានរង្វាន់មនុស្សធម៌ Jean Hersholt ក៏ដូចជាជាប់ឈ្មោះប្រជែងពានរង្វាន់ Academy , Golden Globe និងពានរង្វាន់ Tony ផងដែរ៕ ប្រភព ៖ Fox News, Reuters និង Politico
ចែករំលែកព័តមាននេះ