រាជធានីភ្នំពេញ ៖ ឯកឧត្តម ហេង សួរ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ បានអញ្ជើញជាអធិបតីក្នុងពិធីប្រកាសចូលកាន់មុខតំណែងឯកឧត្តម ជិន តារ៉ា ជានាយកវិទ្យាស្ថានជាតិបណ្តុះបណ្តាលបច្ចេកទេស (NTTI) និងឯកឧត្តម តាន់ កុសល នាយកវិទ្យាស្ថានជាតិពហុបច្ចេកទេសកម្ពុជា (NPIC) នាព្រឹកថ្ងៃទី៧ ខែសីហា ឆ្នាំ២០២៦ នៅទីស្តីការក្រសួង ដោយមានការចូលរួមពីថ្នាក់ដឹកនាំក្រសួង ថ្នាក់ដឹកនាំអគ្គនាយកដ្ឋានអប់រំបណ្តុះបណ្តាលបច្ចេកទេសនិងវិជ្ជាជីវៈ និងនាយក នាយករងមកពីគ្រឹះស្ថានធីវេតទាំង៣៧ ក្រោមឱវាទក្រសួងផងដែរ ។
ថ្លែងក្នុងឱកាសនោះ ឯកឧត្តមរដ្ឋមន្ត្រី បានចូលរួមអបអរសាទរយ៉ាងកក់ក្តៅចំពោះ ឯកឧត្តម ជិន តារ៉ា និងឯកឧត្តម តាន់ កុសល ដែលទទួលបានការជឿទុកចិត្តពីប្រមុខរាជរដ្ឋាភិបាល ក៏ដូចជាថ្នាក់ដឹកនាំក្រសួង ជាអ្នកមានសមត្ថភាពគ្រប់គ្រាន់ដើម្បីបន្តដឹកនាំ កែទម្រង់ឱ្យវិទ្យាស្ថានទាំងពីរកាន់តែមានការអភិវឌ្ឍរីកចម្រើនទាំងបរិមាណ និងគុណភាព។ ទន្ទឹមនេះ ឯកឧត្តម ហេង សួរ ក៏បានសំដែងនូវការកោតសរសើរ និងថ្លែងអំណរគុណចំពោះឯកឧត្តម ប៊ុន ភារិន អតីតនាយកវិទ្យាស្ថាន NPIC និងឯកឧត្តម យ៉ោក សុទ្ធី អតីតនាយកវិទ្យាស្ថាន NTTI ដែលបានដឹកនាំកន្លងមកធ្វើឱ្យវិទ្យាស្ថានទាំងពីរ ទទួលបានសមិទ្ធផល និងស្នាដៃជាច្រើន ។
ឯកឧត្តមរដ្ឋមន្ត្រី បានណែនាំនិងផ្តាំផ្ញើដល់នាយកថ្មីនៃវិទ្យាស្ថានទាំងពីរឱ្យបន្តដឹកនាំគ្រប់គ្រងវិទ្យាស្ថានឈរលើស្មារតីសាមគ្គីឯកភាពផ្ទៃក្នុង មានតម្លាភាព គណនេយ្យភាព រក្សាចាស់ បង្កើនថ្មី និងដាក់ចេញនូវវិធានការកំណែទម្រង់ សំដៅធ្វើឱ្យកាន់តែមានប្រសិទ្ធភាព និងគុណភាពនៃការបណ្តុះបណ្តាល ជាពិសេសការពង្រឹងសមត្ថភាពគ្រូ ទំនើបកម្មទាំងឧបករណ៍ សម្ភារៈនិងកម្មវិធីសិក្សាទាំងជំនាញទន់ និងជំនាញរឹងឱ្យឆ្លើយតបបានតាមការវិវត្តរីកចម្រើននៃឧស្សាហកម្ម និងបច្ចេកវិទ្យា ព្រមទាំងពង្រឹងការគ្រប់គ្រង ទាំងវិន័យការងារ និងក្រមសីលធម៌វិជ្ជាជីវៈ។
ឯកឧត្តមក៏បានណែនាំឱ្យពង្រឹងកិច្ចសហការជាមួយវិស័យឯកជន និងដៃគូជាតិ-អន្តរជាតិ លើកកម្ពស់ការហ្វឹកហ្វឺនកូនជាង ការធ្វើតេស្ដទទួលស្គាល់ជំនាញពីមុន ការបង្កើន និងផ្លាស់ប្តូរជំនាញ ព្រមទាំងការស្រាវជ្រាវ និងនវានុវត្តន៍ ជាពិសេសផ្សព្វផ្សាយពីវិស័យ TVET តាមរយៈការពង្រឹងកិច្ចសហការជាមួយក្រុមហ៊ុនធំៗ តំបន់សេដ្ឋកិច្ចពិសេស និងអាជ្ញាធរមូលដ្ឋាន។
ឯកឧត្តមរដ្ឋមន្ត្រីមានជំនឿយ៉ាងមុតមាំថា ការដឹកនាំថ្មី ដោយមានការចូលរួមពីមន្ត្រី បុគ្គលិក និងលោកគ្រូ អ្នកគ្រូទាំងអស់នឹងធ្វើឱ្យវិទ្យាស្ថានទាំងពីរក្លាយជាគ្រឹះស្ថាន TVET ឈានមុខគេក្នុងតំបន់ និងជាមជ្ឈមណ្ឌលឧត្តមភាព បង្កើតសមិទ្ធផលថ្មីៗ និងបណ្តុះបណ្តាលធនធានមនុស្សប្រកបដោយគុណភាព ស្របតាមអនុសាសន៍ណែនាំដ៏ខ្ពង់ខ្ពស់របស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី។
ឯកឧត្តមសង្កត់ធ្ងន់ថា ការតាំងចិត្ត និងការចូលរួមរបស់ថ្នាក់ដឹកនាំគ្រឹះស្ថាន TVETទាំងអស់គឺជាការរួមចំណែកធ្វើឱ្យវិស័យ TVET កាន់តែដើរតួនាទីដ៏សំខាន់ក្នុងការកសាងមូលធនមនុស្សប្រកបដោយជំនាញ បច្ចេកវិទ្យា និងនវានុវត្តន៍ សម្រាប់គាំទ្រដល់ការអភិវឌ្ឍសេដ្ឋកិច្ច និងសង្គមកម្ពុជា និងការទាក់ទាញវិនិយោគផ្ទាល់ពីបរទេស។
នាឱកាសនោះដែរ ឯកឧត្តម ជិន តារ៉ា និងឯកឧត្តម តាន់ កុសល ក៏បានថ្លែងអំណរគុណ និងប្តេជ្ញាចិត្តខិតខំបំពេញតួនាទី និងភារកិច្ចដែលប្រមុខរាជរដ្ឋាភិបាល និងថ្នាក់ដឹកនាំក្រសួងប្រគល់ជូនប្រកបដោយស្មារតីទទួលខុសត្រូវ តម្លាភាព និងប្រសិទ្ធភាព ៕
ចែករំលែកព័តមាននេះ