ផ្សារទំនើបនៅក្នុងទីក្រុងធំៗរបស់ប្រទេសចិន គ្មានតាំងអំបិលលក់ទេ បន្ទាប់ពីអ្នកដើរផ្សារនាំគ្នារត់តម្រង់ទៅទិញអំបិលទាំងអស់គ្នា ក្រោយពីមានពាក្យចចាមអារ៉ាមរីកសាយថា អំបិលអាចការពារប្រឆាំងសារធាតុវិទ្យុសកម្មបាន។
សារធាតុនុយក្លេអ៊ែរដែលមានក្នុងទីក្រុងនៃប្រទេសជប៉ុនបង្កឲ្យមានភាពភ័យខ្លាចនោះ បានធ្វើឲ្យតម្លៃអំបិលក្នុងទីក្រុងនៃប្រទេសចិនមួយចំនួន ឡើងថ្លៃកប់ពពក បន្ទាប់ពីអ្នកដើរផ្សារសួររកទិញអំបិលមួយកញ្ចប់គ្រប់គ្នា ដើម្បីស្វែងរកសារធាតុIodine ដែលត្រូវគេជឿថាអាចប្រឆាំងសារធាតុវិទ្យុសកម្ម។ អំបិលក្នុងប្រទេសចិនមានផ្ទុកកម្រិតសារធាតុ Iodide តិចដោយសារជាគោលនយោបាយរបស់រដ្ឋ ។
កត្តាមួយទៀតដែលបង្កើតឲ្យមានពាក្យចចាមអារ៉ាមនោះ គឺដោយសារថា សារធាតុវិទ្យុសកម្មនុយក្លេអ៊ែរបានលេចធ្លាយចូលទៅក្នុងទឹកសមុទ្រ ហេតុនេះដើម្បីសុវត្ថិភាពគេត្រូវរកអំបិលដែលផលិតពីទឹកសមុទ្រមុនពេលកើតហេតុការណ៍ផ្ទុះឆេះចង្ក្រានរ៉េអាក់ទ័រនៅជប៉ុន ដូច្នេះហើយទើបម្នាក់ៗត្រូវខំរកទិញនាពេលនេះ។ មានប្រជាជនខ្លះ បានទិញអំបិលពីប្រជាជនដូចគ្នាតាមផ្ទះដែលរក្សាទុកជាច្រើនឆ្នាំមកហើយ។ ជាលទ្ធផល តម្លៃអំបិលបានកើនឡើងពីតម្លៃ១,៥យ៉ាន់ ក្នុងមួយកញ្ចប់ដល់ទៅ២០យ៉ាន់ ក្នុងមួយកញ្ចប់នៅក្នុងទីក្រុងមួយចំនួន។ អ្នកជំនាញសុខភាពបាននិយាយថា វាគ្មានអ្វីដែលត្រូវភ័យខ្លាចនោះទេ។ នេះបើតាមសម្តីរបស់លោកវេជ្ជបណ្ឌិត ហ្វីលីប ប្រូក ដែលមកពីមន្ទីរពេទ្យ Beijing United Family។ គាត់បន្តថា ពេលនេះក្នុងប្រទេសចិន គ្មានហេតុផលអ្វីមួយដែលត្រូវឲ្យមានការភ័យខ្លាចទេ។ បើទោះជាពេលថ្មីៗនេះមានឧបទ្ទវហេតុផ្ទុះឆេះរោងចក្រនុយក្លេអ៊ែរក្នុងប្រទេសជប៉ុនក្តី។ រឿងដំបូងដែលអ្នកត្រូវធ្វើ គឺនៅឲ្យស្ងៀម ហើយត្រូវដឹងថា គ្មានសញ្ញាការរងសំពាធឬ និងអាចរងសំពាធដល់តំបន់ក្បែរខាងក្នុងពេលឆាប់ៗនេះឡើយ។
លោក Song Zhangjing អ្នកនាំពាក្យរបស់សមាគមអំបិលចិននៃអង្គការឧស្សាហកម្មបានខិតខំកាត់បន្ថយការភ័យខ្លាចដែលអាចនឹង កើតមានឡើងដោយសារការសាយភាយសារធាតុវិទ្យុសកម្ម។
ក្នុងប្រទេសចិន អំបិលទាំងអស់យកចេញពីអណ្តូងរ៉ែអំបិល។ មានតែអំបិលម៉ដ្ឋទេដែលលាយជាមួយអំបិលចម្រាញ់ចេញពីទឹកសមុទ្រ។
នេះជាពាក្យចចាមអារ៉ាមចុងក្រោយបំផុតក្នុងចំណោមពាក្យចចាមអារ៉ាមដែលកើតមានឡើងក្នុងតំបន់អាស៊ីទាំងមូល បន្ទាប់ពីមានគ្រោះថ្នាក់រញ្ជួយដីលើរោងចក្រថាមពលនុយក្លេអ៊ែរក្នុងប្រទេសជប៉ុន។ ដូចជានៅក្នុងប្រទេសហ្វុីលីពីនមានសារបំភ័យស្តីពីការរីកសាយភាយសារ ធាតុនុយក្លេអ៊ែរ ដែលបង្កឲ្យមានការភ័យខ្លាច និងចលាចលក្នុងចំណោមប្រជាពលរដ្ឋ ៕
ចែករំលែកព័តមាននេះ