កម្ពុជានឹងបន្តចូលរួមជាមួយក្រុមប្រឹក្សាសិទ្ធិមនុស្សអង្គការ សហប្រជាជាតិលើគ្រប់បញ្ហា
- ភ្នំពេញ
រាជធានីភ្នំពេញ ៖ ក្រសួងការបរទេស និងសហប្រតិបត្តិការអន្តរជាតិ បានបញ្ជាក់ថា កម្ពុជានឹងបន្តចូលរួមជាមួយក្រុមប្រឹក្សាសិទ្ធិមនុស្សអង្គការសហប្រជាជាតិលើគ្រប់បញ្ហា ។
យោងតាមសេចក្តីថ្លែងការណ៍របស់អ្នកនាំពាក្យក្រសួងការបរទេស និងសហប្រតិបត្តិការអន្តរជាតិនៅថ្ងៃទី៧ សីហា ឆ្នាំ២០២៦បានលើកឡើងថា ឆ្លើយតបនឹងសំណួររបស់ប្រព័ន្ធផ្សព្វផ្សាយពាក់ព័ន្ធនឹងដំណើរទស្សនកិច្ចលើកដំបូងមកកាន់កម្ពុជា របស់លោក ថូម៉ាស អ៊ែនឌូស (Thomas Andrews) អ្នករាយការណ៍ពិសេសរបស់អង្គការ សហប្រជាជាតិ ទទួលបន្ទុកស្ថានភាពសិទ្ធិមនុស្សនៅកម្ពុជា ពីថ្ងៃទី២០ ដល់ថ្ងៃទី៣១ ខែកក្កដា ឆ្នាំ២០២៦ អ្នកនាំពាក្យក្រសួង ការបរទេស និងសហប្រតិបត្តិការអន្តរជាតិ ថាកម្ពុជាកត់សម្គាល់អំពី «សេចក្តីថ្លែងការណ៍បញ្ចប់បេសកកម្ម» របស់លោក ថូម៉ាស អ៊ែនគ្រួស អ្នករាយការណ៍ពិសេសរបស់អង្គការសហប្រជាជាតិទទួលបន្ទុកស្ថានភាពសិទ្ធិមនុស្សនៅកម្ពុជា បន្ទាប់ពីដំណើរទស្សនកិច្ចរបស់លោកនៅកម្ពុជា និងសូមស្វាគមន៍ចំពោះបេសកកម្មលើកដំបូងរបស់លោក ដែលប្រព្រឹត្តទៅក្រោមអាណត្តិការងារនេះ។
អនុលោមតាមកាតព្វកិច្ច និងការប្តេជ្ញាចិត្តជាអន្តរជាតិរបស់ខ្លួនចំពោះសិទ្ធិមនុស្ស ក្រោមសន្ធិសញ្ញា សិទ្ធិមនុស្សសំខាន់ៗ ដែលកម្ពុជាបានផ្តល់សច្ចាប័ន កម្ពុជាបានអនុញ្ញាតជូនអ្នករាយការណ៍ពិសេស អញ្ជើញ ចូលពិនិត្យដោយសេរីទៅកាន់ទីតាំងឃុំឃាំង ជំរំជនភៀសសឹក និងតំបន់ព្រំដែន ព្រមទាំងបានសម្របសម្រួល ឱ្យមានជំនួបជាមួយមន្ត្រីពាក់ព័ន្ធគ្រប់លំដាប់ថ្នាក់ ក៏ដូចជាបង្កបរិយាកាសល្អ ក្នុងការប្រាស្រ័យទាក់ទងដោយ ឯករាជ្យរបស់លោកជាមួយសង្គមស៊ីវិល និងសកម្មជននានា។
កិច្ចសហការជាបន្តបន្ទាប់នេះ កើតចេញពីទំនុកចិត្តរបស់កម្ពុជា ចំពោះយន្តការដែលបង្កើតឡើងដោយអង្គការសហ ប្រជាជាតិ និងចំពោះវិជ្ជាជីវៈរបស់អ្នករាយ ការណ៍ពិសេស នៅក្នុងការពិនិត្យដោយឯករាជ្យ ដោយផ្អែកលើការពិតជាក់ស្តែង។
ស្ថានភាពព្រំដែន កម្ពុជាកត់សម្គាល់ឃើញថា តួលេខនៃពលរដ្ឋភៀសសឹក និងពលរដ្ឋវិលត្រឡប់ទៅលមនៅឋានវិញ ដែល
រំលេចនៅក្នុងសេចក្តីថ្លែងការណ៍ របស់អ្នករាយការណ៍ពិសេសដោយបង្ហាញថា ជនស៊ីវិលកម្ពុជាប្រមាណ៦ម៉ឺននាក់បានភៀសសឹកនៅតាមតំបន់ព្រំដែននាចុងឆ្នាំមុន ហើយក្នុងនោះជាង២ម៉ឺននាក់កំពុងបន្តភៀសសឹកនៅឡើយនោះ គឺស្របគ្នានឹងតួលេខដែលចងក្រងឡើងតាមរយៈវត្តមាននៅនឹងកន្លែងរបស់ភ្នាក់ងារអង្គការ សហប្រជាជាតិ និងដៃគូអង្គការមនុស្សធម៌នានា ដែល កំពុងធ្វើប្រតិបត្តិការនៅតំបន់ព្រំដែន រួមទាំងកម្មវិធីផ្តល់អាហារ និងជម្រកដែលកំពុងដំណើរការបច្ចុប្បន្ន។
កម្ពុជាកត់សម្គាល់បន្ថែមទៀតថា ទោះបីជាសេចក្តីថ្លែងការណ៍ជាសាធារណៈនាពេលថ្មីៗនេះរបស់អាជ្ញាធរថៃ បានជំទាស់នឹងតួលេខដ៏ច្បាស់លាស់នេះក្តី ក៏សេចក្តីថ្លែងការណ៍ទាំងនោះ បានបញ្ជាក់ថា ពិតជាមានជនស៊ីវិលកម្ពុជាជាច្រើនបានភៀសសឹកមែន ហើយនៅតែមិនអាចវិលត្រឡប់ទៅកាន់ផ្ទះសម្បែង របស់ពួកគេវិញបានឡើយ ដោយសារតែការកាន់កាប់ដោយខុសច្បាប់របស់ថៃលើដែនដីកម្ពុជា។
កម្ពុជាសូមស្វាគមន៍ចំពោះការបន្តផ្ទៀងផ្ទាត់ ដោយឯករាជ្យអំពីស្ថានភាពនេះពីសំណាក់ភ្នាក់ងារពាក់ព័ន្ធ បេសកកម្មការទូតនានា ហើយត្រៀមខ្លួនជាស្រេច ក្នុងការសម្របសម្រួលដំណើរទស្សនកិច្ចបន្ថែមទៀត ទៅកាន់តំបន់រងផលប៉ះពាល់ទាំងនោះ។
ចំពោះសិទ្ធិក្នុងការវិលត្រឡប់ទៅផ្ទះសម្បែងវិញ កម្ពុជាសូមបញ្ជាក់ជាថ្មីនូវការប្តេជ្ញាចិត្តដ៏មុតមាំរបស់ ខ្លួន ចំពោះសេចក្តីប្រកាសរួម ចុះថ្ងៃទី២៧ ខែធ្នូ ឆ្នាំ២០២៥។ ត្រង់ចំណុចទី៤ នៃសេចក្តីប្រកាសរួមនេះ កម្ពុជា និងថៃឯកភាពអនុញ្ញាតឱ្យជនស៊ីវិលនៅតំបន់ព្រំដែនដែលរងផលប៉ះពាល់ វិលត្រឡប់ទៅផ្ទះសម្បែង និង ប្រកបជីវភាពរស់នៅធម្មតារបស់ពួកគេវិញ ឱ្យបានកាន់តែឆាប់បំផុត ដោយគ្មានការរារាំង និងដោយសុវត្ថិភាព និងសេចក្តីថ្លៃថ្នូរ។
កម្ពុជាអំពាវនាវឱ្យអនុវត្តជាបន្ទាន់ ពេញលេញ និងប្រកបដោយប្រសិទ្ធភាពនូវខ្លឹមសារ ទាំងស្រុងនៃការឯកភាពគ្នានេះ តាមរយៈយន្តការទ្វេភាគីដែលមានស្រាប់ ដែលបង្កើតឡើងសម្រាប់គោលបំណង នេះ ជាពិសេសការចាប់ផ្តើមឡើងវិញ ឱ្យបានឆាប់បំផុតនៃការងារវាស់វែង និងបោះបង្គោលព្រំដែនរបស់គណៈ កម្មការចម្រុះខណ្ឌសីមាព្រំដែនគោក (JBC) ដើម្បីឱ្យជនភៀ សសឹកគ្រប់រូប អាចវិលត្រឡប់ទៅផ្ទះសម្បែង របស់ខ្លួនវិញ។
កម្ពុជានឹងបន្តចូលរួមជាមួយក្រុមប្រឹក្សាសិទ្ធិមនុស្សអង្គការសហប្រជាជាតិ លើគ្រប់បញ្ហា ដែលលើក ឡើងដោយអ្នករាយ ការណ៍ពិសេស និងទន្ទឹងរង់ចាំនូវកិច្ចពិភាក្សាពេញលេញ និងប្រកបដោយស្ថាបនាអំពី ស្ថានភាពនេះ នៅក្នុងសម័យប្រជុំនាពេលខាងមុខរបស់ក្រុមប្រឹក្សាសិទ្ធិមនុស្ស អ.ស.ប.។
កម្ពុជាសូមបញ្ជាក់ជាថ្មីនូវការប្តេជ្ញាចិត្តរបស់ខ្លួន ក្នុងការដោះស្រាយបញ្ហាដែលនៅសេសសល់ទាំង អស់ ដែលកើតចេញពីស្ថានភាពព្រំដែននេះ តាមម ធ្យោបាយសន្តិភាព ការសន្ទនា និងការគោរពសន្ធិសញ្ញា និងកិច្ចព្រមព្រៀងទ្វេភាគីដែលមានស្រាប់ និងច្បាប់អន្តរជាតិ ព្រមទាំងក្នុងការអនុវត្តពេញលេញនៃការប្តេជ្ញាចិត្ត ដែលរាជរដ្ឋាភិបាលទាំងពីរបានធ្វើឡើង កាលពីថ្ងៃទី២៧ ខែធ្នូ ឆ្នាំ២០២៥ ដើម្បីផលប្រយោជន៍របស់ប្រជាជន នៃប្រទេសទាំងពីរ៕
ចែករំលែកព័តមាននេះ